Psalms 74

Ta̤kwicaba dǒ pakhlilèphû̌ gǔ hǎplǎ aya

Hǒomî̌ Pha Asa ata̤sǎwǐ dě dǒ Hebrǔyô̤̌nu, a kaǎ ta̤sǎwǐnu kû̌ Masakǐla ta̤sǎwǐ dě ta̤sǎwǐ hǒtôshǒ mî̌ a ǐ kòyò ta̤sî̌ya.

1Ǒ Cǒmaradû̌, na cû̌ wîkè pa tûjû̌pwa̤ ma̤titè?

Na cû̌ sǎphlǒdû̌ li̤pi̤sǐ nasû̌phû̌ saprṳ̂ dǒ na kè̌ nǐ̤ nutokhlǒ mî̌ a ma̤titè? ^a

2Gènè̤htò̌bǎǐ nakòyò dǒ na rû̌htò̌ge asî dǒwǐkha kû̌ nakhlilè dǒ na pwe̤ge asî dǒ a glè̌ htûhtò̌bò nakòyò nu.

Kǎtô̤̌ gènè̤htò̌bǎǐ pô̤̌ Wî̤̌yarǔshale ô̌ dǒ Sǐû khôlôkhû̌ dǒ na dǐ ô̌ a nutôkû.

3Hèkè̌mò̌ kòyò ma̤lò̤tě̤pro̤ pî̌kèbò hǒo.

Pwa̤sǎkhě pa tokhlǒ ma̤pî̌ma̤lṳ̂̌ bò ta̤ ô̌ dǒ ta̤plò̌shǐ gûlǎ̤ akû nutokhlǒ hǒ.

4Pwa̤sǎkhě na tokhlǒ ma̤pè̤̌ ta̤ dě yî̤̌kǒyî̤̌sa dǒ na ta̤lṳhtò̌hôkû hǒ.

Asî bô̌htò̌ akhû̌pa̤la̤ bǎnu pô̤̌ ta̤ma̤pè̤̌ ta̤mǎnǎ tôcǒ.

Ta̤kwicaba dǒ khlilèphû̌ ta̤ma̤hǎplǎge aya

5Asî hèlò̤ delò̤tě̤pro̤lò̤tě̤pò̌ bò ta̤phû̌ta̤li̤ asô̌sô̌kû̌ kòyò gû̌ sǒ dǒ mi̤kla.

6Sǒbě dǒ kòyò htǎwî̤ ǐlû̌û tokhlǒnu, asî po̤lò̤tě̤pò̌ kèbò akû kû̌ akhǐpo̤.

7Asî shû̌gè̌kèbò na ta̤plò̌shǐ agûlǎ̤.

Asî ma̤bǐma̤ô̌ phû̌mò̌shǐhtô bòkè na lǎ̤ô̌ gûlǎ̤.

8Asî hî̌ kû̌, “Pa ma̤pî̌ kèbò asî pṳ̂̌tôpwa̤ tǎ.”

Asî shû̌gè̌kèbò gûlǎ̤ dǒ kòyò lǎ̤cubucabahtò̌ Cǒmara nutokhlǒ.

9Pa kè̌shǐ na ta̤ma̤cô̌klǐkǐya tôcǒ tô̤̌.

Piwi̤pèsè ô̌ pe tôpwa̤ tô̤̌tô̤̌.

Ashěakhǎ yî̤ pwǐtè pěnu kòyò sî̌ganǎ̤ tôpwǎ̤ tô̤̌tô̤̌.

10Ǒ Cǒmaradû̌, pwa̤sǎkhě na tokhlǒ glè̌ sǎyî̤̌ lò̤wě̤lò̤sô na pwǐtè pě?

A glè̌ pî̤jî̌ǐsho nami̤ tûjû̌pwa̤ pě ya?

11Na cû̌dò̌tûklû̌ ma̤titè?

Hèma̤jè̌ mò̌ pa, ma̤pî̌ma̤lṳ̂̌ bòmò̌ asî.

