Psalms 37

Kòyòkhu phû̌mò̤̌ kû̌ Kòyòwô̌ aklè̌ gutṳ̌

Khwǐdawi̤ ata̤sǎwǐ htû̌sò̌htò̌

1Dǒ kòyòkhu phû̌mò̤̌ akhû̌akhî, sǎphlǒdû̌ sǎphlǒpî̌ tǎ̤mǎ̤.

Dǒ kòyò ma̤ ta̤sǔta̤plě akhû̌akhî, sǎkhwè̌ khû̌khwè kòyò tǎ̤mǎ̤.

2Tôshò̌phû̌ akû nô̤̌, asî nôkè sô̌sô̌kû̌ mi̤mṳ̌ pě.

Hěpě, asî khwesi kèbò sô̌sô̌kû̌ sǒdosǒlǎ pě.

3Yṳ̌ǎnṳ̌ Cǒmara tûjû̌pwa̤, ma̤ lô̌khô ta̤wô̌.

Nṳ̌ô̌ bǎ gǎ dǒ a ǐ na dě ô̌ kû̌ ta̤sǎphlǒ gûjû̌kabǎ nî̌.

4Sǎlě̤sǎlò̤ dǒ Cǒmara tûjû̌pwa̤ akû.

A ǐ tûû̌ na sǎphlǒ ata̤sǎlě̤sǎlò̤ pě.

5Ǐlò̤ bò na ta̤ô̌htûpwa̤ dǒ Cǒmara tûjû̌pwa̤ acǔdekû.

Nǎla̤ǐ a dě a ma̤jè̌ tûû̌ na pě.

6A glè̌ no lîhtò̌ na ta̤cǒta̤tè̤nu pô̤̌ lṳ̌mṳ̌lîbû.

A gǔ no kakhahtò̌ na ta̤ma̤tôma̤bǎnu pô̤̌ lṳmṳ̌sha.

7Sǔtukǔkǔ ô̌ pû dǒ Cǒmara tûjû̌pwa̤ alô̤mô̤̌, ô̌pǒ̤ sǎphlǒhtû dǒ a gǔ ma̤ bǎ na.

Bǎ kòyòphû̌mò̤̌ dû̌yò̤̌htò̌sa kû̌ asîklè̌asîklò akhanu bǎbǎ, bǎ asî ta̤yè̤lò̤nǎ glè̌ ma̤phû̌mò̤̌ û̌ kòyò htûhtò̌bò akhanu bǎbǎ, sǎphlǒdû̌ sǎphlǒpî̌ tǎ̤mǎ̤mǎ̤.

8Dǐô̌kǔkè na ta̤sǎphlǒdû̌, cû̌tephekè kû̌ ta̤sǎphlǒdû̌.

A no ma̤ còcè̌ pwǎ na ta̤phû̌mò̤̌shǐhtô akhû̌akhî, sǎphlǒdû̌ sǎphlǒpî̌ pe tǎ̤mǎ̤.

9Kòyòkhu phû̌mò̤̌ tokhlǒnu a hǎmǎ pě.

Kòyò dǒ a kè̌shu nǎla̤ǐ Cǒmara tûjû̌pwa̤ nî̌ asî gǔ nǐ̤bǎ shigǎ dǒ Cǒmara olò̤nǐ̤ asî nupě. ^a

10Bǎ tôshò̌phû̌ akû nô̤̌ pě, kòyòkhu phû̌mò̤̌ nutokhlǒ hǎmǎbò pě.

Na kè̌lǎ takǎ asî bǎbǎ, na kè̌shǐjò pe asî tô̤̌.

11Kòyò dǒ a shò̌lò̤ asǎphlǒ tokhlǒnu, shigǎ gǔ htû asî û̌cata̤bǐ. ^b

A nǐ̤bǎ ta̤ô̌mô̤ô̌bǎ pṳ̂̌ tôcǒ dǒ Cǒmara ǐ nupě.

12Kòyòkhu glè̌ ma̤phû̌mò̤̌shǐhtô lô̌khô kòyòsǎphlǒwô̌.

A ǎmṳ akhǎ.

13Bǎbǎkǎlè Běcǎdû̌ sî̌ganǎ̤ kû̌ kòyò glè̌ cî̌htò̌ asî alṳmṳ̌ni̤ phǔhtò̌hǒ akhû̌akhî, Běcǎdû̌ sǎyî̤̌ pwǎ kòyòphû̌mò̤̌ nutokhlǒ.

