Psa 76 | KxfSCKXF | STEP | Pha Asa ata̤sǎwǐ htû̌sò̌htò̌. Ta̤sǎwǐ numî̌ ta̤ tokhlǒ aikǒlǒkò dě ta̤lṳhtò̌hôkû nutôpwa̤ aya. Bǎ sǎwǐ ta̤sǎwǐ nuakha, bǎ dǒ kû̌ ta̤dǒta̤ǔ dě apli̤ô̌ tokhlǒ. Kòyò ô̌ dǒ Yǔdagǎkû tokhlǒ sî̌ganǎ̤ lô̌khô Cǒmaradû̌. Isôrělagǎphû̌ tokhlǒ bè̌dubè̌nǎ̤ mî̌ca lû̌mi̤.

Psalms 76

1 Kòyò ô̌ dǒ Yǔdagǎkû tokhlǒ sî̌ganǎ̤ lô̌khô Cǒmaradû̌.

Isôrělagǎphû̌ tokhlǒ bè̌dubè̌nǎ̤ mî̌ca lû̌mi̤.

2 Ahǐ ô̌ dǒ Wî̤̌yarǔshôle.

Agûlǎ̤ ô̌ dǒ Sǐû khôlôkhû̌.

3 A yǒgǎkèbò pwa̤sǎkhě tokhlǒ aplǎ̤mî̌u bǎnu tôkû.

A dekèbò asîkhada, nò̌shî kû̌ ta̤wè̤̌ta̤htò.

4 Ǒ꤮ Cǒmaradû̌, naô̌ dǒ nalǎ̤ma̤pè̤̌ pwa̤sǎkhě na akhôlôkhû̌ dě na hèlò̤nu pa kè̌shǐ kû̌ nata̤sîrîpô̤phǎ, nasîrîdû̌sîrîhtû mî̌ca.

5 Asîkliphû̌ dǒ akhuahe tokhlǒ, kòyò phî̌ kèbò asî tě̤ta̤, a sikè bò hǒ.

Asî ta̤khû̌ta̤ǎ, ta̤sî̌ta̤jò̌ tokhlǒ noǎ jò pe tôcǒ꤮ tô̤̌.

6 Ǒ꤮ Phayakò a Cǒmara, bǎ na sǎhtǎdû̌da akhanu, pwa̤dò̌ tîsî̌ kû̌ atîsî̌ tokhlǒ lò̤khǔpo̤si bò.

7 Ǒ Cǒmaradû̌, kòyò bǎ ǐsha pwǎ tǒ̤꤮ na.

Bǎ na sǎphlǒdû̌ akhanu, kòyò ihtǒkhòbò̌ dǒ nalô̤mô̤̌ tôpwa̤꤮ tô̤̌.

8 Bǎ na ô̌ dǒ mǒkhû̌ hî̌bǎlò̤ kû̌ glè̌ cî̌htò̌ akhanu, kòyò ô̌ dǒ hǎkhû̌ hǒtokhlǒ ǐsha, sǔtukǔ a ô̌ lǒ̤bò.

9 Bǎ na sahtò̌ cî̌htò̌ hǒ pô̤̌nu akhanu, na ma̤hǎplǎkè ǐ lǒ̤꤮ bò kòyò dǒ kòyò ma̤jî̌ma̤jû̌ lû̌û bǎ hǎkhû̌ nutokhlǒ.

10 Na sǎphlǒdû̌ kòyòhǎkhû̌phû̌ hǒtokhlǒnu, a ma̤htûhtò̌ wô̌ bǎ pô̤̌ kòyò lǎ̤htû̌sò̌htò̌.

Kòyò dǒ a ô̌htûpwa̤ lû̌kè dǒ ta̤shěta̤pě̤ akû nutokhlǒ gǔ cubǔcabǎhtò̌ na dǒ napwèdû̌pwèhtû pě.

11 Olò̤ nayô̤̌ tokhlǒ kû̌ Cǒmara tûjû̌pwa̤, na Cǒmaradû̌nu dě ma̤lǒma̤be a.

Lǒ̤bò kòyò ô̌ te̤we̤bò lǒ̤bò kû̌ lû̌û nutokhlǒ no phî̌hè lǒ̤bò asî sû dǒ Cǒmara a ô̌, Cǒmara dǒ kòyò tôbǎ sǎǐsha mî̌ tǒ̤꤮ pwǎ a.

12 Cǒmara shò̌lò̤kèbò khwǐ kû̌ khwǐphû̌ tokhlǒ ata̤phǐdû̌phǐhtò̌yô̤̌ anǎ̤.

Khwǐ bǎ hǎkhû̌ nutokhlǒ ǐshabò lû̌lǎ̤.