Psalms 57
Ta̤kwicaba dǒ ta̤ma̤jè̌ aya
(Shamuěla awǐlǒ tôbǎ 22:1, 24:3)
Ta̤sǎwǐ numî̌ pwa̤sǎwǐ ta̤ tokhlǒ aikǒlǒkò dǒ ta̤lṳta̤htò̌hôkû nutôpwa̤ aya. Dě bǎ sǎwǐ sô̌sô̌kû̌ Khwǐdawi̤ ata̤sǎwǐ dǒ ami̤ kû̌, ma̤pî̌kè ta̤ma̤ nutôkǔ. Dǒ Hebrǔyô̤̌ nu, a kaǎ ta̤sǎwǐnu kû̌ mî̌katama ta̤sǎwǐ. Dě a sǎwǐ bǎ a hǎhtò̌kè Khwǐshò̌lǔ alǎ̤ dě a cû̌ô̌ dǒ lǒ̤kû akhanu.
1Ǒ Cǒmaradû̌, gwèbǎǐ mò̌ he. He hèô̌tûdûbǐ dǒ naô̌ akhû̌akhî, gwèbǎǐ mò̌ he. He ô̌tûdûbǐ henǎ̤ dǒ na dî̌gelǎ̤ tǒ̤dǒ꤮ ta̤pî̌ta̤lṳ̂̌ hètûlû̌kè. 2He kwisǎyṳhtò̌ Cǒmara dǒ adû̌ahtû gutṳ̌ dǒ a ma̤lǒma̤be bǎ he ta̤yè̤lò̤nǎ nutôpwa̤ a ô̌. 3A ô̌ dǒ mǒkhû̌ dě a ma̤jè̌lò̤ he, a ma̤hǎplǎge he. A ma̤sòwò̤̌kè kòyò dǒ a hèshě henu. Cǒmaradû̌ dǔlṳ̌ he kû̌ ata̤mô̤ dǒ ahǎbòjò tô̤̌, a cǒ kû̌ ayô̤̌ pe. 4He khuwè̤ dǒ a sô̌sô̌kû̌ khî, ô̌tewe̤bò he hǒ. He hǎmôô̌lò̤ dǒ kòyò sǎyṳ pî̌sûklûnṳ̌ he nutokhlǒ akla. Asî khû̌khinu asô̌sô̌kû̌ sòbò kû̌ plǎ̤. Asîplî̤nu a sô̌sô̌ kû̌ nò̌shî dǒ ahtòwô̌bǎ. 5Ǒ Cǒmaradû̌, nasîrîdû̌sîrîhtû lîkakhahtò̌ pû dǒ mǒkhû̌ nî̌. Nata̤sîrîpô̤phǎ bebò pû hǎkhû̌nu nî̌. a 6Bǎ he hǎhtò̌cû̌ akha pô̤̌khô asî gǔ pṳ̂̌nṳ̌ he ayanu, asî dònǎbò ta̤dò. Ajî̌ajû̌ agû̌agè̌ jî̌jî̌ he. Asî pho hǎkûyô̤̌ dǒ heklè̌dakû, asî lò̤tě̤ tûû̌ sô̌ kû̌ anǎ̤. b 7Ǒ꤮ Cǒmaradû̌, he yṳ̌ǎnṳ̌ pwǎtǒ̤ na nô̤̌ pwǎ. He gǔ sǎwǐ htû̌sò̌htò̌ǐ pwǎ na pě. He yṳ̌ǎnṳ̌ pwǎtǒ̤ na nô̤̌pwǎ. c 8Ǒ꤮ hesǎphlǒ, ihtǒ mò̌. Ǒ tǐtubǔ kû̌ tǐtute̤gwesî, shî̌nǎ mò̌. Ǒ lṳmṳ̌lî, bûhè mò̌. 9– 10Ǒ꤮ Běcǎdû̌, na ta̤mô̤ dǒ ahǎbòjò tô̤̌nu adû̌ sô̌sô̌kû̌ mǒkhû̌. Na ta̤cǒ kû̌ nayô̤̌nu alè̤̌ sô̌sô̌kû̌ mǒlǎ̤. Pô̤̌nukhû̌khî, he gǔ hî̌bwǐhî̌sîrî na dǒ khlilèphû̌ tokhlǒ akla. He gǔ sǎwǐhtûsò̌htò̌ na dǒ kòyò mṳ̌plô̤̌ tokhlǒ akla. d 11Ǒ Cǒmaradû̌, nasîrîdû̌sîrîhtû lîkakhahtò̌ pû dǒ mǒkhû̌ nî̌. Na ta̤sîrîpô̤phǎ lǒbe pû hǎkhû̌nu nî̌.
Copyright information for
KxfSCKXF