Psalms 43
Ta̤kè̌shunǎla̤ǐ Cǒmara ata̤ma̤jè̌ bǎ ta̤pò̤̌ta̤sha akû ▼▼(lî̤htû̌sû̌htò̌ hǒtôshǒ mî̌ a icu hè lû̌û kû̌ lî̤htû̌sû̌htò̌ 42)
1Ǒ꤮ Cǒmara pwe̤ǐlṳ̌ mò̌ kòyò kû̌ he ta̤sǔ ô̌tô̤̌. Hî̌bǎtakabǐ bǎ mò̌ he kû̌ kòyò dǒ a sî̌ganǎ̤ kû̌ kòyò Cǒmara tô̤̌ nutokhlǒ dò̌ he ta̤sǔnu. Na mî̌ Cǒmaradû̌ dǒ a takabǐǐ he tôpwa̤ akhû̌akhî, ma̤hǎplǎkè mò̌ he dǒ kòyò lòhǎlòhò, kòyòkhu phû̌mò̤̌ acǔdekû. 2Ma̤titèdě na cû̌wîkè he ma̤titè? Ma̤titèdě pwa̤sǎkhě he tokhlǒ bǎ ma̤numa̤cî̌ ma̤hǎ he ma̤titè? 3No lîlṳ̌htò̌ pè̤̌mò̌ he kû̌ na ta̤lî, no nè̌klè̌nè̌klò mò̌ he kû̌ na ta̤tě̤ta̤mè̤̌. Sûcû̌nǐ̤ he dǒ nakhôlôplò̌shǐ alô̤ bǎ nalǎ̤ô̌ agûlǎ̤ nutôkû. 4He gǔ hè dǒ Cǒmaradû̌ ata̤lṳhtò̌wǎ̤ ô̌ nupe, Cǒmaradû̌ mî̌ he ta̤sǎlě̤sǎlò̤, he ta̤sǎlě̤mô̤. He gǔ tôglô̌ tǐtutegwe, sǎwǐhtûsò̌htò̌ Cǒmaradû̌, he Cǒmara. 5Ǒ꤮ he cû̌ sǎplǎ̤ gutṳ̌ ma̤titè? He cû̌ gû̌gè̌ gutṳ̌ ma̤titè? Tûrû̌꤮ kè̌shuǐ Cǒmaradû̌ nu, he gǔ htû̌sò̌htò̌ sô̌ Cǒmaradû̌ dǒ a ma̤hǎplǎkè he, amî̌ he Cǒmaradû̌ nutôpwa̤.
Copyright information for
KxfSCKXF