Psalms 78
Cǒmara kû̌ a kòyò tokhlǒ awe̤akè
Hǒomî̌ Pha Asa ata̤sǎwǐ dě Hebrǔyô̤̌nu, a kaǎ ta̤sǎwǐ nukû̌ Masakǐla ata̤sǎwǐ dě ta̤sǎwǐ nutôshǒ mî̌ a ǐ kòyò ta̤sî̌yaphlôphǎ.
1Ǒ hekòyò sî, he sû̌ǐtòwòǐ kwè̌꤮ sî titènu, dò̌ lô̌khô sînò̌kulǎ. Ganǎ̤de lô̌khô hehî̌bǎ sînu. 2He gǔ hî̌bǎ kòyò kû̌ yô̤̌sǎkhěkhô̌ tokhlǒ. He gǔ shôbǐǐlṳ̌ bǎ sî kû̌ ta̤ dǒ kòyò ta̤bè̌hǔbè̌sè̌ dǒ wǐnukha tokhlǒ. a 3Ta̤ hǒtokhlǒnu, pa ganǎ̤de sî̌ganǎ̤ htohǒ. Paphiphu dě꤮ nukha tokhlǒ shôbǐǐlṳ̌ bǎ htohǒ pa. 4Ta̤we̤ta̤kènu pa gǔ bè̌hǔbè̌sèkè bǎ paphû̌pali̤ tô̤̌. Pa gǔ shôbǐǐlṳ̌ bǎ phû̌li̤ dǒ anô̌tôhtu pě tokhlǒ kû̌ Cǒmara tûjû̌pwa̤ ma̤ hto ta̤sîrîdû̌sîrîhtû, asîrîpô̤phǎ, ata̤ma̤cô̌klǐcô̌sè nutokhlǒ awe̤akè pě. b 5Cǒmara tûjû̌pwa̤ ǐlò̤ ta̤sû̌ta̤tòwò kû̌ Phayakò aphû̌ali̤. A bè̌ô̌htò̌ǐ ata̤sû̌ǐtòwòǐ kû̌ PhaIsôrěla akhlialè. ▼▼Phayakò ami̤nu Cǒmara htû̌lè̌ kè lû̌û kû̌ Îsôrěla akhû̌akhî, Isôrěla akhlialè kû̌ Phayakò aphû̌ali̤ mî̌ asô̌sô̌ lû̌û pwǎ.
6Pô̤̌khô phû̌ dǒ nô̌kò pě tôhtu, li̤ dǒ nô̌kò pě tôjû̌ gǔ sî̌ganǎ̤ kû̌ ayanu, htokhôtô̤̌ asî gǔ pwe̤ǐlò̤ tutṳ̌ bǎ aphû̌ali̤ alṳ̂ala̤ sîtokhlǒ ayanu, Cǒmara mǎnǎ paphiphu sîtokhlǒ ayô̤̌ kû̌ asî sû̌ǐ lò̤ tutṳ̌ bǎ aphû̌ali̤. 7Ma̤pô̤̌nu tǒ̤꤮ mî̌ aphû̌ali̤ yṳ̌ǎ nǎla̤ǐ kû̌ Cǒmaradû̌. Asî gǔ shôpe̤kè Cǒmara ma̤hto ta̤cô̌klǐcô̌sè nutokhlǒ tô̤̌, a gǔ jûǎ gû̌ma̤ bòtû̌ ta̤mǎnǎlò̤. 8Htodě asî gǔ sô̌sô̌ pe nǒ asîphiphu dǒwǐkha tokhlǒ tô̤̌. Asî aphiphu mî̌ aikǒpwǐ, a htè̌shǔma̤shǔ Cǒmara. Asîsǎphlǒ cǒtè̤ kû̌ nǒ Cǒmara tô̤̌. Asî ayô̤̌ cǒtè̤ kû̌ lû̌û tô̤̌tô̤̌. 9Epharǐ khlilènu akhlǐ, aplǎ̤ sî ô̌ bǎbǎkǎlè bǎ ta̤shěta̤pě̤ nutôni̤, asî hǎhtò̌khlè̌tephe kèbò. 10Asî pṳ̂̌glemě ǐ Cǒmara ata̤olò̤ tô̤̌. A htè̌shěshu ata̤sû̌ǐtòwòǐ. 11A jî̌koo bò ta̤ dǒ Cǒmara ma̤ bǎ hto asî ta̤cô̌klǐcô̌sè dǒ a dǔlṳ̌ hto asînu. 