Psa 53 | KxfSCKXF | STEP | Ta̤sǎwǐ numî̌ pwa̤sǎwǐ ta̤ tokhlǒ ikǒlǒkò dǒ ta̤lṳ̌htò̌hôkû nutôpwa̤ aya. Khwǐdawi̤ ata̤sǎwǐ nutôshǒ mî̌ dǒ Hebrǔyô̤̌nu, a kaǎ lû̌kû̌ Masakǐla ta̤sǎwǐ, dě ta̤sǎwǐ nutôshǒ mî̌ a ǐ kòyò ta̤sî̌yaphlôphǎ. Dě bǎ sǎwǐ sô̌sô̌kû̌ mahalasa ta̤sǎwǐ. Kòyò phuhtò hî̌ lô̌khô dǒ asǎphlǒkû kû̌, “Cǒmara ô̌tô̤̌.” Asî ata̤bè̌sû̌bè̌sǎ mî̌ aphû̌mò̤̌shǐhtô, ata̤phǐta̤ma̤ mî̌ aphû̌mò̤̌. Dǒ asî akla nu, a ma̤ ta̤wô̌ ô̌pe tôpwa̤ tô̤̌.

Psalms 53

Kòyòhǎkhû̌phû̌ ata̤phû̌mò̤̌shǐhtô

Ta̤sǎwǐ numî̌ pwa̤sǎwǐ ta̤ tokhlǒ ikǒlǒkò dǒ ta̤lṳ̌htò̌hôkû nutôpwa̤ aya. Khwǐdawi̤ ata̤sǎwǐ nutôshǒ mî̌ dǒ Hebrǔyô̤̌nu, a kaǎ lû̌kû̌ Masakǐla ta̤sǎwǐ, dě ta̤sǎwǐ nutôshǒ mî̌ a ǐ kòyò ta̤sî̌yaphlôphǎ. Dě bǎ sǎwǐ sô̌sô̌kû̌ mahalasa ta̤sǎwǐ.

1 Kòyò phuhtò hî̌ lô̌khô dǒ asǎphlǒkû kû̌, “Cǒmara ô̌tô̤̌.”

Asî ata̤bè̌sû̌bè̌sǎ mî̌ aphû̌mò̤̌shǐhtô, ata̤phǐta̤ma̤ mî̌ aphû̌mò̤̌.

Dǒ asî akla nu, a ma̤ ta̤wô̌ ô̌pe tôpwa̤ tô̤̌. ^a

2 Pô̤̌khô Cǒmaradû̌ glè̌ sî̌ganǎ̤ kû̌ kòyò dǒ a ô̌htûpwa̤ tě̤tě̤mè̤̌mè̤̌, kòyò dǒ a kè̌lǎ lû̌û ô̌ ya mî̌ ô̌tô̤̌yanu, a ô̌ dǒ mǒkhû̌ kè̌lò̤ kòyò hǎkhû̌phû̌. ^b

3 Bǎbǎkǎlè kòyò pṳ̂̌꤮ tôpwa̤ cû̌tephe bò kû̌ Cǒmaradû̌ alǎ̤.

Asî htûhtò̌bò kòyòphû̌mò̤̌ pṳ̂̌꤮ tôpwa̤.

Kòyò dǒ a ma̤ ta̤wô̌nu a ô̌pe tôpwa̤꤮ tô̤̌, bǎ tôkǔtôpwa̤ nô̤̌nu a ô̌ tô̤̌. ^c

4 Cǒmaradû̌ gwè̌ kû̌, “Kòyòphû̌mò̤̌ mî̌ a kè̌lǎ sî̌ya gû̌ kò tôkhò̌꤮ tô̤̌ yahî̌?

“Asî ě ǎbò he kòyò dǒ a ganǎ̤de heyô̤̌ sô̌sô̌kû̌ a ǎ mû̌. ^d

“Asî kwicabahtò̌ he tôkhò̌꤮ tô̤̌.” ^e

5 Ta̤sǎgònò̤̌ ǐsha ô̌ tôcǒ꤮ tô̤̌ bǎbǎkǎlè asî ǐsha mî̌ca pě.

Cǒmaradû̌ ma̤lûpò̌lûshe pwa̤sǎkhě na tokhlǒ akhwǐakrû̌ pě.

A wîkè asî akhû̌akhî, na ma̤sòwò̤̌bò asî pě.

6 He kwicaba lǒ̤sǔlǒ̤sò̌ kû̌ ta̤ma̤hǎplǎge dǒ Isôrě̤laphû̌ aya, a ô̌ dǒ Sǐû khôlôkhû̌ hèlò̤ tûû̌ pě.

Htû̌꤮ Cǒmaradû̌ kaǎge plǒbò sô̌ akòyò dǒ kòyò pṳ̂̌cû̌kè lû̌û nutokhlǒ akhapěnu, Phayakò akhlialè sǎlě̤sǎlò̤ pě, Isôrělaphû̌ sû̌mô̤sò̌mô̤ pě.