Psalms 31
Ta̤sǎmǒla̤ǐ Cǒmaradû̌ ata̤kwicaba
Khwǐdawi̤ ata̤sǎwǐ, ta̤sǎwǐ numî̌ pwa̤sǎwǐ ta̤ ikǒlǒkò dǒ ta̤lṳhtò̌hôkû nutôpwa̤ aya.
1Ǒ Cǒmara tûjû̌pwa̤, he nǎla̤ǐ na dǒ na gǔ tòdòtakabǐ he. No htûhtò̌ tǎ̤ ta̤shòwò̤̌ dǒ heya tîkî̌ mǎ̤nî̌. Na mî̌ Cǒmara dǒ a ma̤cǒma̤tè̤ pṳ̂̌ tôplǎ akhû̌akhî, ma̤hǎplǎge he. 2Dò̌ nanò̌ku, ma̤hǎplǎ phwèphwè mò̌ he. Htû bǎ he lǒ̤dû̌ dǒ a takabǐǐ he. Htû bǎ hewî̤̌we̤dû̌ dǒ atònò dǒ a ma̤hǎplǎge he. 3Na mî̌ he lǒ̤dû̌, he wî̤̌we̤dû̌ dǒ atònò. Dǒ ta̤bè̌dubè̌nǎ̤ nami̤dû̌ ayanu, sûcû̌ he, nè̌klè̌nè̌klò he. 4Na mî̌ he lǎ̤ô̌tûdû akhû̌akhî, ma̤hǎplǎge he kû̌ dǒ pwa̤sǎkhě he tokhlǒ ata̤dòǐ henu. 5He bè̌lò̤kè he ta̤htûpwa̤ dǒ nacǔdekû. Ǒ Cǒmara tûjû̌pwa̤, ma̤hǎplǎge mò̌ he, na mî̌ Cǒmaradû̌ dǒ acǒ kû̌ ayô̤̌. a 6He sǎkhî̌ kòyò dǒ a cubucaba pwa̤yô̤pwa̤gî̌ dǒ tṳ̌dènu. He yṳ̌ǎnṳ̌ pwǎ Cǒmara tûjû̌pwa̤ nô̤̌ pwǎ. 7Nata̤mô̤nu ahǎbòjò tô̤̌ akhû̌akhî, he gǔ mô̤sû̌mô̤sò̌ sǎlě̤sǎlò̤ gutṳ̌. Na kè̌shǐ bò he ta̤hǎwě̤shèwè̤. Na sî̌ganǎ̤ bò he sǎphlǒ ata̤pò̤̌ta̤sha. 8Na no lṳ̂pṳ̂̌ he kû̌ he khuwè̤ tô̤̌. Na sûcû̌ he dǒ gûlǎ̤mô̤. 9Ǒ Cǒmara tûjû̌pwa̤, he tṳ̌bǎ kû̌ ta̤jî̌ta̤jû̌ akhû̌akhî, gwèbǎǐ he. Hegû̌hegè̌ hǎwôshû̌ dě hemǐ̤sǎ pulṳ̌pôlô̤̌ bò. He nǎ̤glǒglǒ kû̌ he sǎphlǒphlǒ akhûaǎ ô̌ petô̤̌. 10He ta̤ô̌htûpwa̤ shěkhǎ nî̌ ahǎbòkèpwǎ kû̌ ta̤sǎplǎ̤. He lṳmṳ̌ni̤ lṳmṳ̌sa hǎbòkè pwǎ kû̌ ta̤kookasha. He tṳ̌bǎkhòbǎ ta̤pò̤̌ta̤sha dě he khû̌shiǎjǎ hǒ. He khwǐ mî̌ akrû̌bò hǒhǒ. 11Lǒ̤bò pwa̤sǎkhě he sîtokhlǒ mî̌ gènè̤ pî̌tî̌ kè̌klû̌kè̌la bò he. He hǐphòkòshǐ sîtokhlǒ mî̌ a pî̤jî̌ǐsho bò hehe. Hesû̌ hekhô tokhlǒ hè ô̌phǔ bǔ pe kû̌ he tô̤̌tô̤̌. Bǎ asî kè̌shǐ he dǒ klè̌lô̤ akhanu, a hǎhtò̌khlè̌ tephekè bò kû̌ he. 12Kòyò shôpe̤ bò he sô̌sô̌kû̌ he sihto nuhǒ. He sô̌sô̌kè pwǎ kû̌ po̤hǎphò̌kè. 13He ganǎ̤de kòyò ǎpwa̤ dô̌mi̤shǐcô̌ bò he. Ta̤tirǐsò̌ ǐsha mî̌ a ô̌pǒ̤te̤we̤ bò he. Asî sǎphlǒtôbò lû̌û dǒ a gǔ hto he, gǔ ma̤si lǒ̤bò he. 14Ǒ Cǒmara tûjû̌pwa̤, he sǎmǒhtò̌ pwǎ na nô̤̌pwǎ. Na mî̌ he Cǒmara hǒ. 15He ta̤htûpwa̤ ô̌ pwǎ dǒ nacǔdekû. Ma̤hǎplǎkè he dǒ he khuwè̤ ma̤jî̌ma̤jû̌ he nutokhlǒ acǔdekû. 16Kè̌wî̤kè̌wô̌ mò̌ na pwa̤ma̤ta̤phû̌ henu. Pô̤̌ na ô̌ kû̌ ta̤mô̤ dǒ ahǎbòjò tô̤̌ akhû̌akhî, ma̤hǎplǎge he. 17Ǒ Cǒmara tûjû̌pwa̤, he kwisǎyṳhtò̌ na. No htûhtò̌ pe tǎ̤ ta̤shòwò̤̌ dǒ heya mǎ̤. Tûlû̌ ma̤sòwò̤̌ bò kòyòphû̌mò̤̌ nu. No cû̌ô̌ sǔtukǔ bòkè asî dǒ lṳ̌gǎnǎdo nu. 18Kòyò dǒ a lahǎlòhò, agènè̤dû̌ǐ anǎ̤, a phî̌htò̌yô̤̌ anǎ̤, a hî̌bǎ takǎshěshu kòyòcǒkòyòtè̤ tokhlǒnu, no ô̌sǔtukǔkè bò akhû̌phě. 19Na ta̤mô̤ta̤wô̌ nî̌ adû̌awô̌ pwǐtènu, na bè̌plǒ bǎ kòyò dǒ a ǐsha bè̌dubè̌nǎ̤ nanu. Na tîwî̌tòwòǐ kòyò dǒ a sǎmǒ hèô̌ tûdû dǒ naô̌ nutokhlǒ aya. Na ǐ asî dǒ kòyò pṳ̂̌tôpwa̤ alô̤mô̤̌. 20Pô̤̌khô asî gǔ hǎplǎ kû̌ ta̤ phû̌mò̤̌shǐhtô ayanudě, na bè̌ô̌ tûdû hǔbǐwô̌ asî dǒ nalô̤mô̤̌. Pô̤̌khô asî gǔ hǎplǎ kû̌ pwa̤sǎkhě asî nutokhlǒ ata̤pi̤jî̌ǐsho ayanu, na bè̌hǔbè̌sè̌ǐ asî bǎ na lǎ̤ô̌ ǐtûû̌nu akû. 21Htû̌sò̌htò̌ Cǒmara tûjû̌pwa̤. Bǎ pwa̤sǎkhě he hèbôte̤we̤ shěpě̤ hewî̤̌ akhanu, a dǔlṳ̌ cô̌klǐcô̌sè bǎ he ata̤mô̤̌ dǒ ahǎbòjò tô̤̌. 22He sǎǐsha dě he gènè̤ kû̌ na wṳ̂̌hǎhtò̌kè he dǒ na lô̤mô̤̌. Bǎbǎkǎlè bǎ he kwisǎyṳhtò̌ na ta̤ma̤jè̌ akhanu, na ganǎ̤de he ta̤kwihtò̌. 23Ǒ kòyò dǒ abè̌dû̌ Cǒmara sî, mô̤nǐ̤ Cǒmara tûjû̌pwa̤. Cǒmara tûjû̌pwa̤ kè̌ǐtakaǐ kòyò dǒ a cǒ kû̌ ayô̤̌. A cî̌htò̌ bò kòyò dǒ a bè̌htò̌lǒ asǎphlǒ. 24Ǒ kòyò dǒ a ô̌pǒ̤kè̌shuǐ Cǒmara tûjû̌pwa̤ lǒ̤bò sî, bè̌shû̌bè̌sho lô̌khô sîsǎphlǒ, bè̌khubè̌he lô̌khô sǔshi nî̌.
Copyright information for
KxfSCKXF