Psalms 83

Ta̤kwicaba dǒ pwa̤sǎkhě Isôrělaphû̌ tokhlǒ glè̌ lò̤jû̌ kè aya

Pha Asa ata̤sǎwǐ htû̌sò̌htò̌

1Ǒ Cǒmaradû̌, ô̌ sǔtukǔ tǎ̤mǎ̤, jî̌koo tǎ̤mǎ̤.

Ǒ Cǒmaradû̌, sǔsǔ꤮ ô̌ tǎ̤mǎ̤ nî̌꤮.

2Kè̌mò̌, pwa̤sǎkhě na tokhlǒ ma̤ pi̤ti̤pṳ̂tṳ̂ bò hǒ.

Kòyò dǒ a sǎkhěkhû̌khwè na nutokhlǒ a shěshǔ lô̌khô na hǒ.

3Asî tîwî̌tòwò hǔsè̌ ta̤ dǒ a glè̌ hèshě lô̌khô na kòyò tokhlǒ.

Asî gènè̤kě ma̤phǔmò̤̌ lô̌khô kòyò dǒ na tugǔtaka ǐ nutokhlǒ.

4Asî hî̌ lô̌khô kû̌, “Cû̌꤮, pô̤̌khô kòyò glè̌ shôpe̤ kèbò Isôrěla khlilè tajû̌꤮ pwa̤, pa cû̌ma̤pî̌ma̤lṳ̂̌ bò asî khlilèphû̌ tǎ꤮.”

5Asî sǎphlǒjû wô̤̌wô̤̌ lû̌ dǒ asî ta̤gènè̤hǔ gènè̤sè̌nu akû.

Asî sǎphlǒ tô wô̤̌wô̤̌ lû̌û dǒ a glè̌ shěpě̤ shěshu lô̌khô na.

6A ô̌pe kwè̌ khlilè titè hî̌dě, Ědûgǎphû̌ kû̌ Ǐshômelǎ khlilè, Mò̤bǎgǎphû̌, Haka khlilèphû̌, 7Kebalǎgǎphû̌, Amṳ̂gǎphû̌, Amalè̌ khlilèphû̌, Phǐlǐsitǐgǎphû̌, Wî̤̌htutǔphû̌ sîtokhlǒ hǒ.

8Ashǔrǎgǎphû̌ tokhlǒ mî̌ asǎphlǒ jû kû̌ asîsî.

Asî ma̤jè̌ padô̌ Phalòtǎ akhlialè amè̤̌kû̌ Amṳ̂phû̌ kû̌ Mò̤̌bǎphû̌ sîtokhlǒ.

9Ma̤mò̌ asî pô̤̌ na ma̤ Mǐdiya khlilèphû̌, ^a Khwǐsǐsèrǎ kû̌ Khwǐcabi dǒ Bǐshû shilô̤̌mǒ̤htunu. ^b

10Asî si kèbò dǒ Wî̤̌edò̌rǎ nutôkû, asî nǎ̤glǒ tokhlǒnu, asoalǒ kèbò bǎ hǎkhû̌nu.

11Ma̤mò̌ asî ikǒlǒkò tokhlǒ pô̤̌ na ma̤ Khwǐûrǐbǎ kû̌ Khwǐsebǎnu. ^c

Ma̤ bò mò̌ asîkhwǐ aphû̌pwa̤khû tokhlǒ pô̤̌ na ma̤ Khwǐseba kû̌ Khwǐsalamǔnanu. ^d

12Pwa̤sǎkhě nutokhlǒ hî̌ lô̌khô kû̌, “Cǒmaradû̌ agǎ tokhlǒnu pa phî̌ kû̌ paya tǎ.”

13Ǒ꤮ Cǒmaradû̌, no lûcû̌ kèbò asî pô̤̌ gili̤piwi̤ sǎcû̌kè hǎkumṳ̌nu.

No lûcû̌ kèbò asî pô̤̌ gili̤sǎ sacû̌kè phîmṳ̂̌.

14Gû̌lṳ̂ pṳ̂̌ mò̌ asî pô̤̌ mî̌ lěu gǎpwǎ̤gono̤, pô̤̌khô mî̌ lěucû̌ khôlô sînu.

15Gû̌lṳ̂ pṳ̂̌ mò̌ asî kû̌ na gili̤sǎdû̌.

Ma̤gònò̤̌gèglè ǐsha mò̌ asî kû̌ na gili̤piwi̤dû̌.

16Ǒ꤮ Cǒmara tûjû̌pwa̤, pô̤̌khô asî glè̌ kè̌lǎ htû̌tiwǐ ge tîkhîsô̌ na ayanu, ma̤sòwò̤̌ sikè mò̌ asî.

17No ǐsha sòwò̤̌kè asî tûjû̌pwa̤.

No si sòwò̤̌kè asî.

18Na ma̤ pô̤̌nutô̤̌ mî̌ asî glè̌ sî̌ganǎ̤hè kû̌ na mî̌ Cǒmara tûjû̌pwa̤.

Asî glè̌ sî̌ganǎ̤bò kû̌ tǒ̤꤮ pwǎ na mî̌ Cǒmara dǒ adû̌ahtûlǒ dǒ a pǒǐ hǎkhû̌běkhû̌nu.