14Kòyòkhu phû̌mò̤̌ tokhlǒ, pô̤̌khô a gǔ ma̤si kòyò hǎwě̤shèwè̤, kòyò shôdô ta̤ma̤jè̌, kòyòcǒkòyòtè̤ tokhlǒ ayanu, a phǐhtò̌ nǎ atòdǔ hǒ, a yè̤htò̌ nǎ hto akhlǐ hǒ.

15Bǎbǎkǎlè asî gǔ shusi ge tîkhî sô̌ kû̌ anǎ̤.

Asî khlǐ bǎbǎ kòyò yǒlagǎ kèbò pě.

16Kòyò sǎphlǒwô̌ ata̤dû̌yò̤̌htò̌sa tîkî̌ phû̌pwǎnu, awô̌ khlo pe kû̌ kòyòphû̌mò̤̌ ǎpwa̤ ata̤dû̌yò̤̌htò̌sa.

17Ma̤titèhî̌dě Cǒmara tûjû̌pwa̤ yǒlagǎkèbò kòyòphû̌mò̤̌ tokhlǒ acǔgô̌ pě.

A ma̤jè̌ kòyò sǎphlǒwô̌ pě.

18Cǒmara tûjû̌pwa̤ sî̌ganǎ̤ kòyò dǒ ata̤sǔ ô̌tô̤̌ nutokhlǒ alṳmṳ̌ni̤.

Asî û̌tě̤û̌ca ô̌měô̌gle wô̌ tûjû̌pwa̤ pě.

19Bǎ gǎpò̤̌gǎsha akha bǎbǎ, asî lǎ̤sòwò̤̌ alǎ̤ ô̌tô̤̌.

Bǎ gǎwǐ̤gǎkodû̌ akha bǎbǎ asî ǎkǒôbe pě.

20Kòyòkhu phû̌mò̤̌ dě asi ahǎmǎ kèbò pě.

Pwa̤sǎkhě Cǒmara tûjû̌pwa̤ hǎmǎ kèbò pô̤̌ mi̤phô ô̌ dǒ doklakhû̌nu pě.

Asî hǎmǎ kèbò sô̌sô̌kû̌ mî̌khǔ pě.

21Kòyòkhu phû̌mò̤̌nu a phî̌bǒ kòyòta dě a ǐ tîkhî kòyò tô̤̌.

Kòyò sǎphlǒwô̌nu a ǐ kòyò dě a sǎleǐ tîkhîtô̤̌.

22Kòyò dǒ Cǒmara tûjû̌pwa̤ ǐshôwî̤ lû̌û tokhlǒnu, shigǎ nî̌ a gǔ htû lû̌û û̌cata̤ya.

Kòyò dǒ Cǒmara tûjû̌pwa̤ ǐsho lû̌û tokhlǒ dě kòyò gǔ wṳ̂̌htò̌cû̌tepheyî̤ kè asî.

23Cǒmara tûjû̌pwa̤ nè̌klè̌nè̌klò kòyò dǒ a mô̤nǐ̤ lû̌û nutôpwa̤ khǎlǎ lǎ̤kha.

A sǎphlǒtô lû̌û klè̌.

24Cǒmara tûjû̌pwa̤ pṳ̂̌měǐ a kû̌ acǔde akhû̌akhî, a htò̌tukhu bǎbǎkǎlè a lò̤khǔpo̤ tô̤̌. ▼

▼Hǒtôplô yô̤̌mûyô̤̌sǎ mî̌ a cû̌tûlû̌ klè̌ bǎbǎkǎlè a cû̌tǒ̤ bǎ klè̌sǔklè̌bǎ tô̤̌.

25Dǒ he phijǎkha tǒ̤htû̌ he mǒ̤pwǎ̤ khònò̤̌, kòyò sǎphlǒwô̌ tokhlǒ bǎbǎ, aphû̌ali̤ tokhlǒ bǎbǎ, Cǒmara tûjû̌pwa̤ wîkè asî dě a cû̌kwiǎ kòshǎnu, he kè̌shǐ nô̌ tôkhò̌ tô̤̌.

26Pṳ̂̌plǎplǎ a sǎyṳ ǐ shû̌ kòyò, a dǐbǒpè̤̌kwe kòyò ru, dě Cǒmara ǐshowî̤ aphû̌ali̤.