12A ma̤lṳ̌ hto ta̤côklǐkhû̌khî dǒ asî phiphu alô̤mô̤̌, dǒ Ijǐgǎ, Sû̌agǎya̤dakhû̌nu. d 13A ma̤phò̌kè shidû̌shite̤we̤, a nocû̌bò̌kè asî. A nolò̤ô̌kǔ kèbò shi, a ô̌kǔô̌ bò ginǐ̤khôginǐ̤gî̌ sô̌sô̌kû̌ dǒdǎ. e 14Lṳmṳ̌sha dě a sûcû̌ asî kû̌ poǒlṳ̌ tôbǎ. Lṳmṳ̌khǐ dě a sûcû̌ asî kû̌ mî̌shǎdû̌ tôkǔ. f 15A po̤phò̌ lǒ̤dû̌ tokhlǒ dǒ gǎshashigǎkhû̌. A ǐôkǒôbe asî shi asô̌sô̌kû̌ shihǎhtò̌ shěhtò̌. g 16A no lò̤shi hǎhtò̌ tokhlǒ dǒ lǒ̤kû. A no lò̤ shi pô̤̌ shilô̤̌mǒ̤. h 17Bǎbǎkǎlè asî ma̤si gutṳ̌ penô̌ Cǒmaradû̌. Asî hî̌tukutakǎshǔ Cǒmara dǒ adû̌ahtûlǒ kòyò hǒtôpwa̤ dǒ gǎshashigǎkhû̌. i 18A ma̤takǎ kè̌kè̌ lô̌khô Cǒmara. Shǎǎshǎô dǒ asî sǎǎsǎô tokhlǒnu, a kwi gudǔdǔ lô̌khô Cǒmara. j 19Asî hî̌ takǎ Cǒmaradû̌ dě a hî̌ lô̌khô kû̌, “Mî̌ Cǒmara dǐǎbò̌ shû̌lě pa shǎǎshǎô bǎ gǎshashigǎkhû̌ yahî̌? 20“A po̤ lǒ̤ dě shi hǎhtò̌ mè̤̌mî̌ca he. “Shilô̤̌phû̌ tokhlǒ lò̤ lǒlǒbebe. “Mî̌ a dǐǎ bò̌ pa lǎ̤ǎlǎ̤ô ya? “Mè̤̌tô̤̌dě a ǐǎbò̌ nǒ a kòyò ta̤yî̌ ya?” 21Bǎ Cǒmara tûjû̌pwa̤ ganǎ̤de pô̤̌nu akhanu, a sǎphlǒdû̌ jòjî̌ tô̤̌. A sǎphlǒdû̌ li̤pi̤sǐ Phayakò akhlialè nutokhlǒ, ano ubòkè asî kû̌ mî̌. A sǎphlǒdû̌ mî̌ca Isôrělakhlilèphû̌. k 22Asî yṳ̌ǎ Cǒmaradû̌ tô̤̌, asî nǎla̤ǐ ata̤ma̤hǎplǎge dǒ apô̤aphǎ nutô̤̌ ya akhû̌akhî, a sǎphlǒdû̌ mî̌ca. 23Bǎbǎkǎlè Cǒmara hî̌bǎhtò̌ ayô̤̌ kû̌ poǒlṳ̌. A no lûmôtû̌ mǒkhû̌ takha. 24Asî lǎ̤ǎ ayanu, a glǒlò̤ bǎ ma̤nǎmû̌. A ǐlò̤ bǎ shǎǎshǎô dǒ mǒkhû̌. l 25Asî ǎ lô̌khô mǒkhû̌tanaphû̌ shǎǎ. Sǎǎ pwǐtè̌nu, Cǒmara dǐǎkǒôbe. 