Psalms 36
Kòyòhǎkhû̌phû̌ ata̤sǔ kû̌ Cǒmara ata̤wô̌
Cǒmara tûjû̌pwa̤ apwa̤ma̤ta̤phû̌ Khwǐdawi̤ ata̤sǎwǐ htû̌sò̌htò̌. Ta̤sǎwǐ numî̌ pwa̤sǎwǐ ta̤ tokhlǒ aikǒlǒkò kû̌ ta̤lṳhtò̌hôkû tôpwa̤ aya.
1Kòyò dǒ a ma̤takǎshǔ ta̤ tokhlǒnu ta̤phû̌mò̤̌shǐhtô ô̌ dǒ lû̌sǎphlǒgîkû dě a noshû̌ lû̌û. Asî gènè̤ lô̌khô kû̌ lǎ̤lṳ̂ ǐsha bè̌dubè̌nǎ̤ Cǒmara tô̤̌. a 2A gènè̤dû̌ gènè̤htò̌yô̤̌ǐ talû̌ shû̌lě anǎ̤ akhû̌akhî, a kè̌shǐ lò̤jò pe ata̤sǔta̤plě nutokhlǒ tô̤̌. Tô̤̌mî̌ a sǎkhě lò̤jò pe ata̤sǔ tô̤̌tô̤̌. 3Ata̤hî̌buhî̌bǎnu còcè̌ ta̤phû̌mò̤̌shǐhtô, ta̤lòhô pwǎ. A wîkèbò ta̤sî̌ta̤jò̌, ta̤ma̤wô̌ta̤. 4Bǎ a hǎmôô̌ dǒ lǎ̤dakhû̌ akhanu bǎbǎ, a tayè̤lò̤nǎ lǎ̤ma̤ còcè̌ ta̤phû̌mò̤̌shǐhtô. A ma̤ pè̤̌jò ta̤wô̌ tôcǒ꤮ tô̤̌. A wîkè ta̤phû̌mò̤̌shǐhtô tô̤̌tô̤̌.Cǒmara tûjû̌pwa̤ ata̤wô̌
5Ǒ Cǒmara tûjû̌pwa̤, nata̤mô̤ dǒ ahǎbòjò tô̤̌nu adû̌ asô̌sô̌kû̌ mǒkhû̌. Nacǒkû̌ nayô̤̌ nî̌ alè̤̌ asô̌sô̌kû̌ mǒlǎ̤. 6Na ta̤tě̤ta̤mè̤̌nu asô̌sô̌kû̌ khôlôdû̌khôlôhtû. Nata̤ma̤tôma̤bǎnu asô̌sô̌kû̌ shidû̌te̤we̤ ayô̤̌ gutṳ̌. Ǒ Cǒmara tûjû̌pwa̤, na kè̌khwè̌ǐ wô̌bǎ kòyò hǎkhû̌phû̌ kû̌ ta̤phû̌ta̤li̤. 7Ǒ Cǒmaradû̌, nata̤mô̤ dǒ ahǎbòjò tô̤̌nu alě̤dû̌pwî̤htû mî̌ca. Kòyòhǎkhû̌phû̌ lǒ̤bò hèô̌ tûdûǐ dǒ naô̌ sô̌sô̌kû̌ shîmǒ̤ tugutakaǐ aphû̌ dǒ adî̌gelǎ̤. 8Asî ǎkǒôbe, shǎǎshǎô ô̌lǒô̌be dǒ nahǐkûnu. Na dǐô asî shi lǒbe kû̌ na ta̤wî̤ta̤wô̌ dǒ nashilǎ̤gǎkûnu. 9Na mî̌ shihǎhtò̌ dǒ a ǐ kòyò ta̤htûpwa̤ tôpwa̤. Dǒ nata̤lî akhû̌akhî, pa kè̌shǐ jò ta̤lî hǒ. 10Tûlû̌ mô̤nṳ̌ pô̤̌ pwa̤ dǒ a sî̌ganǎ̤ nanu kû̌ na ta̤mô̤ dǒ ahǎbòjò tô̤̌nu. Tûlû̌ ǐ na ta̤cǒta̤tè̤nu kû̌ kòyòcǒkòyòtè̤nu. 11No hèshě tǎ̤ kòyòbè̌htò̌yô̤̌ anǎ̤ nutokhlǒ kû̌ he mǎ̤. No wṳ̂̌khlè̌kè tǎ̤ kòyòkhu phû̌mò̤̌ nutokhlǒ kû̌ he mǎ̤. 12Kè̌mò̌ lô̌khô, kòyòkhu phû̌mò̤̌ lò̤khǔpo̤ hǒ. Kòyò wîlò̤tě̤ kè asî dě asî ihtǒbò̌ pe tô̤̌ hǒ.
Copyright information for
KxfSCKXF