Psalms 68

Ta̤ma̤pè̤̌ lî̤sǎwǐ htû̌sò̌htò̌

Khwǐdawi̤ ata̤sǎwǐ htò̌sò̌htò̌. Ta̤sǎwǐ numî̌ pwa̤sǎwǐ ta̤tokhlǒ aikǒlǒkò dǒ ta̤lṳhtò̌hôkû nutôpwa̤ aya.

1Ǒ Cǒmaradû̌, ma̤mò̌, ma̤ lûcû̌peshe kèbò mò̌ pwa̤sǎkhě na.

No khlè̌htôkhlè̌lò̤ bòmò̌ na khuwè̤. ^a

2No khǔcû̌kè bò asî sô̌sô̌kû̌ mî̌khǔ khǔcû̌kè lǒ̤bònu.

No jûbǔlò̤kè bò asî sô̌sô̌kû̌ mî̌ u jûbǔbò tarabônu.

Kòjî̌kòjû̌ glè̌pî̌glè̌lṳ̂̌ bò dǒ Cǒmaradû̌ alô̤mô̤̌ nî̌.

3Bǎbǎkǎlè kòyòcǒkòyòtè̤ gǔ sǎlě̤sǎlò̤ pû nî̌꤮.

Asî sǎlě̤sǎlò̤ bò pû dǒ Cǒmaradû̌ alô̤mô̤̌ nî̌꤮.

Asî ô̌ còcè̌ pwǎ kû̌ ta̤sǎlě̤sǎlò̤ nî̌꤮.

4Sǎwǐhtò̌ Cǒmaradû̌, sǎwǐhtûsò̌htò̌ yǎ.

Htû̌sò̌htò̌ pwa̤ dǒ a dò̌ poǒlṳ̌ nutôpwa̤.

A mi̤ kû̌ Cǒmara tûjû̌pwa̤.

Pô̤̌nudě sǎlě̤sǎlò̤ lô̌khô dǒ alô̤mô̤̌nu.

5Cǒmaradû̌ ô̌ dǒ agûlǎ̤ plò̌shǐ.

A mî̌ phû̌ dǒ shôdôpha tokhlǒ apha, pwa̤ dǒ a tugǔtakaǐ pwa̤mǒ̤khwè̌.

6Kòyò dǒ a shôdôkhônu, Cǒmaradû̌ dǐô̌ bǎ lû̌û ahǐphû̌phòphû̌.

A kaǎhtò̌ kòyò lò̤tě̤ dǒ apô̤kû, a ǐ asî gûlǎ̤ dǒ a pi̤li̤mô̤.

Kòyò dǒ a shěshǔ Cǒmaranu a bǎ ô̌kè dǒ gǎshashigǎ.

7Ǒ꤮ Cǒmaradû̌, bǎ na cû̌wǐ dǒ nakòyò alô̤mô̤̌, na sûcû̌ tûlû̌ asî kû̌ gǎshashigǎkhû̌ akhanu, 8Hǎkhû̌ guyṳ̌ dě gǎ julò̤.

A htûhtò̌ pô̤̌nu bǎ na mî̌ Cǒmaradû̌, Îsôrěla a Cǒmaradû̌ hèlò̤ ô̌lṳ̌htò̌ dǒ Tǐnǎ khôlôkhû̌nu akha. ^b

9Ǒ꤮ Cǒmaradû̌ na no julò̤ lǒlǒbebe gǎ.

Na no sulahtò̌ sô̌ na shigǎkhwe dǒ na ǐ kû̌ na kòyònu.

10Na kòyò ô̌ lô̌khô bǎnu.

Ǒ Cǒmaradû̌, na sǎphlǒ wô̌ jî̌jî̌ akhû̌akhî, na kè̌pǒ̤ǐ kòyò dǒ kòyò pè̤̌ǎpè̤̌ô lû̌nu.

11Běcǎdû̌ hî̌bǎlò̤ ayô̤̌.

Pwa̤mǒ̤ saprṳ̂ cû̌lè shôbǐǐlṳ̌ peshecû̌bò ta̤sǎlě̤we̤kè awe̤akè.

12Khwǐ kû̌ akliphû̌ tokhlǒ hǎhtò̌khlè̌ lǒ̤bò.

