Psalms 86
Kwicabahtò̌ ta̤ma̤jè̌
Khwǐdawi̤ ata̤kwicaba
1Ǒ꤮ Cǒmara tûjû̌pwa̤, kòyò ma̤jî̌ma̤jû̌bò he, he shôdô pwa̤ma̤jè̌ akhû̌akhî, ganǎ̤de mò̌ he kwihtò̌ nanu dě ma̤jè mò̌ he nî̌꤮. 2He cǒ kû̌ he yô̤̌ akhû̌akhî, takabǐ mò̌ he. Ǒ꤮ he Cǒmaradû̌, ma̤hǎplǎge na pwa̤ma̤ta̤phû̌ dǒ a yṳ̌ǎnǎla̤ǐ nanu nî̌꤮. 3Ǒ Běcǎdû̌, he kwisǎyṳhtò̌ na tônǐ̤mṳ̌hǎ akhû̌akhî, gwèbǎǐ he nî̌. 4Ǒ꤮ Běcǎdû̌, he kwicabahtò̌ na akhû̌akhî, ma̤ sǎlě̤sǎlò̤ǐ na pwa̤ma̤ta̤phû̌ nunî̌꤮. 5Ǒ꤮ Běcǎdû̌, na wô̌ mî̌ca, na plûkè kòyò ta̤sǔ. Na ta̤mô̤ dǒ a hǎbòjò tô̤̌nu, na dǔlṳ̌ bǎ kû̌ lǒ̤bò kòyò dǒ a kwisǎyṳhtò̌ na nutokhlǒ. 6Ǒ꤮ Cǒmara tûjû̌pwa̤, khòsǎdô ganǎ̤de mò̌ he ta̤kwicabahtò̌ nanu. He kwisǎyṳhtò̌ nadě, khòsǎdô dò̌ bǎ he na nò̌ku nî̌꤮. a 7Na ganǎ̤de he ta̤kwicaba pě akhû̌akhî, bǎ he khòbǎ ta̤pò̤̌ta̤sha akhanu, he kwisǎyṳhtò̌ na. b 8Ǒ꤮ Běcǎdû̌, Cǒmara dǒ asô̌sô̌kû̌ nanu a ô̌ tôpwǎ̤ tô̤̌. Pwa̤ dǒ a ma̤jò sô̌sô̌kû̌ nanu a ô̌ tôpwa̤꤮ tô̤̌tô̤̌. 9Ǒ꤮ Běcǎdû̌, lǒ̤bò kòyò khlilèphû̌ dǒ na bô̌lò̤ tokhlǒnu, asî hè cubucabahtò̌ bò dǒ na lô̤mô̤̌ pě. Asî gǔ htû̌sò̌htò̌ lô̌khô na ta̤sîrîdû̌sîrîhtû pě. c 10Na siwi̤sòwò̤ mî̌ ashû̌asho. Na ta̤ma̤ mî̌ acô̌klî̌cô̌sè. Cǒmara mî̌ tǒ̤ na tôpwa̤ nô̤̌. 11Ǒ Cǒmara tûjû̌pwa̤, pô̤̌khô he glè̌ ô̌htûpwa̤ pô̤̌ na ta̤cǒta̤tè̤ ayanu, sû̌ǐtòwòǐ mò̌ he naklè̌naklò. d Pô̤̌khô he glè̌ ǐsha bè̌dubè̌nǎ̤ nami̤ ayanu, ǐ he sǎphlǒ tômèbò dǒ a jûǎ nanu nî̌. e 12Ǒ꤮ Běcǎdû̌, he Cǒmaradû̌, he gǔ htû̌sò̌htò̌ na kû̌ he sǎphlǒ tômèbò. He gǔ shôbǐǐlṳ̌ bǎ kòyò kû̌ na wô̌ gutṳ̌nu tûjû̌pwa̤ pě. 13Na mô̤nǐ̤ he kû̌ na ta̤mô̤ dǒ ahǎbòjò tô̤̌nu awô̌ jî̌jî̌ dǒ heya. He glè̌ tǒ̤ tûlû̌kè dǒ lṳ̌gǎnǎdo akha na ma̤hǎplǎge he. 14Ǒ Cǒmaradû̌, kòyò bè̌dû̌bè̌pwǎ̤ anǎ̤ tokhlǒ hèshě lô̌khô he. Kòyòkhu kòyòhe dǒ a bè̌dubè̌nǎ̤ gû̌ kòyò Cǒmara tô̤̌ tokhlǒ kè̌lǎ ma̤si lô̌khô he. f 15Bǎbǎkǎlè ǒ Běcǎdû̌, na mî̌ Cǒmara dǒ a gwèbǎǐ kòyò, a ma̤bwǐma̤sîsî kòyò, na sǎphlǒhtû, na lǒbe kû̌ ta̤mô̤ dǒ ahǎbòjò tô̤̌. Na lǒbe kû̌ na ta̤cǒ kû̌ yô̤̌. g 16Htû̌tiwǐ kè̌tîkhî he, gwèbǎǐ mò̌ he. Ǐmò̌ na pwa̤ma̤ta̤phû̌ kû̌ nakhû̌naǎnu. Ma̤hǎplǎge mò̌ napwa̤ma̤ta̤phû̌ aphû̌pwa̤khûnu. 17Ǒ Cǒmara tûjû̌pwa̤, dǒ na ma̤jè̌ he, na ma̤mô̤nṳ̌ he akhû̌akhî, pwa̤sǎkhě he tokhlǒ shòwò̤̌ kèbò pě. Dǔlṳ̌ pè̤̌mò̌ he kû̌ na ta̤wô̌ dǒ heya ata̤ma̤mǎnǎ tôcǒcǒnu. Htodě asî kè̌shǐ na ta̤mǎma̤dòǐ, dě a glè̌ shòwò̤̌ kèbò pě.
Copyright information for
KxfSCKXF