Psalms 33

Ta̤htû̌sò̌htò̌ pwa̤bô̌lò̤ta̤ kû̌ pwa̤pǒsîrîta̤

1Ǒ kòyòcǒkòyòtè̤ sî, sǎlě̤sǎlò̤ sǎwǐhtûsò̌htò̌ mò̌ Cǒmara tûjû̌pwa̤.

Kòyò dǒ a jûlě̤phǐ Cǒmara tûjû̌pwa̤ ayô̤̌ tokhlǒ ata̤htû̌sò̌htò̌ numî̌ atôabǎ.

2Dǒ lô̌khô tǐtutegwe, htû̌sò̌hî̌bwǐ Cǒmara tûjû̌pwa̤.

Sǎwǐhtûsò̌htò̌ a kû̌ ta̤dǒta̤ǔ dǒ apli̤ô̌ abôshǐ.

3Sǎwǐhtò̌ a kû̌ ta̤sǎwǐ asa.

Tôglô̌ jòwô̌bǎ tǐtutegwe, sǎlě̤sǎlò̤ kǒsǎwǐhtò̌ lô̌khô.

4Cǒmara tûjû̌pwa̤ alě̤ayô̤̌ mî̌ atôabǎ acǒatè̤.

A cǒ kû̌ yô̤̌ dǒ a ma̤ ta̤ lǒ̤bò.

5Cǒmara tûjû̌pwa̤ mô̤nǐ̤ ta̤cǒta̤tè̤, a cèròtô cèròbǎ ta̤.

Hǎkhû̌běkhû̌, a lǒbe kû̌ Cǒmara ata̤mô̤ dǒ ahǎbòjò tô̤̌nu.

6Cǒmara tûjû̌pwa̤ bô̌lò̤ mǒkhû̌ kû̌ alě̤.

A tèlò̤ lṳmṳ̌, la, shǎ kû̌ ayô̤̌.

7A bè̌plǒbò shidû̌te̤we̤ ashi tokhlǒ dǒ gûlǎ̤ tôkûnô̤̌.

A bè̌cu bò lû̌û sô̌sô̌kû̌ kòyò bè̌plǒ sǒsusǒsǎ dǒ phòkû.

8No ǐshabò hǎkhû̌ tôbǎ kû̌ Cǒmara tûjû̌pwa̤.

No bè̌dubè̌nǎ̤bò kòyò hǎkhû̌phû̌ bò̌bò kû̌ a.

9Bǎ a hî̌bǎ pwǎ ayô̤̌ akhanu, hǎkhû̌ ô̌htûhtò̌.

Bǎ a hî̌lò̤ pwǎ ayô̤̌ akhanu, ta̤ pṳ̂̌tôcǒ ô̌lṳ̌htò̌.

10Cǒmara tûjû̌pwa̤ ma̤tě̤tṳ̌ kèbò kòyò tokhlǒ ata̤ma̤mǎnǎ.

A ma̤pî̌ kèbò kòyò hǎkhû̌phû̌ ata̤yè̤nǎ nu.

11Cǒmara tûjû̌pwa̤ ata̤tîwî̌nǎ numî̌, a ô̌měô̌gle tûjû̌pwa̤.

Ata̤yè̤lò̤nǎ mî̌ a ô̌mě lò̤jû̌lò̤pwa̤ tôhtu hto tôhtu.

12Kòyò khlilèphû̌ dǒ Cǒmara tûjû̌pwa̤ htû asî Cǒmara dě a rû̌htò̌ asî kû̌ aû̌cata̤bǐ tokhlǒnu a nǐ̤bǎ ta̤ǐshôwî̤.

13Cǒmara tûjû̌pwa̤ ô̌ dǒ mǒkhû̌ kè̌lò̤, a kè̌shǐlò̤ bò kòyò hǎkhû̌phû̌.

14A ô̌ dǒ gògǒhtò̌yô̤̌lǒ lǎ̤pǒnṳ̌ nudě a kè̌lò̤ kòyò pṳ̂̌tôpwa̤ dǒ hǎkhû̌.

15A mî̌ pwa̤ dǒ a bô̌lò̤ kòyò hǎkhû̌phû̌ pṳ̂̌tôpwa̤ asǎphlǒ ta̤gènè̤.

A sî̌ganǎ̤ bòmǔtegle asî ma̤ ta̤pṳ̂̌tôcǒ.

16Khwǐ mò̌pèpè̌ bǎbǎ dǒ akli saprṳ̂dû̌ akhû̌akhî, a shěpè̤̌ bò̌jò nô̌ ta̤shěta̤pě̤ tô̤̌.

Kli ikǒdû̌ dǒ ajò ta̤shěpě̤ mò̌pèpè̌ bǎbǎ, a ma̤hǎplǎge jò nô̌ kû̌ ata̤shû̌ta̤sho tôkhò̌ tô̤̌.

17Tîsî̌ lǎ̤shě ta̤shě tokhlǒ bǎbǎ, lǎ̤nǎla̤ǐ asî dǒ lǎ̤shěpè̤̌ ta̤shě ayanu a ô̌ tô̤̌.

Asîkhû̌ǎ shû̌shokhlo bǎbǎkǎlè a ma̤hǎplǎjò sî tô̤̌.

18Cǒmara tûjû̌pwa̤ kè̌pǒ̤ǐ kòyò dǒ a ǐsha bè̌dubè̌nǎ̤ lû̌û, kòyò dǒ a kè̌shuǐ sǎmǒla ata̤mô̤ dǒ ahǎbòjò tô̤̌ nu.

19A ma̤hǎplǎge asî dǒ ta̤sita̤hǎmǎ akû.

Bǎ gawǐ̤gakodû̌ ashěakhǎnu, a dǐ ô̌htûpwa̤ pe asî.

20Pa ô̌pǒ̤kè̌shuǐ htò̌ Cǒmara tûjû̌pwa̤.

A mî̌ pwa̤ dǒ a ma̤jè̌ pa, pwa̤ dǒ a takabǐǐ pa.

21Pa yṳ̌ǎnṳ̌ ami̤ plò̌shǐ akhû̌akhî, pa sǎlě̤sǎlò̤ jî̌jî̌.

22Ǒ Cǒmara tûjû̌pwa̤, pô̤̌ pa kè̌shu nǎla̤ǐ ta̤ dǒ naô̌ nu, nata̤mô̤ dǒ ahǎbòjò tô̤̌ nî̌ a ô̌ pû kû̌ pa nî̌.