Pwa̤mǒ̤ ô̌kè dǒ hǐ tokhlǒ bèpè̤̌bò ta̤phû̌ta̤li̤ dǒ a phǐgeǐ dǒ ta̤shěta̤pě̤ aklanu.

13Kòyò dǒ a hǎmôô̌lò̤ dǒ sû̌phû̌pô̤kû tokhlǒ aya bǎbǎ, timǐtitè nutokhlǒ mî̌ asô̌sô̌kû̌ he htû̌lǐ̤dî̌ge dǒ kòyò plṳ̌bǐ rakha sô̌sô̌kû̌ a kû̌ ru.

Ashû̌nu aplò̌kèshǐ sô̌sô̌kû̌ hta.

14Bǎ Cǒmara dǒ apô̤pwa̤shû̌sho nutôpwa̤ no lûcû̌peshe kèbò khwǐ tokhlǒ akhanu, asô̌sô̌kû̌ shicòlò̤ dǒ Salamû khôlôkhû̌nu.

15Basha khôlô mî̌ adû̌ahtû awî̤tè̤̌sǐlî..

Khôlô plǔhtò̌ tokhlǒ ô̌wô̤̌lî.

16Ǒ Basha khôlôdû̌ khôlôkhi sî, ma̤titè̌ na cû̌ sǎkhwè̌tǒ̤ khôlô dǒ Cǒmaradû̌ rû̌htò̌ kû̌ alǎ̤ô̌ nutômè hětè?

Cǒmara tûjû̌pwa̤ glè̌ ô̌ bǎnu tûjû̌pwa̤.

17Cǒmaradû̌ alô̤ lǎ̤htò̌shě ta̤shěnu a ô̌ dǒ asò̌ kû̌ asò̌, asî̌ kû̌ asî̌kû.

Běcǎdû̌ ô̌ dǒ Sǐnǎ khôlôkhû̌ dě a hèlò̤, a hènṳ̌ dǒ agûlǎ̤ aplò̌shǐ akû.

18Bǎ na gehtò̌ dǒ gûlǎ̤htò̌yô̤̌ akhanu, na pṳ̂̌cû̌nṳ̌ pwa̤sǎkhě na dǒ alò̤jû̌kè nalǎ̤ nutokhlǒ.

Kòyò dǒ a shěshǔ na nutokhlǒ bǎbǎ, na nǐ̤bǎ khû̌kǎ dǒ asîô̌.

Běcǎ Cǒmara tûjû̌pwa̤ gǔ ô̌ bǎ gûlǎ̤ nutôkû pěpě. ^c

19Htû̌sò̌htò̌ Běcǎdû̌ dǒ a ò̌bǎ pa ta̤wǐta̤ò̌ pṳ̂̌ni̤ni̤ nutôpwa̤.

A mî̌ Cǒmara dǒ a ma̤hǎplǎge pa.

20Pa Cǒmara mî̌ Cǒmara dǒ a ma̤hǎplǎge kòyò.

A mî̌ Cǒmara tûjû̌pwa̤, Běcǎdû̌ dǒ a ma̤hǎplǎge pa dǒ ta̤si.

21Cǒmaradû̌ glè̌ dephò̌ mè̤̌cacakè pwa̤sǎkhě a tokhlǒ a ikǒ.

A glè̌ demǔ mè̤̌cacakè kòyò dǒ a ma̤ kudǔdǔ ta̤sǔ nutokhlǒ aikǒkhwǐ.

22Běcǎdû̌ hî̌ kû̌, “He glè̌ kaǎge tîkhî sô̌ pwa̤sǎkhě he ô̌ dǒ Bashagǎ nutokhlǒ bǒo.

“He glè̌ kaǎge tîkhî sô̌ asî ô̌ dǒ shidû̌te̤we̤ yô̤̌kû.

23“Ma̤pô̤̌nudě na glè̌ cophrǒcû̌ bò asîsǐ.

“Na shǐ sîtokhlǒ gǔ hèlî̌ô bò asîsǐ.”

24Ǒ Cǒmaradû̌, kòyò kè̌shǐ bò na kòyòsaprṳ̂ sǎdôdô a cû̌htò̌nṳ̌wô̤̌wô̤̌ bòlû̌ûnu hǒ.

