Psalms 35
Ta̤ma̤jè̌ aya Khwǐdawi̤ ata̤kwicaba
Khwǐdawi̤ ata̤sǎwǐ htû̌sò̌htò̌
1Ǒ Cǒmara tûjû̌pwa̤, ma̤tě̤tṳshǔ bǎ he kòyò dǒ a ma̤tě̤tṳ henu. Shěshǔkè bǎ he kòyò dǒ a hèshěpě̤ henu. 2Pṳ̂̌měhtò̌nṳ̌ na lǎ̤takadû̌, lǎ̤takaphû̌, ma̤mò̌, ma̤jè̌ mò̌ he. 3Pṳ̂̌měhtò̌nṳ̌ na sòbòdû̌, sòbòphû̌. Shěpě̤shǔ mò̌ pwa̤ dǒ a lṳ̂shěpě̤ he. Hî̌ mè̤̌mè̤ mò̌ he kû̌, “He mî̌ pwa̤ma̤hǎplǎ na” pô̤̌nu. 4No shòwò̤̌ mǐ̤sǎpî̌bò kòyò dǒ a kè̌lǎ ma̤si henu. No htû̌tiwǐgesô̌, kiti̤kaa bò pwa̤ dǒ a gǔ ma̤phû̌mò̤̌shǐhtô henu. 5No lûcû̌kè bò asî sô̌sô̌kû̌ phîmṳ̂̌ lûcû̌kè dǒ gili̤sǎklanu. No wṳ̂̌htò̌ cû̌tephekè bò asî kû̌ Cǒmara tûjû̌pwa̤ atanaphû̌. 6Bǎ Cǒmara tûjû̌pwa̤ atanaphû̌ lṳ̂pṳ̂̌ asî akhanu, asî klè̌ khǐsiwi̤ bô̌plî bò pû nî̌. 7He ma̤sǔma̤plě nǒ asî tôcǒ tô̤̌ bǎbǎkǎlè a glè̌ dò hǔ he kû̌ yṳglǒ. A pho lô̌khô hǎkûyô̤̌ dǒ he glè̌ lò̤tě̤ aya. 8Bǎ asî gènè̤tǒ̤ khôtô̤̌ akhanu, ta̤pî̌ta̤lṳ̂̌ gǔ ô̌htò̌shumṳ̌ bǎ asî nî̌. Yṳglǒ dǒ asî shěhǔshěsè̌ tokhlǒnu, no htò̌ta̤pǎ̤ gesô̌ tûû̌ kû̌ asînǎ̤. Hǎkûyô̤̌ dǒ asî phonu, no lò̤tě̤si sô̌ kû̌ asînǎ̤ nî̌. 9Ma̤pô̤̌nudě dǒ Cǒmara tûjû̌pwa̤ akhû̌akhî, he sǎlě̤sǎlò̤. Dǒ a ma̤hǎplǎge he akhû̌akhî, he mô̤sû̌mô̤sò̌. 10He hî̌ lǒ̤sû̌lǒ̤sò̌ kû̌, “Ǒ Cǒmara tûjû̌pwa̤, kòyò sô̌sô̌kû̌ nanu a ô̌ cǎ tôpwa̤pwa̤ ya? “Pwa̤ dǒ a takabǐnṳ̌ pwa̤hǎwě̤shèwè̤ dǒ kòyòshû̌sho ma̤numa̤cě lû̌û sô̌sô̌kû̌ nanu a ô̌ cǎ ya? “Pwa̤ dǒ a ma̤hǎplǎge kòyò dǒ kòyò pè̤̌ǎpè̤̌ô lû̌û, kòyò shôdô ta̤ma̤jè̌ dǒ pwa̤phî̌sigwǐ yǒsaphǎta̤ acǔdekû sô̌sô̌kû̌ nanu a ô̌ nô̌ hè̌?” 11Pwa̤khò̌lṳ̌ lòhǎlòhô hî̌ lô̌khô kû̌ he ma̤ ta̤phû̌mò̤̌shǐhtô. Asî nè̌lò̤ he kû̌ ta̤sǔ dǒ he sî̌ganǎ̤ bǎ tôkhò̌ tô̤̌ tokhlǒ. 12He ma̤ ta̤wô̌pwǎ bǎbǎkǎlè asî ma̤shěshu còcè̌ he ta̤phû̌mò̤̌shǐhtô. A jî̌ gutṳ̌ he sǎphlǒ. 13Bǎ asî shǐsha akhanu, he kûsô̌htò̌ jetûprṳ̂ tôpṳ. ▼▼Kòyò kûsô̌htò̌ jejû tûprṳ̂ bǎ kòyò dǔlè̌lṳ̌ ta̤sǎplǎ̤sǎyṳ dě kòyò dǔǎdǔô shǎ akha.
