Psa 72 | KxfSCKXF | STEP | Khwǐshòlômṳ̂ ata̤sǎwǐ htû̌sò̌htò̌ǐ. Ǒ Cǒmaradû̌, ǐ mò̌ khwǐ kû̌ na ta̤sî̌ta̤jò̌ dǒ a glè̌ ma̤tôma̤bǎ ta̤ aya. Ǐ mò̌ khwǐphû̌ kû̌ na ta̤cǒta̤tè̤.

Psalms 72

1 Ǒ Cǒmaradû̌, ǐ mò̌ khwǐ kû̌ na ta̤sî̌ta̤jò̌ dǒ a glè̌ ma̤tôma̤bǎ ta̤ aya.

Ǐ mò̌ khwǐphû̌ kû̌ na ta̤cǒta̤tè̤.

2 A gǔ cî̌htò̌cǒcî̌htò̌tè̤ pû na kòyò nî̌.

A gǔ cî̌htò̌cǒcî̌htò̌tè̤ pû na kòyò dǒ kòyò ma̤jî̌ma̤jû̌ lû̌û nutokhlǒ nî̌.

3 Khôkôdû̌khôlôhtû tokhlǒ glè̌ ǐpè̤̌ pû kòyò nutokhlǒ ta̤gûjû̌kabǎ nî̌.

Khôlôplǔ tokhlǒ ǐ pû asî ta̤cǒta̤tè̤ nî̌.

4 Khwǐ nî̌ a glè̌ takabǐ pû kòyò dǒ kò ma̤jî̌ma̤jû̌ lû̌û nutokhlǒ nî̌.

A glè̌ ma̤hǎplǎge pû kòyò shôdô pwa̤ma̤jè̌ aphû̌ali̤ tokhlǒ nî̌.

A yî̤̌mǔyî̤̌pwǐ bò pû pwa̤ dǒ apè̤̌ǎpè̤̌ô kònu nî̌.

5 Lṳmṳ̌ kè̌ lî pepe dǒ mǒlǎ̤, la kè̌꤮ lî pepe dǒ mǒkhû̌ hî̌dě kòyò tôhtu hto tôhtu glè̌ ǐsha dě bè̌dubè̌nǎ̤ pû na nî̌.

6 Khwǐ ata̤pǒǐ glè̌ ma̤jè̌ pû kòyò nutokhlǒ sô̌sô̌kû̌ gǎjulò̤ bǎ sǒmṳ̌wû̌bônu nî̌.

A glè̌ sô̌sô̌pûkû̌ gǎjudû̌ bǎ hǎkhû̌nu nî̌.

7 Kòyòsǎphlǒwô̌ tokhlǒ glè̌ behtò̌belò̤ bǎ ahtukhanu nî̌.

La kè̌꤮ ô̌ pepe mî̌, ta̤gûjû̌kabǎ glè̌ ô̌měô̌gle pû nî̌.

8 A glè̌ sahtò̌pǒǐ dǒ mǒ kòshî̌ tǒ̤htû̌ mǒ gutṳ̌ nî̌.

A glè̌ sahtò̌ pǒǐ pû dǒ Yubriti lô̤̌mǒ̤dû̌ tǒ̤htû̌ hǎkhû̌ gutṳ̌ nî̌. ^a

9 Kòyò ô̌ dǒ gǎshashigǎkhû̌ nutokhlǒ dô̌gînî̤lò̤ bò pû dǒ a lô̤mô̤̌ nî̌.

Pwa̤sǎkhě lû̌û tokhlǒ lò̤jû̌bò pû alǎ̤ nî̌.

10 Khwǐ ô̌ dǒ Wî̤̌tashǐ nutokhlǒ kû̌ dǒ shidû̌shitewe̤htu nutokhlǒ phî̌hè lô̌khô pû sû tokhlǒ dǒ aô̌ nî̌.

Shebagǎ kû̌ Sèbǎgǎkhwǐ tokhlǒ phî̌hèǐ pû ta̤lṳta̤tò nî̌꤮.