Kòyò kè̌shǐ bò he Cǒmara dǒ amè̤̌kû̌ he khwǐ, cû̌htò̌nṳ̌ dǒ gûlǎ̤ plò̌shǐkûnu.

25Pwa̤sǎwǐta̤ ô̌ dǒ alô̤mô̤̌, pwa̤dǒ ta̤dǒta̤ǔ ô̌ dǒ nô̌kò, aplǎkû dě pwa̤mǒ̤ phû̌sǎ tokhlǒ plǎ̤ǐ lô̌khô jî̌ja.

26Asî hî̌ kû̌, “Sǎwǐhtûsò̌htò̌ mò̌ Cǒmaradû̌ dǒ kòyòsaprṳ̂ alô̤mô̤̌nu.

“Îsôrěla aprṳ̂aphǎ sî, htû̌sò̌htò̌ mò̌ Cǒmara tûjû̌pwa̤.”

27Phabejame̤ dǒ akònònu akhlilè cû̌wǐ dǒ alô̤mô̤̌lǒ.

Htodě Phayǔda akhlialè aikǒlǒkò aprṳ̂aphǎ gû̌ kû̌ dǒ nô̌kò.

Htodě Phasabulû kû̌ Khûnatalǐ aikǒlǒkò gû̌ dǒ nô̌kò.

28Ǒ Cǒmaradû̌, no lò̤mò̌ na ta̤sîrîpô̤phǎ.

Bè̌lṳ̌mò̌ na ta̤sîrîpô̤phǎ dǒ a ma̤hto bǎ pa dǒ awǐkhanu.

29Khwǐ glè̌ phǐhènǐ̤ bǎ na sû dǒ Wî̤̌yarǔshale dǒ na ta̤lṳ̌htò̌hôkû.

30Sǎhtǎdû̌da mò̌ Ijǐgǎ dǒ asô̌sô̌kû̌ ta̤mi̤ta̤mò̤̌ ô̌ dǒ gôpô̤mṳ̌klanu.

Sǎhtǎdû̌da mò̌ khlilèphû̌ dǒ asô̌sô̌kû̌ pṳ̂̌pha saprṳ̂ ô̌ dǒ pṳ̂̌phû̌ akla nu.

Tûlû̌ tṳ̂mṳ̂̌ asî tǒ̤htû̌ a shò̌lò̤ asǎphlǒ, nohè lṳhtò̌ asî kû̌ ruyî̌ kû̌ hta.

Ma̤lûpò̌lûshe kèbò kòyò dǒ a sǎyṳshě sǎyṳpè̤̌ ta̤nu.

31Khwǐ akòyòdû̌ glè̌ ô̌ dǒ Ijǐgǎ hè.

Kǔshǎ khlilèphû̌ glè̌ bè̌dubè̌nǎ̤ Cǒmaradû̌, a glè̌ ǐ lû̌û sû.

32Ǒ shigǎ ô̌ bǎ hǎkhû̌ hǒtôbǎ sî, sǎwǐ htû̌sò̌htò̌ mò̌ Cǒmaradû̌.

Sǎwǐ htû̌sò̌htò̌mò̌ Běcǎdû̌.

33Htû̌sò̌htò̌ mò̌ Cǒmara dǒ a dò̌ cû̌tûlû̌nṳ̌ mǒlǎ̤ dǒ a ô̌ dǒwǐkha tǒ̤꤮ khònò̤̌ nutôpwa̤.

A hî̌bǎ pwe̤nǎ̤sǎgô̌ sô̌sô̌kû̌ shî̌lî̌.

34Pwe̤ǐ shôbǐǐlṳ̌ mò̌ Cǒmaradû̌ asîrîpô̤phǎ.

A pǒ ta̤ pô̤̌ khwǐ tôpwa̤ dǒ Isôrělaphû̌ akla.

Asîrîpô̤phǎ ô̌lṳ̌htò̌ dǒ mǒlǎ̤.

35Ǒ Cǒmaradû̌, dǒ nata̤lṳhtò̌hô aplò̌shǐ akûnu, a gònò̤̌gòglè ǐsha jî̌jî̌.

Îsôrěla a Cǒmaradû̌ ǐhto a kòyò tokhlǒ ata̤pô̤ta̤phǎ kû̌ ata̤khû̌ta̤ǎ.

Htû̌sò̌htò̌ mò̌ Cǒmaradû̌.