26A no sǎhè gili̤ dǒ gǎlṳmṳ̌htò̌ mǒlǎ̤ tôkhô. A no sǎhè gili̤ dǒ gǎcômû kû̌ asîrîpô̤phǎ. m 27A ǐlò̤ bǎ asî ta̤yî̌ asô̌sô̌kû̌ hǎkumṳ̌. A no wi̤lò̤tě̤ htû̌patǐ asô̌sô̌kû̌ lǒ̤sîmî̌ dǒ shidû̌shitewe̤htu. 28A no lò̤tě̤ dǒ asî lǎ̤ô̌gûlǎ̤ klǎmakû. A no lò̤tě̤ ô̌tewe̤bò kû̌ asî hǐphû̌ kòshî̌. n 29A ǐlò̤ bǎ pô̤̌ asî sǎyṳ. Asî ǎkǒôbe lǒ̤bò. 30Bǎ asî ǎkǒ khôtô̤̌, ǎ pepwǎ dǒ agô̌kû akhanu, 31Cǒmara sǎphlǒdû̌ asî. A ma̤sikè pwa̤khû khû̌ǎshû̌sho. A ma̤hǎmǎkè pwa̤khû nějǎphû̌ dǒ Isôrě̤lakhlilè akla. o 32Asî kè̌shǐtṳ̌bǎ ta̤ma̤anǎ̤ pô̤̌o bǎbǎkǎlè a ma̤sǔma̤plě hènè pepe. Asî yṳ̌ǎnṳ̌ lô̌khô Cǒmara ata̤ma̤cô̌klǐcô̌sè tô̤̌tô̤̌. 33Ma̤pô̤̌nudě a no putǔkè asî lṳmṳ̌ni̤. Asî ta̤ô̌htûpwa̤ nî̌ a lǒbe kû̌ ta̤tirǐsò̌ ǐsha. 34Bǎ Cǒmara ma̤si kòyò dǒ asîkla akhanu, a ô̌kè tokhlǒ kè̌lǎǐ lô̌khô a. Asî yò̤lǎ̤plǎdî̌ anǎ̤ dě a gû̌ shapwǎ̤ Cǒmarakò. 35Asî gènè̤htò̌bǎ kû̌ Cǒmaradû̌ mî̌ lǒ̤dû̌ dǒ a takabǐnṳ̌ asî. A mî̌ Cǒmara dǒ adû̌ahtûlǒ tôpwa̤, a rû̌htò̌ge asî. 36Bǎbǎkǎlè asî khû̌phě tôbǎ dě a jî̌htû̌sò̌htò̌phô̌phô̌ lô̌khô Cǒmaradû̌. Asî plî̤ tôbô dě a hî̌bǎ lahǎlahò lô̌khô lû̌û. 37Asî ô̌měô̌gle kû̌ Cǒmara tô̤̌. Asî cǒ kû̌ ata̤olò̤ tô̤̌tô̤̌. 38Bǎbǎkǎlè, Cǒmara gwèbǎǐ pe asî pwǎ. A plûkè asî ta̤sǔta̤plě. A ma̤pî̌ma̤lṳ̂̌ bò asî tô̤̌. Tôplǎ hto tôplǎ akhò ǐtûû̌ ata̤sǎphlǒdû̌. Asǎphlǒ jǎlò̤ sô̌. 39Cǒmara gènè̤htò̌bǎ kû̌ asî mî̌ kòyò hǎkhû̌phû̌. Asî ô̌htûpwa̤ tûrû̌tûshò̌ nô̤̌ asi hto dě ahtûpwa̤jò tîkhî sô̌ tô̤̌, asô̌sô̌kû̌ gili̤sǎ sǎcû̌kè. p 40Asî ma̤ tukutakǎ sala̤la̤ Cǒmara dǒ gǎshashigǎkhû̌. Asî ma̤ sǎplǎ̤nǎ̤bǎ sala̤la̤ lû̌û dǒ gǎshashigǎ lǒ̤sîmî̌khû̌. 41Asî ma̤kè̌kè̌ lô̌khô Cǒmaradû̌ tôplǎ hto tôplǎ. Asî ma̤sǎphlǒdû̌ Îsôrěla a Cǒmaradû̌ dǒ aplò̌ashî̌ nutôpwa̤ tôhu hto tôhu. 42A gènè̤̌htò̌bǎ pe Cǒmara ata̤pô̤ta̤phǎ tô̤̌. A gènè̤bǎ pe Cǒmara rû̌htò̌ge asî dǒ pwa̤sǎkhě asî nutokhlǒ acǔdekû nutôni̤ tô̤̌tô̤̌. 43A ma̤lṳ̌ bǎ asî ta̤cô̌klǐcô̌sè dǒ Ijǐgǎkû, a ma̤kiti̤kaa ǒò̌ cô̌klǐ dǒ Sû̌agǎ ya̤dakhû̌ pwǐonu dě asî gènè̤̌htò̌bǎ pe lô̌khô tô̤̌tô̤̌. 