Psalms 45
Khwǐkhômò̤̌ alṳmṳ̌ni̤ ata̤sǎwǐ
Ta̤sǎwǐ numî̌ pwa̤sǎwǐ ta̤tokhlǒ aikǒlǒkò dǒ ta̤lṳhtò̌hôkû nutôpwa̤ aya. Hebrǔyô̤̌nu, a kaǎ ta̤sǎwǐ nutôtô̤̌ kû̌ Masakǐla ta̤sǎwǐ dě ta̤sǎwǐ nutôtô̤̌ mî̌ a ǐ kòyò ta̤sî̌yaphlôphǎ dě Phakû̌ri akhlialè tokhlǒ sǎwǐ lû̌û. Dě tôbǎ sǎwǐ sô̌sô̌kû̌ ta̤sǎwǐ dě ami̤ kû̌ ta̤phôta̤gî̌ nutôshǒ. Dě numî̌ ta̤khòmò̤̌ ata̤sǎwǐ.
1He sǎphlǒ nî̌ a lǒbe kû̌ yô̤̌sǎ dǒ awî̤awô̌. He sǎwǐhtò̌ bǎ lî̤hǎwô tôshǒ dǒ khwǐ aya. He noǎ he lě̤ dǒ anǐ̤ sô̌sô̌kû̌ pwa̤wě̤lî̤ dǒ asî̌ajò̌ tôpwa̤ noǎ alî̤bô. 2Dǒ kòyòhǎkhû̌phû̌ aphû̌pwa̤khû aklanu na phatwè̤̌ gutṳ̌, na mî̌ pwa̤ dǒ a hî̌bǎmô̤ hî̌bǎnǐ̤ mî̌caca tôpwa̤. Pô̤̌nukhû̌khî, Cǒmaradû̌ ǐshowî̤ na tûjû̌pwa̤. 3Ǒ kliphû̌ dǒ ashû̌shosî̌jò̌, shenṳ̌ mò̌ na nò̌shî dǒ na wǎ̤tě̤lô̤nu. Dǔṳ̌htò̌ mò̌ na ta̤sîrîdû̌sîrîhtû, na ta̤pô̤ta̤phǎ. 4Dò̌nǐ̤ mò̌ na tîsî̌, ma̤pè̤̌kè mò̌ pwa̤sǎkhě na nu. Takatě̤tṳ mò̌ ta̤cǒta̤tè̤, ta̤shò̌lò̤sǎphlǒ, ta̤cî̌htò̌tôbǎ agûlǎ̤ nutôkhô. Na cǔtûmû dǒ asîrîshû̌shonu a dǔlṳ̌htò̌hto na ta̤ma̤ dǒ atirǐsò̌ hǒ. 5Na plǎ̤ nî̌ shěhtònṳ̌ bò mò̌ dǒ pwa̤sǎkhě khwǐ asǎphlǒkû. Khlilèphû̌ tokhlǒ lò̤jû̌kè bò dǒ nalô̤mô̤̌ hǒ. 6Ǒ Cǒmara nashinagǎ ô̌yî̤ pû tûjû̌pwa̤ talakhǎ nî̌. Na pǒǐ pû na kòyò kû̌ ta̤cǒta̤tè̤ nî̌. a 7Na mô̤nǐ̤ ta̤ dǒ atôabǎ, na sǎkhî̌ ta̤ dǒ asǔ. Pô̤̌nukhû̌khî, Cǒmara dǒ amè̤̌ na Cǒmaradû̌ rû̌htò̌ na, a no dû̌khlohtûkhlo na kû̌ nasû̌nakhô dě a ǐhto na ta̤sû̌mô̤sò̌mô̤. b 8Na jejûhtû lǒ̤bò tokhlǒnu, a nṳ̌mû̌ sô̌sô̌kû̌ ta̤numû̌ dǒ kòyò kaǎ kû̌ Mǔra, Alǔsha kû̌ sǒnumû̌. Khwǐhô tokhlǒ nî̌ kòyò ma̤wî̤tè̤̌sî̌ a kû̌ kòshò sèmè̤̌, ta̤dǒta̤ǔ pwe̤htò̌ dǒ khwǐhô tokhlǒ akû dě a ma̤ sǎlě̤ na. 9Pwa̤mǒ̤ dǒ na bè̌dû̌ǐ yǎ dě a ô̌ dǒ nahôkû akla tokhlǒkhlǒ nu, khwǐ tokhlǒ aphû̌pwa̤mǒ̤ ô̌pa pa. Na khòmò̤̌phû̌mǒ̤ ihtǒô̌ dǒ na cǔtûmû, a tîwî̌htò̌ǐ anǎ̤ kû̌ Ò̌phǐrǎgǎ htawî̤tè̤̌sî̌. 10Ǒ khòmò̤̌phû̌mǒ̤, ganǎ̤de, dò̌nò̌ku, gènè̤tě̤mè̤̌, shôpe̤nǎkè mò̌ na khlilè kû̌ na phakhlilènu. 11Na ta̤wî̤ta̤wô̌ nî̌ ahtěnǐ̤cî̌nǐ̤ khwǐsǎphlǒ. A mî̌ na běcǎ akhû̌akhî, bè̌dubè̌nǎ̤ mò̌ a. 12Wî̤̌htarû̌ phû̌mǒ̤ phǐhènǐ̤ sû tôcǒ pě. Kòyòdû̌yò̤̌htò̌sa sǎyṳ no kè̌dû̌ǐ anǎ̤ kû̌ na pě. 13Khòmò̤phû̌mǒ̤ ô̌ dǒ khwǐhôkû, amǒ̤wî̤tè̤sî̌ jî̌jî̌. Aje nî̌ abǒhtò̌ còcè̌ kû̌ hta. 14Ǒ khwǐdû̌, khòmò̤̌phû̌mǒ̤ sô̌htò̌nṳ̌ je dǒ asa wî̤awô̌, kòyò sûnṳ̌ yǎ dǒ naô̌. Pwa̤sû khòmò̤̌phû̌mǒ̤ dǒ a gû̌ kû̌ lû̌û tokhlǒ gû̌ hè dǒ akò, kòyò kaǎnṳ̌ asî dǒ na ô̌ô̌. 15Kòyò sûhènṳ̌ asî kû̌ ta̤mô̤sû̌mô̤sò̌, ta̤sǎlě̤sǎlò̤, asî hènṳ̌ lô̌khô dǒ khwǐhôkû. 16Naphû̌khûsî tokhlǒ gǔ htûhtò̌bò ikǒlǒkò̌dû̌ dǒ na phiphu sîtokhlǒ agûlǎ̤. Na gǔ no asî kû̌ pwa̤pǒ hǎkhû̌ taběbò. 17He no gènè̤htò̌bǎ kòyò tokhlǒ kû̌ lǒ̤bò na ma̤ hto ta̤ dǒ adû̌ayô̤̌ nutokhlǒ pṳ̂̌tôhtu pě. c Pô̤̌nukhû̌khî, kòyò htû̌sò̌htò̌ na tûjû̌pwa̤ talakhǎ pě.
Copyright information for
KxfSCKXF