Psalms 69
Kwihtò̌ ta̤ma̤jè̌
Hǒomî̌ khwǐdawi̤ ata̤sǎwǐ. Dě ta̤sǎwǐ numî̌ pwa̤sǎwǐ ta̤ aikǒlǒkòdû̌ dě ta̤lṳhtò̌hôkû nutokhlǒ aya. Dě bǎ sǎwǐ sô̌sô̌kû̌ ta̤phôta̤gî̌ ta̤sǎwǐ nutôshǒ
1Ǒ꤮ Cǒmaradû̌, ma̤hǎplǎge mò̌ he. Shidû̌ htò̌tǒ̤ kè dǒ he gô̌bô hǒ. 2He lò̤tě̤ô̌tò̤̌ dǒ pèè̌kla. He khacû̌jò pe tô̤̌. He lò̤cǔnṳ̌kè dǒ shiyô̤̌ hǒ. Shidû̌ plû̌bǐ bò he hǒ. 3He kaǎgǔhtò̌ mî̌caca ta̤ma̤jè̌, he lò̤dô̌lò̤de jî̌jî̌. He gô̌bôkû mî̌ akhwe bò hǒhǒ. He ô̌pǒ̤ kè̌cû̌ǐ mî̌ca Cǒmaradû̌ dě a gayǎ̤ bò he mi̤sǎphlǒ. 4Kòyò dǒ he ma̤si asî tôcǒ tô̤̌ dě a sǎkhě he tokhlǒ mî̌ aô̌plṳ̂ khlo pe kû̌ he khǔlṳ. Kòyò dǒ a ma̤pî̌ma̤lṳ̂̌kè he tokhlǒnu, asîrîshû̌sho jî̌jî̌. Timǐtitè dǒ he ǎhǔ tô̤̌ tokhlǒnu bǎbǎ, asî kwikudǔdǔ he. a 5Ǒ꤮ Cǒmaradû̌, na sǎganǎ̤ tûû̌ he ma̤takǎ ta̤sǔ nutokhlǒ. He bè̌hǔbè̌sè̌jò nô̌ he ta̤sǔ dǒ nalô̤mô̤̌ tô̤̌. 6Ǒ꤮ Běcǎ tûjû̌pwa̤ dǒ a pǒ ta̤ lǒ̤꤮ bò, dǒ he khû̌khî no gènè̤pî̌tî̌kè tǎ̤ pwa̤ dǒ a ô̌pǒ̤kè̌shu nanu mǎ̤. Ǒ꤮ Îsôrěla Cǒmaradû̌, dǒ he khû̌khî, nohtûhtò̌ tǎ̤ ta̤shòwò̤̌ dǒ pwa̤kè̌lǎ nanu aya mǎ̤. 7Dǒ na khû̌nakhî kòyò pî̤jî̌ǐsho bò he. He shòwò̤̌ mǐ̤sǎphû̌mò̤̌ jî̌jî̌. 8Hekhlihelè bè̌ he pô̤̌ kòyò shǔshawa̤ tôpwa̤. Hepṳ̌hewè̤̌ kè̌ pe he tô̤̌. 9He sǎphlǒshû̌ mô̤ǐ mî̌ca nahǐ. He ta̤sǎphlǒshû̌ mô̤ǐ numî̌ a u bòkè he sô̌sô̌kû̌ mî̌. b Ta̤ dǒ kòyò pî̤jî̌ǐsho na tokhlǒnu, a hèbǎ he hǒ. c 10Bǎ hehǎhewô dǔǎdǔô shǎ akhanu, kòyò pî̤jî̌ bò he. 11He sô̌htò̌ jehǐyò̤̌tûphrû dǒ a dǔlṳ̌ ta̤sǎplǎ̤, kòyò sǎyǎ̤ bò he. 12Kòyò hǎnòò̌ lô̌khô dǒ wî̤̌takhadû̌htu nutokhlǒ dô̌kènè bò heyô̤. Pwa̤ǎmṳôphô̌ tokhlǒ sǎwǐ takǎ bò he. 13Ǒ꤮ Cǒmara tûjû̌pwa̤, he dě he kwicabahtò̌ pwǎ dǒ naô̌. Ǒ Cǒmaradû̌, na ta̤mô̤nu ahǎbòjò tô̤̌ akhû̌akhî, bǎ ta̤shěta̤khǎ tôbǎ akha pěnu ganǎ̤de he kwi na hǒo. Ma̤jè̌mò̌ he kû̌ na ta̤ma̤hǎplǎge dǒ atě̤mè̤̌nu. 14Cǐhtò̌ mò̌ he dǒ pèè̌ kla. No lò̤tě̤cǔ tǎ̤ he mǎ̤. Ma̤hǎplǎ mò̌ he kû̌ pwa̤ dǒ a sǎkhě he. Cî̌htò̌ mò̌ he dǒ shidû̌lò̤yô̤̌ akû. 15No dû̌htò̌ plû̌bǐkè tǎ̤ he kû̌ shi mǎ̤. No lò̤cǔ tě̤kè tǎ̤ he mǎ̤. No jawǎ̤bǐkè tǎ̤ he dǒ lṳ̌kûnu mǎ̤. 16Ǒ Cǒmara tûjû̌pwa̤, na ta̤mô̤ dǒ ahǎbòjòtô̤̌nu, a wô̌ mî̌ca akhû̌akhî, hî̌shǔ mò̌ he. Na gwèbǎǐ jî̌ he akhû̌akhî, htû̌tiwǐtô mò̌ dǒ he ô̌. 17He kè̌shǐtṳ̌bǎ kû̌ ta̤pò̤̌ta̤sha akhû̌akhî, kè̌khô̌kè tǎ̤ na mǐ̤sǎ kû̌ na pwa̤ma̤ta̤phû̌nu mǎ̤. Hî̌bǎshǔ mò̌ he. 18Hèô̌phǔ kû̌ he, ma̤hǎplǎge he. Ma̤hǎplǎge mò̌ he dǒ pwa̤sǎkhě he nutokhlǒ acǔdekû. 19Kòyò pî̤jî̌ǐsho he, kòyò ma̤shòwò̤̌ he, kòyò ma̤yǒhtò̌yǒlè he hî̌tènu, na sî̌ganǎ̤ bò hǒ. Na kè̌shǐ bò pwa̤sǎkhě he sîtokhlǒ pṳ̂̌tôpwa̤ hǒ. 20Dǒ kòyò pî̤jî̌ǐsho he akhû̌akhî, a bǎsha jî̌ he sǎphlǒ, a shèwè̤ jî̌ he. He kè̌lǎ pwa̤gwèbǎǐ he bǎbǎkǎlè he kè̌shǐ tôpwǎ̤ tô̤̌. He kè̌shuǐ pwa̤ma̤mô̤ma̤bǎ he bǎbǎkǎlè he kè̌shǐ tôpwǎ̤ tô̤̌tô̤̌. 21Asî shû̌nṳ̌ atiwǐ dǒ he shǎǎ kla. Bǎ he sǎôshi akhanu, asî dǐô̌ he shisǐyô̤̌ dǒ a shî̌bò. d 22Asî ma̤ ta̤ǎta̤ô pwè. Nopî̌nolṳ̂̌kè sô̌ tûû̌ kû̌ asînǎ̤ pô̤̌ a bǎ sumṳ̌ nupě. Pwè dǒ asî ǎô tû̌nu no htûhtò̌kè asî sumṳ̌ nî̌. e 23No lakè bò asîmǐ̤sǎ. No jǎ gònò̤̌gòglè kudǔdǔ kèbò asî shè̌kò nî̌. f 24Sǎphlǒdû̌ li̤pi̤sǐ asî, cî̌htò̌ kèmò̌ asî. No