44Pô̤̌khô Ijǐ shiphû̌gǎphû̌ glè̌ ôjò pe shi dǒ asî shilô̤̌mǒ̤kû tô̤̌nu, Cǒmara no htûhtò̌kè bò asî shi kû̌ sǐ. q 45A plûhè kadǎ saprṳ̂dû̌, a no hèě kû̌ asî. r A plûhè dî̌phû̌ saprṳ̂dû̌, a no ma̤pî̌ma̤pò̌kèbò asî hǔklakhû̌. s 46A no ěkèbò asîbǔ kobǐkobe tokhlǒ kû̌ dèpǒ̤. A no ma̤pî̌kèbò asî kǎ plǒǐ sǒsusǒsǎ tokhlǒ kû̌ dèmǒ̤pwǎ̤. t 47Cǒmara no julò̤tě̤pî̌ kèbò asî sîpî̌mṳ̌ kû̌ siwǐ̤jî̌. A no lò̤si kèbò asî dǔshimṳ̌ kû̌ shicò. u 48A no julò̤ si kèbò asî pṳ̂̌pa̤nǎ̤ kû̌ siwǐ̤jî̌. A no shî̌lî̌ si kèbò asî ta̤phû̌ta̤wè̤. 49A dǐsî̌ganǎ̤ tě̤tě̤mè̤̌mè̤̌ asî kû̌ ata̤sǎphlǒdû̌. Ata̤sǎphlǒdû̌, ata̤sǎphlǒkě, ata̤sǎphlǒdû̌ li̤pi̤sǐnu a hè asô̌sô̌kû̌ tanaphû̌ dǒ a hèma̤si kòyònu. v 50A khòǐ tûû̌ ata̤sǎphlǒdû̌ tô̤̌. A sǎleǐ asî ta̤htûpwa̤ tô̤̌tô̤̌. A no kè̌shǐtṳ̌bǎ asî kû̌ ta̤shasiwě̤. 51Lǒ̤bò phû̌pwa̤khû wè̤̌pwǎ̤ dǒ Ijǐgǎkû tokhlǒnu bǎbǎ, Phahama ▼▼Phahama mî̌ Phanṳ̂̌a aphû̌ tôpwa̤ dǒ a khlilò̤ tutṳ̌ kû̌ Ijǐphû̌ tokhlǒ.
ahǐphû̌phòphû̌ pṳ̂̌tômṳ̌ aphû̌pwa̤khû wè̤̌pwǎ̤ tokhlǒ bǎbǎ, Cǒmara ma̤si asî. x 52A gesû a kòyò sô̌sô̌kû̌ kòyò kè̌pǒ̤ǐ sû̌phû̌. A yṳ̂̌klè̌nè̌klòge asî sô̌sô̌kû̌ sû̌phû̌ tôprṳ̂ dǒ gǎshashigǎkhû̌. y 53A gesû tûdûwô̌ asî dě a ǐsha pe tôcǒ tô̤̌. Pwa̤sǎkhě asî tokhlǒ khû̌dayadě shidû̌shite̤we̤ lò̤cǔsi kèbò asî. z 54A gesû a kòyò dǒ agǎ plò̌shǐ, shô̌kla nutôgǎ dǒ a ma̤ kû̌ asîrîpô̤phǎnu. aa 55A wṳ̂̌hǎhtò̌kè kòyò khlilèphû̌ tokhlǒ dǒ asî lô̤mô̤̌. A bèpè̤̌lò̤ bǎ hǎkhû̌ kû̌ Isôrěla khlilèphû̌ dǒ asî û̌cata̤bǐ aya. A no ô Îsôrěla akhlialè bǎ asî hǐ tûû̌ akû. ab 56Asî ma̤kè̌bǎ lô̌khô Cǒmaradû̌. ac A ma̤ takǎ Cǒmara dǒ adû̌ahtû gutṳ̌. A jûlě̤phǐ ta̤sû̌ta̤tòwò tokhlǒ tô̤̌. 