Psalms 81
Ta̤sǎwǐ dǒ pwèdû̌ aya
Pha Asa ata̤sǎwǐ htû̌sò̌htò̌. Ta̤sǎwǐ numî̌ pwa̤sǎwǐ ta̤tokhlǒ aikǒlǒkò dǒ ta̤lṳhtò̌hôkû nutôpwa̤ aya. Dě tôbǎ sǎwǐ wô̤̌wô̤̌kû̌ pwa̤dǒ ta̤dǒta̤ǔ mî̌ a dǒ ta̤dǒta̤ǔ dǒ apli̤ nutokhlǒ.
1Sǎlě̤sǎlò̤ sǎwǐhtûsò̌htò̌ Cǒmaradû̌ amè̤̌kû̌ pakhû̌ǎ akòshî̌kòtṳ̌nu. Yî̤̌kǒ htû̌sò̌htò̌ Phayakò a Cǒmaradû̌. 2Sǎwǐsǎshô̌, plǎ̤nṳ̌ cî̌ja, tôglô̌ pwe̤nǐ̤ tǐtutegwedû̌, tǐtute̤gwephû̌. 3Ǔpwe̤mò̌ kǐlû bǎ lahtò̌sa nutôla, bǎ pa pwè labǎ nutôni̤. a 4Hǒomî̌ Isôrěla khlilèphû̌ tokhlǒ ta̤sû̌ǐta̤tòwòǐ, Phayakò a Cǒmaradû̌ ata̤hî̌lò̤ yô̤̌sǎ. 5Bǎ Cǒmaradû̌ shěshǔ Ijǐgǎ akhanu, a ǐ kè Khûyṳ̂tǎ akhlialè tokhlǒ ta̤sû̌ta̤tòwò hǒtômû. He ganǎ̤de alě̤ dǒ he ganǎ̤de nô̌ tôkhò̌꤮ tô̤̌ tômû. 6A hî̌ kû̌, “He phî̌lò̤tě̤kè hto ta̤wǐta̤ò̌ dǒ na plekhû̌ hǒ. “Na lǎ̤lṳ̂ yò̌ pe sû̌phò̌ kû̌ tě̤ta̤htǒ nutô̤̌ hǒ. 7“Bǎ na khòbǎ ta̤pò̤̌ta̤sha akhanu, na kwisǎyṳhtò̌ he dě he ma̤hǎplǎge na. “He ô̌tûdûbǐ dǒ poǒlṳ̌ khǐsiwi, shî̌lî̌lò̤ mǒgǒ akû dě he hî̌shǔ na. b “He ma̤kè̌kè̌ na dǒ Merǐbǎ shipǒ̤htò̌gûlǎ̤ nutôkû. c 8“Ǒ꤮ kòyòsî, he gǔ dǐsè̌rè̌ sî pě, ganǎ̤de lô̌khô nî̌. “Ǒ Isôrělaphû̌sî, he sǎyṳpwǎtǒ̤꤮ sî jûlě̤ ganǎ̤de heyô̤̌ nô̤̌. 9“Dǒ sîklanu Cǒmara dǒ ashǔshawa̤ tokhlǒ bǎ ô̌ tô̤̌. “Sî tôbǎ cabanṳ̌ khlilèphû̌ shǔshawa̤ a Cǒmara tô̤̌. d 10“He mî̌ Cǒmara tûjû̌pwa̤ amè̤̌kû̌ sî Cǒmaradû̌, he kaǎhtò̌ hǎplǎge sî dǒ Ijǐgǎkû. “Kwi mò̌ he, he ǐ sî pě. 11“Bǎbǎkǎlè he kòyò ganǎ̤de heyô̤̌ tô̤̌. “Isôrělaphû̌ jûǎ he yô̤̌ tô̤̌. 12“Pô̤̌nukhû̌khî, pô̤̌ asî ikǒpwǐnu, he dǐma̤ sělě kè hǒ. “Pô̤̌ asî sǎyṳ ô̌htûpwa̤nu, he dǐ ô̌htûpwa̤ kè asî hǒ. 13“He kòyò tokhlǒ, he sǎyṳ no ganǎ̤de tǒ̤ heyô̤̌ nô̤̌. “Isôrělaphû̌ tokhlǒ, he sǎyṳ no gû̌ tǒ̤꤮ heklè̌heklò nô̤̌. 14“Asî kè̌ma̤ pô̤̌numî̌, he glè̌ ma̤pè̤̌phwèkè bǎ pwa̤sǎkhě asî. “He glè̌ shěpè̤̌kè bǎ pwa̤sǎkhě asî. 15“Kòyò dǒ a sǎkhě he, glè̌ hè dô̌gînîlò̤ bò dǒ he lô̤mô̤̌ kû̌ ta̤gònò̤̌gèglè ǐsha. “Asî glè̌ khòbǎ ta̤cî̌htò̌ tûjû̌pwa̤ talakhǎ pě. 16“Dǒ sî khû̌dayadě he dǐǎ sî kû̌ bǔkû̌lǎ dǒ awô̌ gutṳ̌. “He dǐô sî kû̌ wè̌khû̌shi dǒ lǒ̤kû pě.” e
Copyright information for
KxfSCKXF