Psalms 59

Ta̤kwicaba dǒ ta̤takabǐnǐ̤ aya

(Shamuěla awǐlǒ tôbǎ 19:11)

Ta̤sǎwǐ numî̌ pwa̤sǎwǐ ta̤ tokhlǒ aikǒlǒkò dǒ ta̤lṳhtò̌hôkû nutôpwa̤ aya. Dě bǎ sǎwǐ sô̌sô̌kû̌ khwǐdawi ata̤sǎwǐ dǒ ami̤ kû̌, ma̤pî̌kè ta̤ma̤ nutôkǔ. Dǒ Hebrǔyô̤̌nu, a kaǎ cû̌ô̌pǒ̤ akliphû̌ tokhlǒ kû̌ khûdawi̤ ahǐ, dě a no ma̤sikè lû̌ akhanu, a sǎwǐ ta̤sǎwǐ nutôkǔ.

1Ǒ꤮ he Cǒmaradû̌, ma̤hǎplǎge mò̌ he dǒ pwa̤sǎkhě he tokhlǒ acǔdekû.

Takabǐǐ he kû̌ kòyò dǒ a hèshě he nutokhlǒ.

2Ma̤hǎplǎge mò̌ he kû̌ kòyò dǒ a ma̤ ta̤phû̌mò̤̌shǐhtô.

Ma̤hǎplǎgeǐ he kû̌ pwa̤ma̤sima̤hǎmǎ kòyò nutokhlǒ acǔdekû.

3Kè̌mò̌, asî gǔ ma̤si he ayanu, a ô̌pǒ̤kè̌jô lô̌khô he.

Pwa̤ma̤jî̌ma̤jû̌ kòyò tokhlǒ cû̌ htû̌sò̌bǎ kaǎplǒbò kòyò dǒ a glè̌ hèshě henu.

Ǒ Cǒmara tûjû̌pwa̤, he cû̌tûlû̌khatûlû̌ bǎ na ta̤ tôkhò̌꤮ tô̤̌.

He ma̤sǔ nô̌ ta̤ tôcǒ꤮ tô̤̌tô̤̌.

4Heta̤sǔta̤plě ô̌ tôcǒ꤮ tô̤̌ bǎbǎkǎlè asî ô̌tî̌wî̌tòwò kû̌ a glè̌ hèshě he.

Ma̤mò̌, ma̤jè̌mò̌ he, ô̌pǒ̤ kè̌mò̌.

5Ǒ꤮ Cǒmara tûjû̌pwa̤, Cǒmaradû̌ dǒ a pǒ ta̤ lǒ̤bò amè̤̌kû̌ Isôrě̤laphû̌ a Cǒmaradû̌, ma̤mò̌, cî̌htò̌ mò̌ lǒ̤꤮ bò kòyò khlilèphû̌ dǒ a yṳ̌ǎ gû̌ kòyò Cǒmaradû̌ tô̤̌ nutokhlǒ.

Gwèbǎǐ tǎ̤ pwa̤ma̤ ta̤phû̌mò̤̌shǐhtô nutokhlǒ tîkî̌꤮ mǎ̤.

6Asî getîkhî bǎ lṳmṳ̌khǐ pô̤lô̤̌.

A gaya̤ sô̌sô̌kû̌ htwǐ.

A cû̌lèkè̌ te̤we̤ wî̤̌.

7Asî hî̌bǎbǐ hî̌bǎô̌ akhû̌phě hětènu ganǎ̤de mò̌.

Asîplî̤nu a htò̌wô̌bǎ sô̌sô̌kû̌ nò̌shî.

Asî shò̌tò̤̌ kû̌ kòyò ganǎ̤de nô̌ asî tôpwa̤꤮ tô̤̌. ^a

8Bǎbǎkǎlè, ǒ Cǒmara tûjû̌pwa̤, na sǎyǎ̤takǎ pwǎ asî.

Na pîjî̌kè lǒ̤bò khlilèphû̌ dǒ a yṳ̌ǎ Cǒmara tô̤̌nu. ^b

9Ǒ꤮ Cǒmaradû̌, na mî̌ hekhû̌heǎ, he ô̌pǒ̤kè̌shuǐ na.

Na mî̌ he lǎ̤ô̌tûdûbǐ agûlǎ̤.

10He Cǒmaradû̌ dǒ a mô̤nǐ̤ he kû̌ ta̤mô̤ dǒ ahǎbòjò tô̤̌nu a gǔ hèma̤jè̌ he.

Cǒmara no kè̌shǐ he kû̌ he khuwè̤ tokhlǒ lò̤jû̌kè.

11Ǒ꤮ pa Běcǎdû̌ dǒ amè̤̌ helǎ̤ taka, ma̤sikè tǎ̤ asî tôplǎ nô̤̌mǎ̤.

Hî̌pě he kòyò tokhlǒ shepe̤ kèbò na cî̌htò̌ pwa̤sǎkhě na tokhlǒ hětènu hè̌.

Noǎ na ta̤sîrîpô̤phǎ, ma̤lûpò̌lûshe bòmò̌ asî.

Ma̤pî̌ma̤lṳ̂̌ kèbò mò̌ asî.

12Asî hî̌bǎ ta̤nu, còcè̌꤮ asǔaplě.

Asî bè̌htò̌mǒ asǎphlǒ dǒ asô̌sô̌kû̌ kòyò ma̤nǎ ta̤dò, no po̤bǎ sô̌ tûû̌ kû̌ asî nî̌.

13Asî ǐsho lòhǎlòhô akhû̌akhî, sǎphlǒdû̌, ma̤pî̌ bòmò̌ asî.

Ma̤tṳ̌ma̤plě kèbò asînu.

Ma̤hî̌nudě kòyò ô̌ dǒ hǎkhû̌nu pṳ̂̌tôpwa̤ gǔ sî̌ganǎ̤ kû̌ Cǒmaradû̌ pǒǐ Phayakò akhlialè.

14Asî getîkhî bǎ lṳmṳ̌khǐ pô̤lô̤̌.

A gaya̤ sô̌sô̌kû̌ htwǐ.

A cû̌lèkè̌ te̤we̤ wî̤̌.

15Asî lèpṳ̂̌ǎ lô̌khô ashǎ.

A kè̌ ǎkǒôbe tô̤̌ mî̌, a ǔmo̤.

16Bǎbǎkǎlè bǎ he tṳ̌bǎ kû̌ ta̤pò̤̌ta̤sha akhanu, na mî̌ wî̤̌dû̌ dǒ atònò, na mî̌ he lǎ̤ô̌tûdû.

Pô̤̌nukhû̌khî, he gǔ sǎwǐhtò̌ nakhû̌naǎ.

Lṳmṳ̌lî, he gǔ htû̌sò̌htò̌ na ta̤mô̤ dǒ ahǎbòjò tô̤̌.

17Ǒ Cǒmaradû̌, na mî̌ hekhû̌heǎ, he gǔ sǎwǐ htû̌sò̌htò̌ na.

Na mî̌ wî̤̌dû̌ dǒ atònò, Cǒmaradû̌ dǒ a mô̤ǐ mè̤̌caca he.