Psalms 77

Cǒmara ô̌kû̌ a kòyò bǎ asî tṳ̌bǎ ta̤pò̤̌ta̤sha akha

Pha Asa ata̤sǎwǐ htû̌sò̌htò̌. Ta̤sǎwǐ numî̌ pwa̤sǎwǐ ta̤ tokhlǒ aikǒlǒkò dě ata̤lṳhtò̌hôkû nutôpwa̤ aya. Dě ta̤sǎwǐ htû̌sò̌htò̌ nutôshǒ mî̌ Khûjedutǔ dǒ a yṳ̂̌klè̌nè̌klòǐ pwa̤sǎwǐ htû̌sò̌htò̌ ta̤ nutôpwa̤ aya.

1He kwi꤮ sǎyṳhtò̌ mî̌ca Cǒmaradû̌ ata̤ma̤jè̌.

He kwi꤮ cabahtò̌ nò a dǒ a gǔ ganǎ̤de heta̤kwi.

2Bǎ he kè̌shǐ tṳ̌bǎ kû̌ ta̤pò̤̌ta̤sha akhanu, he kè̌lǎ Běcǎdû̌.

He yò̤̌htò̌ hecǔde, he kwicabahtò̌ na tônǎ̤mǒ̤shě bǎbǎkǎlè agayǎ̤ nô̌ hecǔdetô̤̌.

Bǎbǎbǎkǎlè amô̤ tǒ̤꤮ nô̌ hesǎphlǒ tîkî̌꤮ tô̤̌.

3Bǎ he gènè̤̌htò̌tǒ̤ Cǒmaradû̌ akhanu, he ta̤kookasha.

He gènè̤̌꤮ gènè̤ awe̤akè dě he sǎphlǒpî̌ mî̌ca.

4Na nohǎmôô̌nǐ̤ pe he tô̤̌.

Agû̌agè̌ tûlû̌shû̌lě he, he hî̌bǎhǎhtò̌bò̌ pe tô̤̌.

5He gènè̤htò̌tǒ̤ lṳmṳ̌ni̤ lṳmṳ̌sa dǒ atûlû̌hto tokhlǒ, he gènè̤tǒ̤bǎ něla dǒ awǐnu tokhlǒ.

6He hî̌lò̤ ǐtû̌ henǎ̤ kû̌, “Lṳmṳ̌khǐkha he gènè̤bǎǐ heta̤sǎwǐ.

“He gǔ gènè̤ tě̤tě̤mè̤̌mè̤̌ ǐ lû̌û.

7“Mî̌ Běcǎdû̌ glè̌ wîkèhǒ pa tûjû̌pwa̤ ya?

“Mî̌ a dǔlṳ̌ pejò ata̤mô̤ kû̌ pa tôplǎ tô̤̌ya?

8“Ata̤mô̤̌ dǒ ahǎbòjò tô̤̌nu a tě̤tṳ kèhtohǒ tûjû̌pwa̤ ya?

“A ta̤olò̤ mî̌ a pî̌gutṳ̌ kalò̤ kètû̌ yahî̌?

9“Cǒmaradû̌ hǒo a tôbǎ gwèbǎǐ kòyò numî̌ a shôpe̤ kèbò hǒ ya?

“A sǎphlǒdû̌ talû̌ shû̌lě dě a sǎyṳgwèbǎǐ pe tô̤̌ ya?”

10Htodě he hî̌ kû̌, “Cǒmara dǒ adû̌ahtûlǒ kòyò nutôpwa̤ ma̤jè̌ pe he kû̌ acǔde dǒ asîrîshû̌sho tô̤̌ he hî̌nu, a bè̌pò̤̌bè̌sha lǒ he.”

11He gènè̤̌htò̌tǒ̤ Cǒmara tûjû̌pwa̤ ata̤ma̤ nutokhlǒ.

He gǔ gènè̤htò̌bǎ nata̤ma̤ cô̌klǐcô̌sè dǒ awǐnu nutokhlǒ.

12Na ma̤ kwè̌ mî̌titènu he gǔ gènè̤ tě̤mè̤̌ lǒ̤bò.

He gǔ gènè̤bò nata̤ma̤ dǒ apô̤pwa̤shû̌sho nutokhlǒ.

13Ǒ Cǒmaradû̌, na ma̤ nakòyò tokhlǒ titètè̌ bǎbǎ, awî̤awô̌ lǒ̤bò.

Cǒmara dǒ adû̌ sô̌sô̌kû̌ pa Cǒmaranu a ô̌ tôpwa̤ tô̤̌.

14Na mî̌ Cǒmara dǒ a ma̤ ta̤cô̌klǐcô̌sè.

Na dǔlṳ̌ tû̌ nasîrîshû̌sho dǒ khlilèphû̌ tokhlǒ akla.

15Nakòyò dǒ a amè̤̌ Phayakò kû̌ PhaIsè̌ akhlialè sîtokhlǒnu, na ma̤hǎplǎge asî kû̌ nacǔde dǒ a ta̤po̤ta̤phǎ.

16Ǒ Cǒmaradû̌, bǎ shi tokhlǒ kè̌shǐ na akhanu, a ǐsha bò nalǎ̤.

Shidû̌shite̤we̤ tokhlǒ gònò̤̌ guyṳ̌ lò̤tǒ̤ dǒ akòda.

17Gǎjudû̌ shilô̤̌shikho hè.

Mǒgǒ dǒ mǒlǎ̤.

Shî̌lî̌bǒ pṳ̂̌꤮ tôkû.

18Na no shî̌lî̌ mǒgǒmǒyî̌ a pi̤ti̤pètè̌ dǒ phôpi̤wi̤dû̌ kla.

Shî̌lî̌bǒ dě a lîtîklî̌bò dǒ hǎkhû̌.

Hǎkhû̌ ǐsha gònò̤̌gòglè, guyṳ̌kèsè̌ lǒ̤bò.

19Na cû̌phlǔbò̌ shidû̌te̤we̤, na cû̌tûlû̌bò̌ shidû̌shiyô̤̌.

Kòyò kè̌shǐ nô̌ nakhǎlǎkha gûlǎ̤ tôpwa̤ tô̤̌.

20Napǒnasûnṳ̌ nakòyò tokhlǒ asô̌sô̌kû̌ sû̌phû̌sî dǒ Phamṳ̂shě kû̌ Pha Arṳ̂ sûcû̌ǐ asînu hǒ. ^a