57Asî sǎphlǒ lûkhô̌ kè, a gû̌ kû̌ ayô̤̌ tô̤̌, a sô̌sô̌kû̌ asîphiphu. Asô̌sô̌kû̌ plǎ̤ tegwe dǒ kòyò khǎ dě a lûcǒ tô̤̌. ad 58Asî ma̤htò̌khô̌ lǎ̤cabahtò̌ Cǒmara dǒ ashǔshawa̤ tokhlǒ ahôphû̌ dǒ ahtò̌yô̤̌ tôkû akhû̌akhî, a ma̤ sǎphlǒdû̌ jî̌jî̌ Cǒmaradû̌. Dǒ asî cabahtò̌ pwa̤yô̤pwa̤gî̌ tokhlǒ akhû̌akhî, a ma̤ sǎphlǒdû̌ mî̌ca lû̌û. 59Bǎ Cǒmara ganǎ̤de asî ma̤ pô̤̌nu akhanu, a sǎphlǒdû̌ jî̌jî̌ asî. A htû̌tiwǐ phlǔkè Isôrělaphû̌ tokhlǒ. ae 60A wîkè ahǐphû̌ plò̌shǐ dǒ Wî̤̌sǐlû dǒ a ma̤htò̌ǐ alǎ̤ô̌ bǎ kòyò hǎkhû̌phû̌ akla nutômè. af 61A dǐphǐcû̌kè ta̤olò̤ tǒplò̌shǐ amè̤̌kû̌ asîrîpô̤phǎnu kû̌ pwa̤sǎkhě asî nutokhlǒ. A ǐcû̌kè asîrîdû̌sîrîhtû dǒ asî acǔdekû. ag 62A sǎphlǒdû̌ tûlû̌shû̌lě a kòyò. A ǐlò̤ akòyò tokhlǒ dǒ pwa̤sǎkhě asî tokhlǒ acǔdekû dǒ a glè̌ ma̤sikè asî kû̌ nò̌shî. 63Pwa̤khûphû̌sǎ sî si kèbò dǒ ta̤shěta̤pě̤kû akhû̌akhî, pwa̤mǒ̤phû̌sǎ lǎ̤phǐ awṳ̂ ô̌pe tôpwǎ̤ tô̤̌. ah 64Kòyò shusi kèbò pwa̤lṳhtò̌ta̤ kû̌ nò̌shî. Pwa̤mǒ̤khwè̌ hǎwô pe tô̤̌tô̤̌. ai 65Khònò̤̌dě, Běcǎdû̌ hèma̤jè̌khô̌ asî asô̌sô̌kû̌ a hǎmôô̌ shôpe̤ dǒ awǐkha dě a sî̌nǎnu. A asô̌sô̌kû̌ kliphû̌ tôpwa̤ ômṳ shishǐkhǎ dě pě̤ihtǒ sumṳ̌. 66A wṳ̂̌hǎhtò̌gekè pwa̤sǎkhě lû̌û tokhlǒ. A ma̤shòwò̤̌ asî tûjû̌pwa̤. 67A htû̌tiwǐkè Phayṳ̂tǎ akhlialè lǎ̤. A rû̌htò̌ pa Pha Ebere akhlilèphû̌ tô̤̌tô̤̌. 68A cû̌rû̌htò̌ kè dǒ Yǔdakhli kû̌ khôlô Sǐû dǒ a mô̤ǐnu tômè. 69A bô̌htò̌ǐ agûlǎ̤ plò̌shǐ dǒ asô̌sô̌kû̌ ahǐ dǒ mǒkhû̌. Ata̤lṳ̌htò̌hô nî̌ a měgletònò sô̌sô̌kû̌ hǎkhû̌ dǒ a bô̌lò̤ǐ tûjû̌pwa̤ talakhǎnu. 70A rû̌htò̌ǐ apwa̤ma̤ta̤phû̌ Khûdawi̤. A kaǎhtò̌ lû̌û dǒ sû̌phû̌ lǎ̤shaǎ gûlǎ̤. aj 71A kaǎ lû̌û dǒ a glè̌ kè̌ǐ sû̌phû̌ aya. A no kè̌pǒ̤ǐ lû̌û kû̌ Phayakò akhlialè, Isôrě̤laphû̌ dǒ amè̤̌ Cǒmara a kòyò. 72Khwǐdawi̤ kè̌ǐwô̌ asî kû̌ ta̤sǎphlǒcǒsǎphlǒtè̤. A sûcû̌ǐ asî kû̌ ta̤sî̌ta̤jò̌.
Copyright information for
KxfSCKXF