Psalms 42
Lî̤htû̌sû̌htò̌ ginǐ̤bǎ tôbǎ
(Htû̌sò̌htò̌ 42-72)
Ta̤kè̌shǔnǎla̤ǐ Cǒmara ata̤ma̤jè̌ bǎ ta̤pò̤̌ta̤sha akla
Ta̤sǎwǐ numî̌ pwa̤sǎwǐ ta̤tokhlǒ aikǒlǒkò dǒ ta̤lṳhtò̌hôkû tôpwa̤ aya. Hebrǔyô̤̌nu, a kaǎ ta̤sǎwǐnu tôtô̤̌ kû̌ Masakǐla ta̤sǎwǐ dǒ Phakû̌ri akhlialè tokhlǒ sǎwǐnu.
1Ǒ Cǒmaradû̌, pô̤̌ tikhi sǎwǐ̤sǎô jî̌jî̌ shi dǒ shilô̤̌kû nu, he nǎsǔǐ jòjî̌ na tô̤̌. 2He nǎsǔ jî̌jî̌ Cǒmaradû̌. Cǒmaradû̌ dǒ a htûpwa̤ hǒtôpwa̤, he hècaba bò̌ dǒ nalô̤mô̤̌ bǎkhòtèpě? 3He lǎ̤ǎlǎ̤ô mî̌ a ô̌ pwǎtǒ̤ he mǐ̤sǎshi, he hǎ lṳ̌mṳ̌khǐkhǐ lṳmṳ̌shasha. Tônǐ̤mṳ̌hǎ asî hî̌ bò he kû̌, “Ma̤titè̌ na Cǒmaradû̌ ma̤jè̌ na tô̤̌?” 4Bǎ he gènè̤bǎ sô̌ dǒawǐkha sǎdôdô he cû̌htò̌nṳ̌ wô̤̌wô̤̌ kû̌ kòyò saprṳ̂ tokhlǒ dǒ Cǒmara ata̤lṳhtò̌hôkû, bǎ pa ma̤ ta̤ǎcuôcu lṳmṳ̌ni̤dû̌htû dě he sǎlě̤sǎlò̤ hî̌bwǐhî̌sîrî sǎwǐhtûsò̌htò̌ kû̌ kòyò saprṳ̂dû̌ tokhlǒ akhanu, he sǎplǎ̤ mǐ̤sǎshilò̤. 5Ǒ he cû̌ sǎplǎ̤ jî̌jî̌ ma̤titè? He cû̌ gû̌gè̌ ma̤titè? Tûlû̌ kè̌shuǐ Cǒmaradû̌nu, he gǔ htû̌sò̌htò̌ sô̌ Cǒmaradû̌ dǒ amè̤̌ pwa̤ma̤hǎplǎnu. 6Ǒ he Cǒmaradû̌, he sǎplǎ̤nǎbǎ jî̌jî̌, he ô̌ dǒ gǎ bǎ Jòda shidû̌shite̤we̤ kòshî̌, Heramû khôlôkhi kû̌ Mǐsara khôlôkhi dě he gènè̤htò̌bǎ na. 7Na shipě̤tě̤ pwe̤rupwe̤tè̌nu a pwe̤nǎ̤sǎgô̌, a ma̤shû̌shǎ jî̌jî̌ hesǎphlǒ. Na no sǎplǎ̤nǎ̤bǎ he asô̌sô̌kû̌ shipěpǒdû̌ hèhô̌bǐ bò he. 8Bǎ lṳmṳ̌sha akhanu, Cǒmara tûjû̌pwa̤ gǔ dǔlṳ̌ ata̤mô̤̌ dǒ ahǎbòjò tô̤̌nu. Bǎ lṳmṳ̌khǐ akhanu, he sǎwǐhtò̌ Cǒmaradû̌. A mî̌ pwa̤ ǐ he ta̤htûpwa̤ tôpwa̤. 9He gǔ hî̌ he Cǒmaradû̌ dǒ a htû he lǒ̤dû̌ lǎ̤ô̌hǔnu kû̌, “Na cû̌ pò̤̌yǎ̤pò̤̌sha he ma̤titè? “Ma̤titèdě pwa̤sǎkhě he tokhlǒ ma̤numa̤cî̌ ma̤hǎ he ma̤titè?” 10Pwa̤sǎkhě he tokhlǒ hî̌jî̌hî̌jû̌ he, asha jî̌ he sǎphlǒ. Tônǐ̤mṳ̌hǎ asî hî̌ bò he kû̌, “Ma̤titè̌ na Cǒmaradû̌ ma̤jè̌ na tô̤̌?” a 11Ǒ he cû̌ sǎplǎ̤nǎbǎ jî̌jî̌ ma̤titè? He cû̌ gû̌gè̌ jî̌jî̌ ma̤titè? Tûlû̌ kè̌shuǐ Cǒmaradû̌ nu, he gǔ htû̌sò̌htò̌ sô̌ Cǒmaradû̌ dǒ a ma̤hǎplǎkè he, a mî̌ he Cǒmaradû̌ nutôpwa̤.
Copyright information for
KxfSCKXF