Psalms 3
Bǎ na kè̌shǐ kû̌ pwa̤sǎkhě na ata̤ma̤jî̌ akhanu, yṳ̌ǎ pû Cǒmara tûjû̌pwa̤
Bǎ Khwǐdawi̤ hǎhtò̌khlè̌kè aphû̌ Khûabashalṳ̂ alǎ̤ akhanu, awě̤ ata̤sǎwǐ htò̌sò̌htò̌ nutôshǒ.
(Shamuěla ginǐ̤bǎ tôbǎ 15:1-18:33)
1Ǒ Cǒmara tûjû̌pwa̤, pwa̤sǎkhě he ô̌wô̤̌ô̌plṳ̂ mî̌ca. Pwa̤ma̤tukutakǎ he ô̌htò̌plṳ̂꤮ mî̌caca. 2Asî hî̌ he yô̤ kû̌, “Cǒmara ma̤hǎplǎ a tôkhò̌꤮ tô̤̌.” 3Ǒ Cǒmara tûjû̌pwa̤, na mî̌ helǎ̤ taka dǒ a takabǐnṳ̌ he. Na ǐ he ta̤sîrîdû̌sîrîhtû, ta̤bè̌dubè̌nǎ̤. Na mî̌ pwa̤ǐkhû̌ǐǎ shû̌htò̌ he sǎphlǒ. 4He kaǎgǔhtò̌ Cǒmara tûjû̌pwa̤ ta̤ma̤jè̌. A ô̌ dǒ akhôlô plò̌shî̌ dě ama̤jè̌ he. 5Cǒmara tûjû̌pwa̤ takaǐ he dě he hǎmôô̌nṳ̌ mô̤mô̤bǎbǎ. He shî̌nǎ mô̤mô̤bǎbǎ gesô̌. 6Pwa̤sǎkhě he dǒ arî̌asò̌kû hè ô̌plǒô̌cu te̤we̤bò he lî̤khôlî̤gî̌ bǎbǎ he sǎǐsha tô̤̌. 7Ǒ꤮ Cǒmara tûjû̌pwa̤, na plǎ̤la̤gǎ kèbò mè̤̌caca bò pwa̤sǎkhě he tokhlǒ akhǎ pě. Na delò̤tě̤pro̤ kèbò mè̤̌caca kòyòkhuhe phû̌mò̤̌ akhû̌khi pě akhû̌akhî, ma̤jè̌ he. Ǒ꤮ he Cǒmara ma̤hǎplǎ he. 8Ta̤ma̤hǎplǎnu ahè dǒ Cǒmara tûjû̌pwa̤ ô̌. Na ǐshowî̤ tûû̌ pû nakòyò nî̌꤮.
Copyright information for
KxfSCKXF