Psa 64 | KxfSCKXF | STEP | Khwǐdawi̤ ata̤sǎwǐ htû̌sò̌htò̌. Ta̤sǎwǐ numî̌ pwa̤sǎwǐ ta̤tokhlǒ aikǒlǒkò dǒ ta̤lṳhtò̌hôkû nutôpwa̤ aya. Ǒ꤮ Cǒmaradû̌, ganǎ̤de mò̌ he ta̤kiǐkoo kwihtò̌ na. Takaǐ he dǒ pwa̤sǎkhě he tokhlǒ ata̤ma̤sǎgònò̤̌ ǐsha henu.

Psalms 64

1 Ǒ꤮ Cǒmaradû̌, ganǎ̤de mò̌ he ta̤kiǐkoo kwihtò̌ na.

Takaǐ he dǒ pwa̤sǎkhě he tokhlǒ ata̤ma̤sǎgònò̤̌ ǐsha henu.

2 Takabǐǐ he kû̌ kòyò dǒ a glè̌ma̤ phû̌mò̌shǐhtô he, kòyò phû̌mò̤̌ nutokhlǒ asaprṳ̂kû.

3 Asî wṳ̂̌htòǐ lô̌khô aplî̤ sô̌sô̌kû̌ nò̌shî.

Asî hî̌bǎkhu yô̤̌sǎ phû̌mò̤̌shǐhtô sô̌sô̌kû̌ kòyò khǎhè plǎ̤.

4 Asî ô̌hǔ kè̌jôkhǎ kòyò dǒ ata̤sǔ ô̌tô̤̌nu.

A khǎ asî tôplǎ nô̤̌, a ǐsha bǎ tô̤̌. ^a

5 Asî gǔ tîwî̌tòwò ma̤phǔmò̤̌ ta̤ ayanu, a ǐkhû̌ǐǎ kè̌khî lû̌û tôpwa̤ kû̌ tôpwa̤.

Asî hî̌bǎǐ lû̌û kû̌ glè̌dò ta̤dònǎ.

Asî hî̌ kè̌khî lû̌û kû̌, “Mò̌pè kè̌shǐjò pa ya?”

6 Asî tîwî̌tòwònǎ ta̤phû̌mò̤̌shǐhtô.

Dě a hî̌ lô̌khô kû̌, “Pa ta̤tîwî̌tòwònǎnu awô̌ jî̌jî̌.”

Kòyòhǎkhû̌phû̌ sǎphlǒ kû̌ ta̤gènè̤ tokhlǒmî̌ adû̌ayô̤̌, asî̌ya pò̤̌mǔpò̤̌sha.

7 Cǒmaradû̌ glè̌ khǎ asî kû̌ aplǎ̤.

Tôplǎnô̤̌ asî bǎkamǎ bò pě.

8 Asî ta̤hî̌bǎ nî̌ a glè̌ ma̤pî̌kè bò sô̌ asî pě.

Lǒ̤bò kòyò dǒ a kè̌shǐ asî tokhlǒ pî̤jî̌ sǎyǎ̤bò asî pě.

9 Kòyò pṳ̂̌tôpwa̤ ǐshabò pě.

Asî shôbǐǐlṳ̌ Cǒmaradû̌ ata̤ma̤ pě.

Asî glè̌ sî̌yaphlôwô̌ Cǒmaradû̌ ma̤ hto ta̤nu.

10 Dǒ Cǒmara tûjû̌pwa̤ akhû̌akhî, kòyòcǒkòyòtè̤ lǒ̤bò sǎlě̤sǎlò̤ pě.

Asî ô̌tûdûbò dǒ lû̌ô̌ pě.

Kòyò sǎphlǒwî̤ sǎphlǒwô̌ htû̌sò̌htò̌ lû̌û pě.