Psalms 7
Kwicabahtò̌ dǒ ta̤ma̤tôma̤bǎ aya
Khwǐdawi̤ sǎwǐ Bejame̤ khlilèphû̌ khûkǔshǎ awe̤akè dě a sǎwǐkwihtò̌ Cǒmara tûjû̌pwa̤.
1Ǒ꤮ Cǒmara tûjû̌pwa̤, he Cǒmaradû̌ he hèô̌tûdû dǒ naô̌ hǒ. Ma̤hǎplǎkè he kû̌ lǒ̤꤮ bò kòyò dǒ a lṳ̂pṳ̂̌ he, sǎyṳ ma̤pò̤̌ma̤sha henu. 2Kè̌ mè̤̌tô̤̌ hî̌mî̌, asî htěphrǔhtěpò̌ bò he pô̤̌ khî ěphrǔěbò̌ kòyò nupě. A ěmǔěplě bò he pě. Kòyò ma̤hǎplǎ jò he tôpwa̤ tô̤̌ pe. 3Ǒ Cǒmara tûjû̌pwa̤, he Cǒmaradû̌, he ma̤sǔ nô̌ kòyò tôpwǎ̤ tô̤̌. 4He shaǎmi̤ shaǎhtò̌ nô̌ he sû̌khô tô̤̌. Bǎ pwa̤sǎkhě he ma̤sǔ he tôcǒ tô̤̌ akhanu, he cû̌pṳ̂̌sigwǐyǒsaphǎ nô̌ asîta̤ tôkhò̌ tô̤̌ ya. a 5He kè̌ ma̤ pô̤̌nu hî̌dě no lṳ̂lǎ he kû̌ pwa̤sǎkhě he, no lṳ̂pṳ̂̌nṳ̌ kètû̌ he. No yî̤̌pwǐyî̤̌pò̌ kètû̌ he sǎphlǒhtûpwa̤nu kû̌ a dǒ hǎkhûnu, no bè̌tě̤kè henǎ̤glǒnu dǒ hǎkumṳ̌kla nu. 6Ǒ Cǒmara tûjû̌pwa̤, ma̤mò̌, sǎphlǒdû̌mò̌, shěshǔmò̌ pwa̤sǎkhě he dǒ a sǎphlǒdû̌ jòjî̌ he hǒo. Pô̤̌ na mǎnǎ hto nayô̤̌nu ma̤ bǎmò̌ heya, cî̌htò̌ mò̌ yǎ. 7No hèô̌plǒ te̤we̤ bòmò̌ kòyòsaprṳ̂ dǒ na kòshî̌. Hǎnòò̌ô̌ dǒ mǒkhû̌ nagògǒhta akhû̌nu, dě pǒǐ nṳ̌bòmò̌ asî. 8Cǒmara tûjû̌pwa̤ cî̌htò̌cǒ cî̌htò̌tô kòyò khlilèphû̌ tokhlǒ. Ǒ Cǒmara tûjû̌pwa̤, ta̤dû̌ta̤htûlǒ aběcǎ, hecǒhetè̤, heta̤sǔ ô̌ tô̤̌ akhû̌akhî, khòlṳ̌mò̌ bǎ he tôkhô. 9Ǒ Cǒmaradû̌ dǒ acǒatè̤, pwa̤dǒ ama̤kè̌bǎ kòta̤gènè̤, sî̌ganǎ̤bò kòsǎphlǒ ata̤sǎyṳ, khòsǎdô no ô̌kǔbǎ kòyò phû̌mò̤̌ dǒ a ma̤ ta̤phû̌mò̤̌ nutokhlǒ. b Kè̌khwè̌takaǐ kòyò dǒ acǒatè̤nu. 10Cǒmaradû̌ mî̌ pwa̤takabǐ he sô̌sô̌kû̌ ta̤gòtò̤ tôbǎ. A ma̤hǎplǎkè kòyòcǒkòyòtè̤. 11Cǒmaradû̌ mî̌ pwa̤cî̌htò̌cǒ cî̌htò̌tè̤ ta̤. A sǎphlǒdû̌ mî̌ca kòyò sǎphlǒphû̌mò̤̌shǐhtô nutokhlǒ pṳ̂̌ tôni̤. 12Asî kè̌ yò̤lǎ̤plǎdî̌ gesô̌ lô̌khô asǎphlǒ tô̤̌mî̌, Cǒmaradû̌ gǔ yû̌htò̌ anò̌she, ayè̤htò̌ nǎ akhlǐ pě. c 13A tîwî̌tòwò nǎ ata̤wè̤̌ta̤htò dǒ a ma̤sijò kòyò, ayè̤htò̌ nǎ aplǎ̤mî̌u dǒ a ma̤hǎmǎjò kòyò nu. 14Kè̌mò̌, kòyòkhu tôpwa̤nu asô̌sô̌kû̌ pwa̤mǒ̤ mǒ̤dohtò̌nṳ̌ ta̤phû̌mò̤̌shǐhtô, hǐphudû̌htò̌ ta̤pò̤̌ta̤sha, phû̌ô̌lò̤ nǐ̤ ta̤lòhô hǒtokhlǒ. d 15A pho lò̤yô̤̌ hǎkû dǒ kòyò gǔ lò̤tě̤ aya bǎbǎkǎlè a lò̤tě̤kè sô̌ tûû̌. 16Ta̤phû̌mò̤̌shǐhtô dǒ a gǔma̤ kòyò tokhlǒ a bǎtîkhî sô̌ kû̌ anǎ̤ tûû̌. A ma̤jî̌ma̤jû̌ kòyò tokhlǒ lò̤tě̤bǎ sô̌ tûû̌ dǒ akhû̌shikhû̌. 17Cǒmara tûjû̌pwa̤ cèròcǒ cèròtè̤ ta̤ akhû̌akhî, he hî̌bwǐhî̌sîrî htò̌ a, sǎwǐ htû̌sò̌htò̌ a dǒ adû̌ahtûlǒ nutôpwa̤ ami̤ pě.
Copyright information for
KxfSCKXF