Psalms 38

Khwǐdawi̤ ata̤htû̌sò̌htò̌, ata̤gènè̤htò̌ ta̤lṳhtò̌hô

Khwǐdawi̤ ata̤sǎwǐ htû̌sò̌htò̌. Bǎ akwisǎyṳhtò̌ Cǒmara akhanu, a sǎwǐ ta̤sǎwǐ hǒ tôshǒ.

1Ǒ Cǒmara tûjû̌pwa̤, bǎ na sǎphlǒdû̌ akhanu, sǎhtǎdû̌da tǎ̤ he mǎ̤.

Bǎ na sǎphlǒdû̌ akha bǎbǎ, plè tǎ̤ he mǎ̤.

2Na plǎ̤ hèshunṳ̌ bòkè dǒ he yî̌kû, na shò̌lò̤ he hǒ.

3Dǒ na ta̤sǎphlǒdû̌ akhû̌akhî, asha mǔsipwǐ̤ bò henǎ̤ tôpwa̤bò.

Dǒ he ta̤sǔ akhû̌akhî, he nǎ̤glǒ tôpwa̤bò ashǐashabò.

4He ta̤sǔta̤plě htò̌plǒbǐbò he sô̌sô̌kû̌ ta̤wǐta̤ò̌ dǒ ahtǒnu.

Ahtǒ talû̌ shû̌lě dǒ heya.

5Dǒ he ma̤takǎ tûû̌ heya akhû̌akhî, he ta̤sha tokhlǒ amisu dě anusokèbò hǒ.

6Ashajî̌shajû̌ mî̌ca he akhû̌akhî, he û̌jûgrû mè̤̌caca.

Hehǎhewô tônǐ̤mṳ̌hǎ.

7A shakhwǐshakhû̌ bò he kòtadǎ.

Asha mǔsipwǐ̤ bòkè henǎ̤ tôpwa̤bòw.

8Hekhû̌ǎ yû̌lò̤bò kè hǒ, he lò̤gǎmǔbò kè hǒ.

He sǎphlǒgû̌ sǎphlǒgè̌ mî̌ca akhû̌akhî, he kookasha hǒ.

9Ǒ Běcǎdû̌, he sǎlě̤ sǎyṳ kwè̌ mî̌titènu, na sî̌ganǎ̤ bò hǒ.

Na ganǎ̤de bò hto he ta̤kookasha hǒ.

10Agû̌agè̌ mî̌ca he sǎphlǒ, hekhû̌heǎ ô̌ pe tô̤̌tô̤̌.

Akhǐ bò he mǐ̤sǎ hǒ.

11Dǒ he ta̤sha akhû̌akhî, he khôbǒsû̌sî, he khôsî cû̌ kèbò helǎ̤ hǒ.

He khlilè phǔtinǐ̤ bǎbǎ, a cû̌ô̌ tepheyî̤kè bò kû̌ he hǒ.

12Kòyò dǒ a kè̌lǎ ma̤si he tokhlǒ dò lô̌khô ta̤dònǎ.

Kòyò dǒ a sǎyṳ ma̤bǎ he tokhlǒ hî̌pî̌hî̌lṳ̂̌ bò he.

Pṳ̂̌ni̤ni̤ a glè̌ma̤ lòhǎlòhô lô̌khô pwǎ he.

13Bǎbǎkǎlè he sô̌sô̌kè kû̌ kòyò koo dǒ a ganǎ̤de pe asî ta̤hî̌bǎ tô̤̌.

He sô̌sô̌kè kû̌ kòyòpè̌ dǒ a hî̌shǔ jò pe asî tô̤̌.

14He htûhtò̌ kòyò dǒ a ganǎ̤de tôcǒ tô̤̌, a htè̌shěshu jò tôcǒ tô̤̌nu hǒ.

15Ǒ Cǒmara tûjû̌pwa̤, he dô̌yṳ̂̌ǐ na.

Ǒ Běcǎdû̌ mî̌ he Cǒmaradû̌, na hî̌bǎshěshu mè̤̌caca he pě.

16He hî̌ kû̌, “Bǎ he lò̤khǔpo̤lò̤ akhanu, no sǎlě̤ tǎ̤ asî mǎ̤, kè̌ mè̤̌tô̤̌dě no bè̌dû̌bè̌htò̌lǒ tǎ̤ asînǎ̤ dǒ hekhû̌ mǎ̤.”

17He glè̌ htò̌tukhu lò̤khǔpo̤ hǒ, dě asha꤮ gudǔdǔ he nǎ̤.

18He olò̤wǎ̤lò̤ he ta̤sǔta̤plě.

He sǎplǎ̤ǐ tûû̌ he ta̤ma̤shǔ hǒ. ^a

19Pwa̤sǎkhě he tokhlǒ a ô̌shû̌ô̌mô̤, akhû̌ǎshû̌sho gutṳ̌.

Ta̤we̤ta̤kè ô̌ tôcǒ tô̤̌ bǎbǎkǎlè kòyò dǒ a sǎphlǒdû̌ tônô̤ henu a ô̌wô̤̌ô̌dû̌ gutṳ̌.

20Bǎ he gû̌kû̌ ta̤wî̤ta̤wô̌ akhanu, asî dô̌ he yô̤.

He ma̤ asî dǒ ta̤twî̤ta̤wô̌ bǎbǎkǎlè asî ma̤geshěshu he kû̌ ta̤phû̌mò̤̌shǐhtô. ^b

21Ǒ꤮ Cǒmara tûjû̌pwa̤, wîkè tǎ̤ he mǎ̤.

Ǒ꤮ he Cǒmaradû̌, ô̌tepheyî̤ tǎ̤ kû̌ he mǎ̤.

22Ǒ꤮ Běcǎdû̌, pwa̤ma̤hǎplǎge he, hè ma̤jè̌ phwèmò̌ he nî̌꤮.