Psalms 61
Ta̤kwicaba dǒ ta̤takabǐǐ aya
Khwǐdawi̤ ata̤sǎwǐ htû̌sò̌htò̌. Ta̤sǎwǐ numî̌ pwa̤sǎwǐ ta̤ tokhlǒ aikǒlǒkò dǒ ta̤lṳhtò̌hôkû nutôpwa̤ aya. Bǎ sǎwǐ ta̤sǎwǐ akhanu, bǎ dǒ lû̌û kû̌ ta̤dǒta̤ǔ dǒ apli̤ô̌ tokhlǒ.
1Ǒ꤮ Cǒmaradû̌, ganǎ̤de mò̌ he ta̤kwigwèbǎǐhtò̌ na. Bè̌sû̌bè̌sǎ mò̌bǎ he ta̤kwicaba na. 2He ô̌ dǒ mǒdǎ kòshî̌ dě he kwisǎyṳhtò̌ na. He sǎphlǒ shuphǔshèwè jî̌jî̌ dě he kwisǎyṳhtò̌ na hǒ. Sûhtò̌mò̌ he dǒ lǒ̤ htò̌yô̤̌ dǒ kòyò htò̌tǒ̤bò̌ tô̤̌ nutômè akhû̌. 3Na mî̌ he lǎ̤ô̌tûdûhǔbǐ sô̌sô̌kû̌ hǐhtûhtò̌yô̤̌lǒ atònòwô̌ lǎ̤takabǐǐ he kû̌ pwa̤sǎkhě he tokhlǒ akhû̌akhî, sûhtò̌mò̌ he. 4He sǎyṳô̌ dǒ na hǐphû̌kû tûjû̌pwa̤. He sǎyṳ ô̌tûdû dǒ na děgelǎ̤. 5Ǒ꤮ Cǒmaradû̌, na ganǎ̤de heta̤olò̤ hǒ. Na ǐ he û̌cata̤bǐ dǒ na gǔ ǐ kû̌ kòyò dǒ a ǐsha bè̌dubè̌nǎ̤ na nutokhlǒ hǒ. 6Dǐô̌htûpwa̤ nědû̌lahtû pû khwǐ. No ô̌htûpwa̤htû lṳmṳ̌ni̤ lṳmṳ̌sa tôhtu hto tôhtu. 7A glè̌ pǒǐ tûû̌ dǒ Cǒmaradû̌ alô̤mô̤̌ tûjû̌pwa̤ nî̌. No tòkòtakabǐ pû a kû̌ na ta̤mô̤ dǒ ahǎbòjò tô̤̌ kû̌ na ta̤jûkû̌yô̤̌ nunî̌. 8Pô̤̌nudě he sǎwǐ htûsòhtò̌ pû nami̤ tûjû̌pwa̤. Tôni̤ hto tôni̤, he gǔ ma̤lǒbe pû he ta̤olò̤ pě.
Copyright information for
KxfSCKXF