Psalms 71
Kwihtò̌ Cǒmara ata̤tutakaǐ aya
1Ǒ Cǒmara tûjû̌pwa̤, he hèô̌tûdû hǒ dǒ na ô̌. No ma̤ shòwò̤̌ tǎ̤ he kû̌ kòyò tîkî̌ tǎ̤mǎ̤ nî̌. 2Dǒ nocǒnatè̤ akhû̌akhî, ma̤hǎplǎkè mò̌ he. Ganǎ̤de heta̤kwisǎyṳ na, ma̤hǎplǎkè mò̌ he. 3Htû bǎ he lǒ̤dû̌ lǎ̤ô̌tûdû dǒ helǎ̤cû̌ô̌ tûdûnǐ̤ pṳ̂̌ tôplǎ. Hî̌bǎhtò̌ mò̌ nayô̤̌ dǒ na gǔ ma̤hǎplǎkè he. Na mî̌ helǒ̤dû̌ lǎ̤ô̌tûdû, hewî̤̌we̤dû̌ dǒ atònò. 4Ǒ he Cǒmaradû̌, ma̤hǎplǎkè mò̌ he dǒ kòyòkhuhe, kòyòphû̌mò̤̌, kòyòma̤jî̌ma̤jû̌ he hǒtokhlǒ acǔdekû. 5Ǒ Běcǎ tûjû̌pwa̤ dǒ a pǒ ta̤ lǒ̤bò he kè̌shu pwǎtǒ̤꤮ na. Ǒ Cǒmara tûjû̌pwa̤, he yṳ̌ǎnǎlǎ̤ǐ na dǒ he phijǎkha pe. 6He nǎla̤ǐ na dǒ he ô̌phijǎlò̤lû̌꤮ akha pe. Na mî̌ pwa̤phǐhtò̌ he dǒ hemǒ̤hǐphukû. He htû̌sò̌htò̌nǐ̤ na pṳ̂̌ tôplǎ 7Na mî̌ he lǎ̤ô̌tûdû dǒ atònò akhû̌akhî, he htû hto kòyò dû̌wî̤꤮ pwa̤ lǎ̤kè̌mò̌mṳ. 8Pô̤̌ plǎplǎ꤮ he htû̌sò̌htò̌ na. He shôbǐǐlṳ̌ nasîrîdû̌sîrîhtû tônǐ̤ lṳmṳ̌hǎ. 9Htû̌꤮ he mǒ̤pwǎ̤ akha pě, wṳ̂̌hǎhtòkè tǎ̤ he mǎ̤. Htû̌ hekhû̌heǎ lǒ̤bò akha pě, wîkè tǎ̤ he mǎ̤. 10Pwa̤sǎkhě he tokhlǒ hî̌bǎ takǎ bò he. Kòyò dǒ a gǔ ma̤si he tokhlǒnu, a ô̌plǒô̌htu hî̌bǎhǔsè̌ ǐtû̌ lû̌û. 11Asî hî̌ lô̌khô kû̌, “Cǒmaradû̌ wîkè lû̌û. “Pwa̤ma̤jè̌ lû̌ ô̌ pe tôpwa̤꤮ tô̤̌ akhû̌akhî, pa cû̌ lṳ̂pṳ̂̌ lû̌û tǎ꤮.” 12Ǒ꤮ Cǒmaradû̌, ô̌tapheyî tǎ̤ kû̌ he mǎ̤. Ǒ꤮ he Cǒmaradû̌, khòsǎdô hèma̤jè̌ phwèmò̌ he. 13Nolò̤jû̌kè, nopî̌kè bò kòyò dǒ a kè̌lǎbè̌ he ta̤sǔ nutokhlǒ. No sòwò̤̌ mǐ̤sǎpî̌kè kòyò dǒ a kè̌lǎ ma̤pò̤̌ma̤sha he nutokhlǒ. 14He dě, he kè̌shuǐ gutṳ̌ pwǎ na ô̌. He glè̌ htû̌sò̌ hto htû̌sò̌ sô̌sô̌ na pě. 15Nata̤cǒta̤tè̤ awe̤akè kû̌ nata̤ma̤hǎplǎge awe̤akènu, he sî̌yahtû tô̤̌ bǎbǎkǎlè he glè̌ shôbǐǐlṳ̌ bǎ kòyò tônǐ̤mṳ̌hǎ pě. 16He hè shôbǐǐlṳ̌ tûû̌ Běcǎ tûjû̌pwa̤ ata̤ma̤ dǒ asîrîpô̤phǎ. He glè̌ sôbǐǐlṳ̌ bǎ kòyò kû̌ tǒ̤꤮ na ta̤cǒta̤tè̤ pě nô̤̌ pwǎ. 17Ǒ Cǒmaradû̌ na sû̌ǐtòwòǐ he dǒ he phijǎkha pe. He shôbǐǐlṳ̌ na ta̤ma̤ cô̌klǐcô̌sè tokhlǒ tǒ̤lò̤꤮ khònò̤̌. 18Ǒ Cǒmaradû̌, htû̌ he mǒ̤pwǎ̤ khǔlṳbû pě bǎbǎkǎlè wîkè tǎ̤ he mǎ̤ nî̌. No shôbǐǐlṳ̌ he kû̌ Hephû̌heli̤ sîtokhlǒ kû̌ na ta̤sîrîpô̤phǎ. No shôbǐǐlṳ̌ he kû̌ kòyò ô̌htûpwa̤ dǒ nô̌kò tôhtu tokhlǒ kû̌ na ma̤ ta̤sîrîpô̤phǎ awe̤akè pě nî̌. 19Ǒ Cǒmaradû̌, na ta̤cô̌klǐcô̌sènu, a htò̌tǒ̤ dǒ mǒlǎ̤. Na ma̤ ta̤nu acô̌klǐkǐya mî̌ca. Pwa̤ dǒ asô̌sô̌kû̌ nanu a ô̌ tôpwǎ̤tô̤̌. 20Na dǐkè̌shǐ he kû̌ ta̤pò̤̌ta̤sha ta̤shuphǔshèwè̤ bǎbǎkǎlè na ǐ shû̌htò̌shohtò̌ sô̌ he. Bǎ he glè̌ si tè̤tè̤̌ akhanu, na ma̤ htûpwa̤ getîkhî sô̌ he. 21Na bè̌htò̌yô̤̌ he sîrîshû̌sho hǒ, na ma̤mô̤htò̌ sô̌ he sǎphlǒ hǒ. 22Ǒ he Cǒmaradû̌, dǒ na cǒ kû̌ nayô̤̌ akhû̌akhî, he tôglô̌ tǐtutegwedû̌ dě he htû̌sò̌htò̌ na. Ǒ Isôrě̤la khlilè a Cǒmara dǒ aplò̌ashî̌ he tôglô̌ tǐtutegwephû̌ dě he sǎwǐ htû̌sò̌htò̌ na. 23He sǎlě̤sǎlò̤ yî̤̌kǒ sǎwǐ htû̌sò̌htò̌ na. Bǎ na ma̤hǎplǎge he akhanu, he gǔ htû̌sò̌htò̌ na. 24Na ma̤ ta̤cǒta̤tè̤nu he sôbǐǐlṳ̌ tônǐ̤mṳ̌hǎ pě. No sòwò̤̌ mi̤sǎpî̌kè kòyò dǒ a kè̌lǎ ma̤pò̤̌ma̤sha he nutokhlǒ.
Copyright information for
KxfSCKXF