11 Khwǐ lǒ̤꤮ bò dô̌gînî̤lò̤ bò pû dǒ Isôrěla khwǐ lô̤mô̤̌ nî̌꤮.

Kòyò khlilèphû̌ lǒ̤꤮ bò ma̤bò pû ata̤phǐta̤ma̤ nî̌꤮.

12 Ma̤titèhî̌dě a glè̌ ma̤hǎplǎge kòyò shôdô pwa̤ma̤jè̌ dǒ a yî̤̌kǒhtò̌ lû̌ûnu.

A glè̌ ma̤hǎplǎkè pô̤̌ kòyò dǒ kòyò ma̤jî̌ma̤jû̌ lû̌û dě ashôdô pwa̤ma̤jè̌nu.

13 A glè̌ gwèbǎǐ pwa̤hǎwě̤shèwè̤phû̌ kû̌ kòyò shôdô pwa̤ma̤jè̌.

A glè̌ ma̤hǎplǎge kòyò dǒ a shôdô pwa̤ma̤jè̌ nutokhlǒ dǒ ta̤si.

14 Asî ta̤ô̌htûpwa̤nu alě̤dû̌pwî̤dû̌ jî̌jî̌ dǒ alô̤mô̤̌ akhû̌akhî, a glè̌ ma̤hǎplǎge asî dǒ kòyò jî̌jû̌ kû̌ kòyò khuhe tokhlǒ acǔdekû.

15 A glè̌ ô̌htûpwa̤ nědû̌lahtû pû nî̌.

Kòyò gǔ hèǐ lû̌û hta dǒ a hǎhtò̌ bǎ Shebǎgǎ nutokhlǒ nî̌꤮.

Kòyò glè̌ kwicaba bǎ pû dǒ aya pṳ̂̌tôplǎ nî̌꤮.

Cǒmaradû̌ glè̌ ǐshôwî̤ pû khwǐ pṳ̂̌꤮ tôplǎ nî̌.

16 No sǎhtò̌phôhtò̌ dû̌ma̤ti̤ ta̤sǎta̤phô pṳ̂̌꤮ tôkû.

No sǎhtò̌behtò̌ bò a dǒ khôlôkhi.

Sǒsǎ sîtokhlǒ, no sǎhtò̌dû̌htò̌ sô̌sô̌ pô̤̌ sǒmṳ̌ dǒ Lebanû khômǔkhôlôkhû̌.

Kòyò tokhlǒ glè̌ ô̌wô̤̌ô̌dû̌htò̌ pû bǎ wî̤̌ nutokhlǒ akû sô̌sô̌kû̌ mi̤mṳ̌dô̌ dǒ ya̤dakhû̌ nunî̌꤮.

17 Lṳmṳ̌ kè̌꤮ lî pepe hî̌dě khwǐ ami̤ glè̌ ô̌měô̌gle pû tûjû̌pwa̤ nî̌, ami̤ lṳ̌shilṳ̌gǎ pû nî̌.

Dǒ a akhû̌akhî, khlilèphû̌ lǒ̤꤮ bò nǐ̤bǎ pû ta̤ǐshôwî̤ nî̌.

Asî htû̌sò̌htò̌ bò pû lû̌û nî̌.

18 Htû̌sò̌htò̌ mò̌ Cǒmara tûjû̌pwa̤, amè̤̌ Îsôrěla a Cǒmaradû̌nu.

Pwa̤ dǒ a ma̤cô̌klǐkǐya ta̤ mî̌ tǒ̤ a tôpwa̤ nô̤̌pwǎ.

19 Htû̌sò̌htò̌ ami̤ dǒ asîrîdû̌sîrîhtû tûjû̌pwa̤ talakhǎ nî̌.

A ta̤sîrîdû̌sîrîhtûnu a ô̌be bò pû dǒ hǎkhû̌běkhû̌ nî̌꤮.

Ame̤, Ame̤.

20 Phayeshè aphû̌ Khûdawi̤ ata̤kwicaba htokè bǒo hǒ. ^{▼▼Ta̤kwicaba numî̌ a sahtò̌ dǒ htû̌sò̌htò̌ 42:1 tǒ̤dǒ htû̌sò̌htò̌ 72:19}