12Ǒ Cǒmaradû̌, he sî̌yahto kû̌ na mî̌ pa khwǐ dǒwǐkha pe.

Na ma̤hǎplǎ taga pa dǒ pa gǎkûnu.

13Na ma̤ yòkè shidû̌shite̤we̤ kû̌ na ta̤sîrîpô̤phǎ. ^b

Na po̤phò̌kè wṳ̂̌dû̌ ô̌ dǒ shidû̌shitewe̤kû nutôbô a ikǒ tokhlǒ.

14Na demǔdeprû̌ ta̤phû̌ta̤wè̤ ô̌ dǒ shikû dǒ kòyò kaǎ lû̌û kû̌ Laweta hǒtôdo a ikǒ tokhlǒ. ^c

Na dǐǎ lû̌û kû̌ ta̤mi̤ta̤mò̤̌ ô̌ dǒ gǎshashigǎ.

15Na no hèlò̤ shipǒ̤hǎhtò̌ tokhlǒ, na no lô̤̌lò̤ shilô̤̌ tokhlǒ.

Na no sǔtèkhwè̌꤮ kè shilô̤̌mǒ̤ tokhlǒ. ^d

16Na no htûhtò̌ lṳmṳ̌khǐ kû̌ lṳmṳ̌sha.

Na tèlò̤ lṳmṳ̌ kû̌ la dǒ agûlǎ̤ kû̌ agûlǎ̤. ^e

17Dǒ hǎkhû̌nu na bè̌tôbè̌bǎ bò ta̤pṳ̂̌tôcǒ agûlǎ̤ kû̌ agûlǎ̤. ^f

Na nohtûhtò̌ gǎgû̌kha kû̌ gǎwô̤̌kha.

18Ǒ Cǒmara tûjû̌pwa̤, pwa̤sǎkhě na hǒtokhlǒ sǎyî̤̌ bò na pwǐtènu, gènè̤̌htò̌bǎ pě nî̌.

Kòyò ǒò̌ pî̤jî̌ǐsho bò nami̤ pwǐtènu, gènè̤̌htò̌bǎ tûû̌.

19Ǐ kè tǎ̤ htû̌lǐ̤ amè̤̌kû̌ na kòyò tokhlǒ ta̤ô̌htûpwa̤ kû̌ ta̤mi̤ta̤mò̤̌ mǎ̤.

Shôpe̤shônǎ tǎ̤ na kòyò dǒ a khòbǎ ta̤shuphǔshèwè̤ nutokhlǒ ta̤ô̌htûpwa̤ tîkî̌ mǎ̤.

20Hǎkhû̌ dǒ akhǐalo̤ gûlǎ̤ nutokhlǒ, a ô̌lǒô̌be bò kû̌ ta̤ma̤numa̤cî̌ akhû̌akhî, gènè̤htò̌ǐ na ta̤olò̤.

21No htûhtò̌ tǎ̤ ta̤shòwò̤̌ dǒ kòyò ma̤jî̌ma̤jû̌ lû̌û nutokhlǒ ayamǎ̤.

No htû̌sò̌htò̌ nami̤ kû̌ kòyò dǒ kò pè̤̌ǎpè̤̌ô lû̌û, kòyò shôdô pwa̤ma̤jè̌ nutokhlǒ.

22Ǒ Cǒmaradû̌ taka mò̌ nanǎ̤, gènè̤bǎ mò̌ kòyò ǒò̌ phuhtò nutokhlǒ hî̌phû̌mò̤̌shǐhtô na tônǐ̤mṳ̌hǎnu.

23Pwa̤sǎkhě na dǒ a sǎphlǒdû̌ na, a yî̤̌kǒyî̤̌sa na tokhlǒnu, shôpe̤shônǎ asî mǎ̤.

Pṳ̂̌plǎplǎ asî hèma̤ pi̤ti̤pûtṳ̂ takǎ na tokhlǒnu, shôpe̤shônǎ tǎ̤mǎ̤mǎ̤.