Psalms 65
Ta̤htû̌sò̌htò̌ kû̌ ta̤hî̌bwǐhî̌sîrî
Khwǐdawi̤ ata̤sǎwǐ htû̌sò̌htò̌. Ta̤sǎwǐ numî̌ pwa̤sǎwi, ta̤tokhlǒ aikǒlǒkò dǒ ta̤lṳhtò̌hôkû tôpwa̤ aya.
1Ǒ Cǒmaradû̌, pa ô̌ sǔtǔkǔ, htû̌sò̌htò̌ na dǒ Sǐû khôlôkhû̌. Pa ma̤lǒma̤be bò pata̤olò̤ nutokhlǒ pě. 2Na mî̌ pwa̤ dǒ a ganǎ̤de kòyò ta̤kwicabahtò̌. Kòyò pṳ̂̌tôpwa̤ glè̌ hèbò dǒ naô̌ pě. 3Pata̤sǔta̤plě pè̤̌ǎ bòkè pa. Bǎbǎkǎlè na plûkè bò pa ta̤sǔta̤plě. 4Kòyò dǒ na rû̌htò̌ asî, na no ô̌ asî dǒ na gûlǎ̤ plò̌shî̌kû tokhlǒnu, a nǐ̤bǎ ta̤ǐshôwî̤. Pa glè̌ sǎphlǒtô sǎphlǒbǎ bò kû̌ ta̤wô̌ ô̌ dǒ nahǐ amè̤̌kû̌ na ta̤lṳhtò̌hô aplò̌shǐ nutômè akû pě. 5Ǒ꤮ Cǒmaradû̌, pwa̤ma̤hǎplǎ pa, na ganǎ̤de pa ta̤kwicaba. Na ma̤hǎplǎkè pa kû̌ ta̤ǒò̌ kiti̤kaa. Kòyò ô̌ dǒ hǎkhû̌ gûlǎ̤ pṳ̂̌tôkû tokhlǒ bǎbǎ, a ô̌ tǒ̤dǒ shidû̌te̤we̤ dǒ ayô̤̌gutṳ̌ tokhlǒnu bǎbǎ, a kè̌shu nǎla̤ǐ lô̌khô tǒ̤꤮ na nô̤̌pwǎ. 6Na bô̌lò̤ khôlô tokhlǒ kû̌ na ta̤sîrîpô̤phǎ. Na dǔlṳ̌htò̌ na siwi̤sòwò̤. 7Na ma̤sǔtukǔ kèbò shidû̌te̤we̤ pwe̤nǎ̤sǎgô̌. Na ma̤sǔkèbò shipěpǒdû̌ alě̤pwe̤shû̌. Na ma̤sǔkèbò kòyò ta̤ma̤ pwe̤rupwe̤tè̌. 8Kòyò dǒ a ô̌ dǒ hǎkhû̌běkhû̌ pṳ̂̌tôpwa̤ ǐsha bò na ma̤ ta̤cô̌klǐcô̌sè. Kòyò ô̌ dǒ lṳmṳ̌htò̌ tôkhô tokhlǒ bǎbǎ, dǒ lṳmṳ̌nṳ̌ tôkhô tokhlǒ bǎbǎ, a sǎlě̤sǎlò̤ sǎwǐhtûsò̌htò̌ na pě. 9Nakè̌pǒ̤ǐ hǎkhû̌, na no julò̤ gǎ. Na ma̤wî̤ma̤wô̌htò̌ dû̌wî̤ hǎplǒhǎyî̌. Cǒmaradû̌ ashilô̤̌mǒ̤ tokhlǒ lǒbe kû̌ shi. Na ǐ kòyò bǔhudî. Hǒomî̌ amè̤̌kû̌ ta̤ dǒ na tîwî̌tòwò bǎ hǎkhû̌ dǒ kòyòhǎkhû̌phû̌ aya. 10Na no julò̤ lǒbe gǎ dǒ lǎ̤hte hǔkla aya. Na no jucô̌pè̌è̌ kèbò hǎkhlǒ. Na no jubǔ bò hǎkhû̌. Na ǐshôwî̤ bò hǎkhû̌nu, na no sǎhtò̌phôhtò̌ bò sǒsusǒsǎ. 11Na ǐshowî̤ pa akhû̌akhî, pasǒsǎsǒphô nǐ̤dû̌wî̤. Na cû̌ bǎtètè̌ bǎbǎ, ta̤ pṳ̂̌tôcǒ ô̌lǒô̌be betǐpǐ. 12Mi̤mṳ̌bô dǒ gǎshashigǎkhû̌ sulahtò̌ wî̤tè̤̌sǐ. Na no sǎlě̤sǎlò̤ khôlô asô̌sô̌kû̌ kòyò hǎkhû̌phû̌ sǎlě̤sǎlò̤. 13Sû̌phû̌ kû̌ pè̤̌ tokhlǒ ô̌cû̌ bò dǒ mi̤khû̌. Bǔmṳ̌ tokhlǒ ô̌be bò dǒ lô̤̌te̤kû. Ta̤pṳ̂̌tôcǒ sǎlě̤sǎlò̤ yî̤̌kǒ sǎwǐhtûsò̌htò̌.
Copyright information for
KxfSCKXF