He sǎplǎ̤ dě he dǔǎdǔô kwicaba. Bǎbǎkǎlè Cǒmara ganǎ̤de he ta̤kwicaba tô̤̌. 14He bè̌ asî pô̤̌ he sû̌khô, hepṳ̌hewè̤̌. Hehǎhewô sǎplǎ̤nǎbǎ asô̌sô̌kû̌ kòyò hǎ nǎsǔnǎbǎǐ amǒ̤nu. 15Bǎbǎkǎlè bǎ he kè̌shǐtṳ̌bǎ kû̌ ta̤pò̤̌ta̤sha akhanu, asî sǎlě̤sǎlò̤ lǒ̤bò. A ô̌plǒô̌cu te̤we̤ bò he, a sǎyî̤̌ bò he. Kòyò dǒ he sî̌ganǎ̤ tô̤̌ tokhlǒ dě a pî̤jî̌ǐsho ô̌kǔ pe he tô̤̌. 16Kòyò dǒ a bè̌dubè̌nǎ̤ kû̌ kòyò Cǒmara tô̤̌ nutokhlǒ a pî̤jî̌ǐsho he. A kwîbò akhû̌khî. 17Ǒ Běcǎdû̌, na gǔ kè̌ tǒ̤ he bǎkhò̌tè pě? Ma̤hǎplǎkè mò̌ he dǒ kòyò kè̌lǎ ma̤pî̌ma̤lṳ̂̌ he acǔdekûnu. Ma̤hǎplǎ pamò̌ he ta̤htûpwa̤ dǒ kòyòhe sô̌sô̌kû̌ khî nutokhlǒ acǔdekûnu. 18Kè̌ ma̤pô̤̌nu mî̌, he gǔ hî̌bwǐhî̌sîrî na dǒ kòyòsaprṳ̂ alô̤mô̤̌. He gǔ htû̌sò̌htò̌ pô̤̌ na dǒ kòyò ǎpwa̤ alô̤mô̤̌. 19He kè̌ lò̤jû̌kè mî̌, no sǎlě̤sǎlò̤ tǎ̤ he khuwè̤ dǒ a lòhǎlòhônu tǎ̤mǎ̤. He ma̤si bǎ asî tôcǒ tô̤̌ bǎbǎkǎlè asî sǎkhwè̌bò he. Dǒ he sǎplǎ̤ akhû̌khî dě no sǎlě̤sǎlò̤ tǎ̤ asî tǎ̤mǎ̤ nî̌. b 20Asî hî̌bǎ lô̌khô ta̤pè̤̌ta̤dû tô̤̌. Asî glè̌ ma̤ lòhǎlòhô pwa̤mô̤nǐ̤ ta̤pè̤̌ta̤dû dǒ shigǎ akûnu. 21Asî kè̌lǎnè̌ lô̌khô he ta̤sǔ, dě a hî̌ kû̌, “Hǎhǎ, na ma̤ ta̤ pa kè̌shǐ kû̌ pamǐ̤sǎ.” 22Ǒ Cǒmara tûjû̌pwa̤, na kè̌shǐ htobò ta̤hǒo hǒ. Dò̌ tûklû̌ tǎ̤mǎ̤. Ǒ Běcǎdû̌, wîkè tǎ̤ he mǎ̤. 23Ǒ he Cǒmaradû̌, he Běcǎdû̌, kè̌mò̌, htǒǐmò̌ hekhû̌. Ma̤mò̌, hî̌lṳ̌mò̌ kòyò kû̌ he ta̤sǔ ô̌ tôcǒ tô̤̌nu. 24Ǒ Cǒmara tûjû̌pwa̤, he Cǒmaradû̌, na ta̤cǒta̤tè̤ akhû̌akhî, shôbǐǐlṳ̌ bǎ kòyò kû̌ he ta̤sǔô̌ tôcǒ꤮ tô̤̌nu. No sǎlě̤, no sǎlò̤ tǎ̤ he kû̌ pwa̤sǎkhě he tokhlǒ mǎ̤. 25No hî̌ tǎ̤ asî kû̌, “Trǔ, pasǎlěsǎlò̤ lǒbehtò̌ mî̌ca hǒ,” pô̤̌nu tǎ̤mǎ̤. No hî̌tǎ̤ asî kû̌, “Pa ma̤tṳ̌kè bò lû̌û hǒ” pô̤̌nu tǎ̤mǎ̤mǎ̤. 26Kòyò dǒ a sǎlě̤sǎlò̤ bǎ he kè̌shǐtṳ̌bǎ kû̌ ta̤pò̤̌ta̤sha akhanu, no shòwò̤̌ mǐ̤sǎphû̌mò̤̌ bò asî nî̌. Kòyò dǒ a phî̌htò̌yô̤̌ anǎ̤ dǒ hekhû̌ tokhlǒnu, no kè̌shǐtṳ̌bǎ asî ta̤mi̤sǎpî̌ kû̌ ta̤shòwò̤̌ nî̌. 27Kòyò dǒ a htǒǐ hekhû̌, a gǔ sǎlě̤sǎlò̤ sǎwǐsǎshô̌ shû̌shû̌ bò pû nî̌꤮. “Cǒmara tûjû̌pwa̤ wô̌ pwǐtènu, htû̌sò̌htò̌ lô̌khô a. “A sǎyṳ dǒ apwa̤ma̤ta̤phû̌ gǔ ô̌mô̤ô̌bǎ,” pṳ̂̌plǎplǎ asî gǔ hî̌ lô̌khô pô̤̌nu nî̌꤮. 28Pô̤̌nukhû̌khî, Cǒmara cǒtè̤ pwǐtènu, he gǔ shôbǐǐlṳ̌ bǎ kòyò. He gǔ htû̌sò̌htò̌ na tônǐ̤mṳ̌hǎ pě.
Copyright information for
KxfSCKXF