Psa 30 | KxfSCKXF | STEP | Khwǐdawi ata̤sǎwǐ Ǒ Cǒmara tûjû̌pwa̤, na bè̌htò̌yô̤̌ he dě. He khuwè̤ tokhlǒ sǎlě̤sǎlò̤ dǒ he khû̌khî tô̤̌ akhû̌khî, he htû̌sò̌htò̌ na.

Psalms 30

1 Ǒ Cǒmara tûjû̌pwa̤, na bè̌htò̌yô̤̌ he dě.

He khuwè̤ tokhlǒ sǎlě̤sǎlò̤ dǒ he khû̌khî tô̤̌ akhû̌khî, he htû̌sò̌htò̌ na.

2 Ǒ Cǒmara tûjû̌pwa̤, he Běcǎ, he kwihtò̌ na ta̤ma̤jè̌.

Dě na ma̤hǎmǎ bǎ he ta̤shǐta̤sha.

3 Ǒ Cǒmara tûjû̌pwa̤, na phǐkè he ta̤htûpwa̤ dǒ lṳ̌gǎnǎdo.

He glè̌ lò̤tě̤ dǒ lṳ̌kûyô̤̌ akû dě na ma̤hǎplǎkè he.

4 Ǒ kòyò dǒ a bè̌dubè̌nǎ̤ Cǒmara sî, sǎwǐhtò̌mò̌ Cǒmara tûjû̌pwa̤.

Htû̌sò̌kǐkrû̌htò̌ mò̌ ami̤plò̌shǐ.

5 A sǎphlǒdû̌ tashò̌phû̌nô̤̌, a kè̌dû̌ǐ tûjû̌pwa̤.

Hǎ bǎ lṳmṳ̌khǐ, sǎlě̤sǎlò̤ bǎ lṳmṳ̌lî.

6 Bǎ heta ô̌lǒô̌be lṳ̂gû̌gè̌ pe tô̤̌ akhanu, he hî̌ǐ tûû̌ henǎ̤ kû̌, “Ta̤jî̌ta̤jû̌ hèbǎjò pe he tôkhò̌ tô̤̌.”

7 Ǒ Cǒmara tûjû̌pwa̤, dǒ na bwǐdû̌sîrîhtû akhû̌akhî, na bè̌měbè̌gle he sô̌sô̌kû̌ khôlôdû̌khôlôhtû.

Bǎ na kè̌khô̌kè he akhanu, he ǐsha gònò̤̌gòglè mî̌ca.

8 Ǒ Cǒmara tûjû̌pwa̤, he kwisǎyṳhtò̌ na.

He kwihtò̌ Běcǎ tûjû̌pwa̤ ata̤ma̤jè̌ dǒ a gǔ gwèbǎǐ he.

9 He kè̌ sikè, tô̤̌mî̌ he kè̌ lò̤tě̤kè dǒ lṳ̌kûyô̤̌ mî̌, a nǐ̤bwǐsirî dǒ naya mî̌titè?

He nǎ̤glǒ dǒ a htû hǎkumṳ̌nu a htû̌sò̌htò̌ jò pe cǎ na ya?

A htû̌sò̌htò̌ jò pe cǎ na ta̤cǒ kû̌ yô̤̌nu ya?

10 Ǒ Cǒmara tûjû̌pwa̤, ganǎ̤de mò̌ he kwi nadě, gwèbǎ ǐ mò̌ he.

Ǒ Cǒmara tûjû̌pwa̤ ma̤jè̌mò̌ he.

11 Na htû̌lè̌tèplè̌kè bǎ he ta̤sǎplǎ̤sǎyṳ kû̌ ta̤kalî̌ htû̌sò̌kǐkrû̌ hǒ.

Na plû̌htò̌kè bǎ he ta̤sǎplǎ̤ jejû, na kûsô̌htò̌ bǎ he ta̤sǎlě̤sǎlò̤ jejû.

12 Pô̤̌nukhû̌khî, khònò̤̌ he gǔ sǎwǐ htû̌sò̌kǐkû̌htò̌ na kû̌ he sǎphlǒ tômèbò, he gǔ ô̌ sǔtǔkǔ jò pe tô̤̌.

Ǒ he Běcǎ Cǒmara tûjû̌pwa̤, he gǔ hî̌bwǐhî̌sîrî na tûjû̌pwa̤ talakhǎ pě.