Psalms 49

Nǎla̤ǐ tǎ̤ ta̤dû̌yò̤̌htò̌sa mǎ̤

Phakû̌ri akhlialè tokhlǒ ata̤sǎwǐ htû̌sò̌htò̌. Dě ta̤sǎwǐ numî̌ pwa̤sǎwǐ ta̤tokhlǒ aikǒlǒkò kû̌ ta̤lṳhtò̌hôkûnu tôpwa̤ aya.

1Ǒ꤮ khlilèphû̌ lǒ̤bò sî, ganǎ̤de lô̌khô.

Kòyò ô̌ dǒ hǎkhû̌ lǒ̤bò sî, dò̌ sînò̌kulǎ.

2Kòyò shû̌shokhò̌sho bǎbǎ, khû̌shiǎjǎ bǎbǎ, kòyòshèwè̤ bǎbǎ, kòyòdû̌yò̤̌ bǎbǎ ganǎ̤de lô̌khô.

3He hî̌bǎ ayô̤̌ dǒ alǒbe kû̌ ta̤sî̌ta̤jò̌.

He sǎphlǒ ata̤gènè̤ tokhlǒnu aphlôaphǎ.

4He gǔ tô̤ǐphǐnṳ̌ pwa̤sî̌jò̌yô̤̌.

He dǒ tǐtutegwe dě he gǔ shôbǐǐlṳ̌ bǎ kòyò kû̌ heyô̤̌sǎkhěkhô̌ yô̤̌mûyô̤̌sǎ.

5Bǎ ta̤pò̤̌ta̤sha hèbǎ he akha bǎbǎ, kòyò ta̤sǔta̤plě ô̌ tokhlǒ ata̤ma̤jî̌ma̤jû̌ kòyònu a ô̌te̤we̤ he akha bǎbǎ he cû̌ ǐsha pe ma̤titè?

6Kòyò nutokhlǒ mî̌ pwa̤ dǒ a sǎmǒhtò̌ ǐtûû̌ ata̤dû̌yò̤̌htò̌sa.

A htû̌sò̌ǐ dû̌ ata̤dû̌yò̤̌htò̌sa nutokhlǒ.

7Kòyò dǒ a ma̤hǎplǎge bò̌ kòyò ta̤htûpwa̤nu a ô̌ tôpwa̤ tô̤̌.

Dǒ kòyò tôpwa̤ ta̤htûpwa̤ ayanu, a ǐ bò̌ Cǒmaradû̌ alě̤apwe̤ tô̤̌.

8Ta̤htûpwa̤ alě̤apwî̤nu apwî̤dû̌ mî̌ca, kòyò ma̤hǎplǎge bò̌ kû̌ ru tôkhò̌ tô̤̌.

9Pô̤̌khô kòyò tôpwa̤ gǔ ô̌htûpwa̤ bò̌ tûjû̌pwa̤, a glè̌pî̌glè̌sokè tô̤̌ ayanu, kòyò ma̤hǎplǎge bò̌ kû̌ ru tôkhò̌ tô̤̌. ^a

10Kòyò pṳ̂̌tôpwa̤ kè̌shǐ tě̤tě̤mè̤̌mè̤̌ kû̌ kòyò dǒ a sî̌khû̌sî̌jò̌ tokhlǒ mî̌ a si nò pwǎ.

Kòyòkě tokhlǒ bǎbǎ, kòyòpè̌ tokhlǒ bǎbǎ, a bǎ si nò pwǎ.

Asî lǒ̤bò nî̌ a bǎ dò̌kè ata̤dû̌yò̤̌htò̌sa dǒ kòyò ashǔshawa̤ ayapwǎ.

11Asî hǎkhû̌ tokhlǒnu a ô̌ ǐ kû̌ asîmi̤ tokhlǒ bǎbǎ, asî lṳ̌kû tokhlǒnu mî̌ asî hǐ tûjû̌pwa̤ talakhǎ.

Asî lǎ̤ô̌ agûlǎ̤nu a htûkè asî phû̌li̤ lǎ̤ô̌ tûjû̌pwa̤ talakhǎ.

12Kòyò dû̌yò̤̌htò̌sa tôpwa̤ mî̌ mî̌ a ô̌yî̤ jò bǎ hǎkhû̌nu tûjû̌pwa̤ tô̤̌.

Asî sô̌sô̌kû̌ ta̤phû̌ta̤wè̤ dǒ a si kèbònu.

13Kòyò ǒò̌ dǒ a yṳ̌ǎ tûû̌ anǎ̤ nutokhlǒ bǎbǎ, kòyò dǒ a sǎphlǒpa kû̌ asî nutokhlǒ bǎbǎ, htû̌ asî klè̌ gutṳ̌ hî̌pě, a htûhtò̌ pô̤̌nu pěpě.

14Lṳ̌gǎnǎdo kè̌pǒ̤ǐ tûû̌ asî pô̤̌ pwa̤kè̌sû̌phû̌, asî bǎ si sô̌sô̌bò pô̤̌ sû̌phû̌.

Lṳmṳ̌lî akha kòyòcǒkòyòtè̤ pǒǐ asî pě.

Asî nǎ̤glǒ glè̌lǒso kèbò dǒ lṳ̌gǎnǎdo bǎ a ô̌tapheyî̤ kû̌ asîhǐphò.

15He khû̌dayadě Cǒmaradû̌ ma̤hǎplǎge he ta̤htûpwa̤ dǒ lṳ̌gǎnǎdo asîrîshû̌sho acǔdekû pě, a kaǎge he dǒ aô̌ pě.

16Bǎ kòyò tôpwa̤pwa̤ dû̌yò̤̌ dě ata̤dû̌yò̤̌htò̌sa tokhlǒ sǔ sǔ a ô̌dû̌htò̌ akhanu, sǎplǎ̤ tǎ̤ tôcǒ mǎ̤.

17Bǎ a si akhanu, a phǐcû̌nṳ̌jò nô̌ tôcǒ tô̤̌. ^b

Ata̤dû̌yò̤̌htò̌sanu a gû̌ cû̌jò nô̌ a dǒ lṳ̌kû tô̤̌.

18Bǎ a ô̌htûpwa̤ akha a sǎphlǒmô̤ jî̌jî̌ anǎ̤, kòyò htû̌sò̌ǐ a bǎbǎkǎlè, 19a gǔ si sô̌sô̌ kû̌ pwǎ amǒ̤phaphiphusî dǒwǐkha, a lò̤tě̤ kè dǒ ta̤khǐsiwi̤ agûlǎ̤ tûjû̌pwa̤ pě.

20Kòyò tôpwa̤pwa̤ dǒ a htû̌sò̌ ǐtûû̌ ata̤dû̌yò̤̌htò̌sa, a sî̌yaphlôphǎ gû̌ kòyò tô̤̌ tôpwa̤pwa̤nu, apî̌alṳ̂̌ sô̌sô̌kû̌ ta̤phû̌ta̤wè̤ pě.