Psalms 88

Kwisǎyṳhtò̌ ta̤ma̤jè̌

Phakû̌ri akhlialè tokhlǒ ata̤sǎwǐ htû̌sò̌htò̌. Dě ta̤sǎwǐ numî̌ pwa̤sǎwǐ ta̤ tokhlǒ aikǒlǒkò dǒ ta̤lṳhtò̌hôkû nutôpwa̤ aya. Dě tôbǎ sǎwǐ sô̌sô̌kû̌ mahalasa lî̤nû̌sa ta̤sǎwǐ nutôshǒ. Esarǎhǐ khlilèphû̌ Khûhema ata̤sǎwǐ nutôshǒ mî̌ dǒ Hebrǔyô̤̌nu, a kaǎ lû̌kû̌ Masakǐla ta̤sǎwǐ dě ta̤sǎwǐ nutôshǒmî̌ a ǐ kòyò ta̤sî̌yaphlôphǎ.

1Ǒ꤮ Cǒmara tûjû̌pwa̤, Cǒmara dǒ pwa̤ma̤hǎplǎge he.

He hè dǒ na lô̤mô̤̌ dě he kwicabahtò̌ na lṳ̌mṳ̌khǐkhǐ lṳmṳ̌shasha.

2Ganǎ̤de mò̌ he ta̤kwicabahtò̌na nunî̌꤮.

Dò̌ na nò̌ku dǒ he kwihtò̌ na ta̤ma̤jè̌nu.

3He ta̤ô̌htûpwa̤nu a ô̌ còcè̌꤮ ta̤pò̤̌ta̤sha.

He hètǒ̤ phǔtinǐ̤ kû̌ lṳ̌gǎnǎdo hǒ.

4Kòyò bè̌plǒ bò he dǒ kòyòsi tokhlǒ akla.

He sô̌sô̌kèkû̌ kòyò dǒ akhûaǎ ô̌pe tô̤̌ tôpwa̤ hǒ.

5Kòyò wîkèplǒbò he kû̌ kòyòsi,

Kòyò bè̌hǎmôô̌kè he sô̌sô̌kû̌ lṳ̌tṳ̂̌ dǒ lṳ̌kûnu hǒ.

Na shôpe̤shônǎ lṳ̌tṳ̂̌ hǒ, na ma̤jè̌ pe lû̌û tôcǒ tô̤̌.

6Na bè̌lò̤tě̤kè he dǒ hǎkûlò̤yô̤̌ khǐsiwilǒ nutôkû hǒ.

7Na ta̤sǎphlǒdû̌nu ashû̌mî̌ca dǒ heya.

Na sǎphlǒdû̌ asô̌sô̌kû̌ shipěpǒdû̌ plǒbǐ bòkè he.

8Na no ô̌tepheyî̤ kèbò he sû̌khômô̤ kû̌ he.

Na no ma̤yǒ̤ bò he kû̌ asî.

He ô̌tò̤̌kè dǒ apô̤kû dě he hǎhtò̌bò̌ pe tô̤̌.

9He khòbǎ tûlû̌꤮ shû̌lě ta̤pò̤̌ta̤sha akhû̌akhî, he mǐ̤sǎ khǐpô̤lô̤̌bò hǒ.

Ǒ꤮ Cǒmara tûjû̌pwa̤, he kwicabahtò̌ na pṳ̂̌ni̤pṳ̂̌sa.

He yṳ̂̌htò̌ he cǔde dǒ naô̌ dě he kwicaba htò̌ na.

10Na dǔlè̌lṳ̌ cǎ na ta̤cô̌klî̌kǐya kû̌ kòyòsi tokhlǒ ya?

Kòyòsi tokhlǒ mî̌ a ihtǒhtûpwa̤ getîkhî dě a htû̌sò̌htò̌ cǎ na ya?

11Dǒ lṳ̌gǎnǎdo numî̌ kòyò cû̌shôbǐǐ cǎ na ta̤mô̤ dǒ ahǎbòjò tô̤̌nuya?

Tô̤̌mî̌ dǒ ta̤pî̌ta̤lṳ̂̌ agûlǎ̤nu kòyò cû̌shôbǐǐ cǎ na ta̤cǒ kû̌ na yô̤̌ ya?

12Dǒ ta̤khǐsiwi̤ aklanu, kòyò kè̌shǐ jò cǎ na ta̤cô̌klî̌kǐya ya?

Gûlǎ̤ dǒ kòyò si hto dě kòyò shôpe̤kè lû̌û nutôkû kòyò sî̌yajò cǎ na ta̤cǒta̤tè̤ ya?

13Ǒ꤮ Cǒmara tûjû̌pwa̤, he khû̌dayadě, he kwisǎyṳhtò̌ na ta̤ma̤jè̌.

Pṳ̂̌꤮ wô̤̌wô̤̌ he kwihtò̌ na.

14Ǒ Cǒmara tûjû̌pwa̤, na cû̌ wîkè he ma̤titè?

Na cû̌kè̌khô̌kè he ma̤titè?

15He kè̌shǐtṳ̌bǎ kû̌ ta̤pò̤̌ta̤sha dě he glè̌si tè̤tè̤̌kè dǒ he phijǎkha pe hǒ.

He khòbǎ na ta̤ma̤ǐsha tirǐsò̌.

Dǒ he yanu, ta̤ma̤jè̌ ô̌ pe tôcǒ꤮ tô̤̌.

16Na ta̤sǎphlǒdû̌ nî̌ a lò̤hǔbǐbòkè he hǒ.

Na ta̤ma̤ǐsha nutokhlǒ ma̤pî̌ma̤lṳ̂̌ bò he hǒ.

17Asî ô̌ te̤we̤bǐbò he sô̌sô̌kû̌ shidû̌bǐ bò he tônǐ̤mṳ̌hǎ.

Asî ô̌bǐ te̤we̤bòkè he pṳ̂̌tôkhô.

18Na no cû̌ô̌ tepheyî̤ kèbò he sû̌khômô̤, he hǐphòkòshǐ tokhlǒ kû̌ he.

He sû̌khômô̤ dǐô̌kè tûû̌ he dǒ ta̤khǐsiwi̤ akla.