27Wîkèbò ta̤phû̌mò̤̌shǐhtô, ma̤ lô̌khô ta̤wî̤ta̤wô̌, dě sî ô̌ bǎ gǎkû tûjû̌pwa̤ pě.

28Cǒmara tûjû̌pwa̤ mô̤nǐ̤ ta̤ma̤tôma̤bǎ, a wîkè nô̌ akòyòcǒkòyòtè̤ tô̤̌.

A tugutakaǐ asî tûjû̌pwa̤.

Kòyòkhu phû̌mò̤̌ aphû̌ali̤ tokhlǒ khû̌dayadě kòyò gǔ wṳ̂̌hǎhtò̌cû̌ tapheyî̤ kè asî.

29Kòyò sǎphlǒwô̌ tokhlǒnu, shigǎ nunî̌ a gǔ htû aû̌tě̤û̌ca.

A ô̌ bǎnu tûjû̌pwa̤ talakhǎ pě.

30Kòyò sǎphlǒwô̌ hî̌bǎ còcè̌ pwǎ ta̤sî̌ta̤jò̌, ^d

A hî̌ǐ còcè̌ pwǎ ta̤tôta̤bǎ.

31A Cǒmaradû̌ ta̤sû̌ta̤tòwò ô̌měô̌gle dǒ asǎphlǒkû.

A cû̌ klè̌ dě a lò̤khǔpo̤ tô̤̌.

32Kòyòkhu phû̌mò̤̌ glè̌ dò kòyò sǎphlǒwô̌ aklè̌.

A kè̌lǎ ma̤siǐ asî.

33Bǎbǎkǎlè Cǒmara tûjû̌pwa̤ wîkè kòyòcǒkòyòtè̤ dǒ kòyòhe acǔdekû tô̤̌.

Bǎ asî tǒ̤dǒ ta̤cî̌htò̌gûlǎ̤ akhapěnu, kòyò cî̌htò̌ padô̌ asî tô̤̌tô̤̌.

34Ô̌pǒ̤kè̌shuǐ Cǒmara tûjû̌pwa̤, pṳ̂̌měǐ ta̤sû̌ǐtòwòǐ.

Cǒmara tûjû̌pwa̤ gǔ phî̌htò̌yô̤̌ na pě, a ǐ na shigǎ dǒ a gǔ htû na û̌cata̤bǐnu pě.

Na kè̌shǐ kòyò wṳ̂̌hǎhtò̌cû̌ tapheyî̤ kòyòkhu phû̌mò̤̌ nutokhlǒ pě.

35He kè̌shǐ kòyòkhu phû̌mò̤̌, kòyòkhu kòyòhe dǒ a cǔshokhò̌sho tôpwa̤ sô̌sô̌kû̌ sǒmṳ̌dû̌tònò dô̌htò̌ tûû̌ dǒ aphǎkhû̌nu.

36Bǎbǎkǎlè tashò̌phû̌ akûnô̤̌, a sikè, a hǎmǎkè pě.

He kè̌lǎ a bǎbǎkǎlè he kè̌shǐ jò pe a tô̤̌.

37Gènè̤kè̌ lô̌khô kòyò lǎ̤pè̤̌wǎ̤ ta̤sǔ ô̌ tô̤̌ kû̌ kòyòcǒkòyòtè̤ nu.

Asî mî̌ asǎphlǒwô̌, a sǎdôhôbǐ dǒnô̌khîkò pěnu a ô̌mô̤ô̌bǎ pě.

38Bǎbǎkǎlè lǒ̤bò ta̤sǔphû̌ tokhlǒnu a gǔ pî̌kè bò pě.

Dǒ nô̌kò gutṳ̌ pě, kòyòkhu phû̌mò̤̌ tokhlǒ a gǔsigǔhǎmǎ lǒ̤bò.

39Cǒmara tûjû̌pwa̤ ma̤hǎplǎge kòyò sǎphlǒwô̌.

Bǎ asî kè̌shǐtṳ̌bǎ kû̌ ta̤pò̤̌ta̤sha akhanu, a mî̌ asî lǎ̤ô̌tûdû dǒ aměagle.

40Asî hèô̌tûdû lô̌khô anǎ̤ dǒ Cǒmara tûjû̌pwa̤ a ô̌ akhû̌akhî, a ma̤jè̌ asî, a ma̤hǎplǎge asî.

A ma̤hǎplǎkè asî dǒ kòyòkhu phû̌mò̤̌ acǔdekû dě a takabǐnṳ̌ asî.