Psalms 34

Htû̌sò̌htò̌ Cǒmara dǒ a ma̤hǎplǎge pa dǒ ta̤pò̤̌ta̤sha akû

Khwǐdawi̤ ata̤sǎwǐ htû̌sò̌htò̌. Ta̤sǎwǐ hǒo tôshǒmî̌ a sǎwǐ bǎ jî̌kimi anǎ̤ dǒ Khwǐabǐmalè̌ dǒ a wṳ̂̌hǎhtò̌cû̌ tephekè lû̌û dě hǎhtò̌khlè̌tephekè hto akhanu.

1He gǔ htû̌sò̌htò̌ Cǒmara tûjû̌pwa̤ pṳ̂̌shěpṳ̂̌khǎ.

He htû̌sò̌ ô̌kǔ jò pe tô̤̌.

2Cǒmara tûjû̌pwa̤ ma̤ bǎ he akhû̌akhî, he glè̌ htû̌sò̌ǐ yǎ.

No ganǎ̤de kòyò dǒ kò ma̤jî̌ma̤jû̌ asînu tokhlǒ dě no sǎlě̤sǎlò̤ asî.

3Shôbǐǐlṳ̌ wô̤̌wô̤̌ lû̌ Cǒmara tûjû̌pwa̤ asîrîdû̌sîrîhtû tǎ꤮.

Pa htû̌sò̌htò̌ wô̤̌wô̤̌ lû̌ ami̤ tǎ꤮.

4He kwihtò̌ Cǒmara tûjû̌pwa̤ ata̤ma̤jè̌ dě a hî̌shǔ he.

A ma̤hǎplǎge he dǒ ta̤sǎgònò̤̌ ǐsha lǒ̤꤮ bò akû.

5Kòyò kè̌shu nǎla̤ǐ dǒ a ô̌ tokhlǒ sǎlě̤ pě.

Asî glè̌ shòwò̤̌ dě mǐ̤sǎpî̌tî̌ tôkhò̌꤮ tô̤̌.

6Ta̤ dǒ kòyò ma̤jî̌ma̤jû̌ lû̌ nutôpwa̤ kwisǎyṳhtò̌ Cǒmara tûjû̌pwa̤ dě a ganǎ̤de lû̌ ata̤kwi.

A ma̤hǎplǎge lû̌ dǒ ata̤pò̤̌ta̤sha lǒ̤꤮ bò akû.

7Kòyò dǒ a ǐsha bè̌dubè̌nǎ̤ Cǒmara tûjû̌pwa̤nu, Cǒmara atanaphû̌ ô̌pǒ̤te̤we̤, ma̤hǎplǎge asî.

8Cǒmara tûjû̌pwa̤ wô̌ pwǐ꤮ tènu kè̌lǎsî̌ya dě sî̌yaphlô lô̌khô.

Kòyò dǒ a ô̌tûdû nǎla̤ǐ lû̌ tokhlǒnu, anǐ̤bǎ ta̤ǐshowî̤. ^a

9Kòyò dǒ a bè̌dubè̌nǎ̤ Cǒmara tûjû̌pwa̤ sî, ǐsha lô̌khô a nî̌.

Kòyò dǒ a ǐsha lû̌ tokhlǒnu, alṳ̂bǎ ta̤ tokhlǒnu a ta ô̌bò.

10Khî tôlôphû̌ tokhlǒ ô̌tî̤wî̤̌ sǎǎsǎô ashǎ.

Bǎbǎkǎlè kòyò dǒ a kè̌lǎ Cǒmara tûjû̌pwa̤ nǐ̤bǎbò ta̤wô̌ pṳ̂̌tôcǒ.

11Hèmò̌ lô̌khô hephû̌mǒ̤phû̌khû sî, ganǎ̤de lô̌khô heyô̤̌.

Tô bǎ ǐsha bè̌dubè̌nǎ̤ǐ Cǒmara tûjû̌pwa̤ hětènu, he sû̌ǐtòwòǐ bǎ sî.

12Sî sǎyṳ ta̤ô̌htûpwa̤ dǒ amô̤ ya?

Mî̌ sî sǎyṳ ô̌htûpwa̤ lṳmṳ̌ni̤ lṳmṳ̌sahtû dǒ a ô̌ kû̌ ta̤sǎlě̤sǎlò̤nu ya? ^b

13Kè̌ hî̌ pô̤̌numî̌, sè̌rè̌ǐ naplî̤ dǒ a gǔ hî̌bǎ ta̤phû̌mò̤̌shǐhtô tô̤̌.

Kǎtô̤̌ sè̌rè̌ ǐpô̤̌ nukhû̌phě dǒ a glè̌ hî̌bǎ ta̤lòhǎlòhò tô̤̌.

14Cû̌tephekè kû̌ ta̤phû̌mò̤̌shǐhtô, ma̤ ta̤ dǒ awô̌.

Jî̌pwǐ̤ kè̌shuǐ ta̤gûjû̌kabǎ dě pṳ̂̌měǐ yǎ. ^c

15Cǒmara tûjû̌pwa̤ kè̌pǒ̤ǐ kòyò sǎphlǒwô̌.

A ganǎ̤de asî ta̤kwihtò̌ ta̤ma̤jè̌. ^d

16Bǎbǎkǎlè Cǒmara tûjû̌pwa̤ ma̤tě̤tṳshǔkè kòyò dǒ a ma̤ ta̤phû̌mò̤̌shǐhtô.

A no sibò asî dě kòyò sî̌ya pe asî tôpwǎ̤ tô̤̌.

17Bǎ kòyòcǒkòyòtè̤ kwihtò̌ ta̤ma̤jè̌ akhanu, Cǒmara tûjû̌pwa̤ ganǎ̤de ata̤kwi.

A ma̤hǎplǎkè asî dǒ asî ta̤pò̤̌ta̤sha lǒ̤bò akû.

18Cǒmara tûjû̌pwa̤ ô̌phǔ kû̌ kòyò dǒ a sǎphlǒpî̌.

A ma̤hǎplǎge kòyò dǒ ata̤kè̌shǔǐ ô̌ pe tô̤̌.

19Kòyò sǎphlǒwô̌ tôpwa̤ kè̌shǐ tṳ̌bǎ dû̌wî̤ ta̤pò̤̌ta̤sha bǎbǎkǎlè Cǒmara tûjû̌pwa̤ ma̤hǎplǎge a dǒ ta̤ nutokhlǒ lǒ̤bò akû.

20Cǒmara tûjû̌pwa̤ tugutakaǐ wô̌bǎ akhwǐ.

A no la̤gǎ tôbô̌ tô̤̌. ^e

21Ta̤phû̌mò̤̌shǐhtô dǒ kòyòphû̌mò̤̌ ma̤ nutokhlǒ, a ma̤si sô̌ asî pě.

Kòyò dǒ a sǎkhî̌ kòyò sǎphlǒwô̌ tokhlǒnu, Cǒmara cî̌htò̌ asî pě.

22Cǒmara tûjû̌pwa̤ rû̌htò̌geǐ apwa̤ma̤ta̤phû̌.

Kòyò dǒ a hè ô̌tûdû anǎ̤ dǒ aô̌ tokhlǒnu, a khòbǎ ta̤cèrò tô̤̌.