khòbǎbò sô̌ tûû̌ asî kû̌ na ta̤sǎphlǒdû̌ asî. 25No ô̌khwè̌ bò asîgûlǎ̤. Dǒ asîgûlǎ̤nu noô̌ tǎ̤ kòyò tôpwǎ̤ mǎ̤. g 26Asî ma̤jî̌ma̤jû̌ kòyò dǒ na po̤ hto yǎ nutokhlǒ. Kòyò dǒ na ma̤sha hto lû̌û tokhlǒnu, asî ma̤sha shû̌shû̌ pô̤̌ lû̌û. 27Pô̤̌ asî ta̤sǔta̤plě ô̌nu bè̌plṳ̂ pô̤̌ asî ta̤sǔ. No nǐ̤bǎ tǎ̤ asî kû̌ na ta̤ma̤hǎplǎge tîkî̌ mǎ̤. 28Kòyò glè̌ htǔplîkè bò asîmi̤ dǒ lî̤htûpwa̤ akû. No wě̤ô̌ pa tǎ̤ asîmi̤ dǒ kòyòsǎphlǒwô̌ tokhlǒ ami̤ aklanu mǎ̤. 29Ajî̌ajû̌ ashuphǔshèwè̤ jî̌ he hǒ. Ǒ Cǒmaradû̌ ma̤hǎplǎge mò̌ he, takabǐ mò̌ he. 30He glè̌ htû̌sò̌htò̌ Cǒmaradû̌ ami̤ kû̌ lî̤sǎwǐhǎwô. He glè̌ bè̌dubè̌nǎ̤ lû̌û kû̌ he ta̤hî̌bwǐhî̌sîrîhtò̌ lû̌û. 31Ma̤pô̤̌nudě Cǒmara tûjû̌pwa̤ glè̌ sǎphlǒô̌ khlo pe kû̌ lṳhtò̌ pṳ̂̌phadû̌ tôdo. A sǎphlǒtô khlo bò pe kû̌ pṳ̂̌phadû̌ dǒ ano̤ ô̌, akhò̌mè̤̌ ô̌ tôdo. 32Kòyò dǒ a khòbǎ ta̤jî̌ta̤jû̌ glè̌ kè̌shǐ dě a gǔ sǎlě̤sǎlò̤. Sî dǒ a kè̌lǎ Cǒmaradû̌ tokhlǒnu, sî sǎphlǒ glè̌ shû̌htò̌shò̌htò̌. 33Cǒmara tûjû̌pwa̤ glè̌ ganǎ̤de kòyò shôdô pwa̤ma̤jè̌ ata̤yî̤̌kǒhtò̌. A shôpe̤shônǎkè bǎ kòyò dǒ kòyòpṳ̂̌dǒlò̤tě̤ lû̌û nutô̤̌. 34Ǒ mǒkhû̌, hǎkhû̌, shidû̌te̤we̤ kû̌ ta̤bô̌lò̤ ô̌ dǒ asîlô̤ lǒ̤bò sî, htû̌sò̌htò̌ mò̌ yǎ. 35Cǒmaradû̌ glè̌ ma̤hǎplǎge Wî̤̌yarǔshôle ô̌ dǒ Sǐû khôlôkhû̌. A gǔ bô̌htò̌ sô̌ wî̤̌ dǒ Yǔdagǎkû. A kòyò tokhlǒ gǔ ô̌ lô̌khô bǎnu. A nǐ̤bǎ pû hǎkhû̌ bǎnu pě nî̌. 36A pwa̤ma̤ta̤phû̌ aphû̌ali̤ dǒ acubucabahtò̌ lû̌ûnu, a glè̌ nǐ̤bǎ pû hǎkhû̌nu pô̤̌ asî aû̌cata̤bǐ pě. Kòyò dǒ a mô̤nǐ̤ lû̌û tokhlǒnu, a glè̌ ô̌ pa bǎnu pě.
Copyright information for
KxfSCKXF