Psalms 89

Cǒmara tûjû̌pwa̤ ata̤olò̤ kû̌ Khwǐdawi̤

Esarǎhǐ khlilèphû̌ Pha Etana ata̤sǎwǐ nutôshǒ mî̌ dǒ Hebrǔyô̤̌nu, a kaǎ lû̌kû̌ Masakǐla ta̤sǎwǐ dě ta̤sǎwǐ nutôshǒ mî̌ a ǐ kòyò ta̤sî̌yaphlôphǎ.

1Ǒ Cǒmara tûjû̌pwa̤, na ta̤mô̤ dǒ ahǎbòjò tô̤̌nu, he sǎwǐhtò̌ tûjû̌pwa̤ pě.

Na ta̤cǒ kû̌ yô̤̌nu, he gǔ shôbǐǐlṳ̌ bǎ kòyò dǒ nô̌kò tôhtu hto tôhtu.

2Nata̤mô̤ dǒ ahǎbòjò tô̤̌nu aô̌měô̌gle tûjû̌pwa̤ awe̤akènu, he gǔ shôbǐǐlṳ̌ bǎ kòyò.

Nata̤cǒkû̌yô̤̌nu aměagle asô̌sô̌kû̌ mǒlǎ̤.

3Na hî̌ kû̌, “He olò̤ tû̌ heyô̤̌ kû̌ he rû̌htò̌ kòyò nutôpwa̤.

“He olò̤ hto heyô̤̌ kû̌ hepwa̤ma̤ta̤phû̌ KhûDawî̤.

4“‘Nakhlinalè gǔ htû khwǐ tûjû̌pwa̤.

“‘He gǔ nopǒǐ nakhlinalè dǒ nô̌kò tûjû̌pwa̤.’” ^a

5Ǒ Cǒmara tûjû̌pwa̤, mǒkhû̌phû̌ tokhlǒ htû̌sò̌htò̌ nata̤ma̤ cô̌klǐcô̌sè.

Lǒ̤bò tanaphû̌ tokhlǒ hèhtû̌sò̌htò̌ wô̤̌wô̤̌ lû̌ nata̤cǒkû̌yô̤̌.

6Ǒ Cǒmara tûjû̌pwa̤, dǒ mǒkhû̌nu, kòyò tǎ̤ bò̌ kû̌ nanu a ô̌ tôpwa̤꤮ tô̤̌.

Dǒ mǒkhû̌ tanaphû̌ aklanu, kòyò sô̌sô̌kû̌ nanu a ô̌ tôpwa̤꤮ tô̤̌tô̤̌.

7Mǒkhû̌tanaphû̌ aprṳ̂ dǒ asîrîshû̌sho tokhlǒ sǎǐsha lô̌khô Cǒmara.

Lǒ̤꤮ bò mǒkhû̌phû̌ dǒ a ô̌ te̤we̤phǔ nakòshǐ tokhlǒ, ǐsha bè̌dubè̌nǎ̤ mî̌ca na.

8Ǒ Cǒmara tûjû̌pwa̤, Cǒmaradû̌ dǒ a pǒ ta̤ lǒ̤꤮ bò, mò̌pè tôpwa̤ shû̌sho sô̌sô̌kû̌ na ya?

Ǒ Cǒmara tûjû̌pwa̤, nata̤cǒkû̌yô̤̌nu a ô̌tewe̤bò kû̌ na.

9Na pǒǐ shidû̌te̤we̤ ashipěpǒ tokhlǒ.

Bǎ shipěpǒ hèdû̌ akhanṳ, na noô̌kǔkè asî. ^b

10Na ma̤simè̤mè̤̌ bòkè pwa̤ dǒ aphǐdû̌phǐhtò̌lǒ anǎ̤. ▼

▼pwa̤phǐhtò̌yô̤̌ anǎ̤ mî̌ Ta̤dô̌kènè dě nukha dǒ kòyò kaǎ lû̌mi̤ kû̌ rakhǎ dǒ a shěshǔ Cǒmara tôpwa̤.

Nutôpwa̤. ^d

Na ma̤lûpò̌lûshe kèbò pwa̤sǎkhě nanu tokhlǒ kû̌ nacǔde dǒ ashû̌asho.

11Mǒkhû̌ bǎbǎ, hǎkhû̌ bǎbǎ, nata lǒ̤bò.

Hǎkhû̌ bǎbǎ, ta̤ ô̌ dǒ akû pṳ̂̌꤮ tôcǒ bǎbǎ, na bô̌lò̤ lǒ̤꤮ bò. ^e

12Gǎcôcî̌ bǎbǎ, gǎcûmû bǎbǎ, na tèlò̤ lǒ̤bò.

Tabû khôlô bǎbǎ, Heramṳ̂ khôlô bǎbǎ, a sǎlě̤sǎlò̤ htû̌sò̌htò̌ lô̌khô nami̤.

13Na cǔgô̌ mî̌ apô̤phǎ.

Na cǔde mî̌ ashû̌sho.

Na ta̤shû̌shokhò̌sho ma̤pè̤̌ bòkè ta̤.

14Nashinagǎnu na bô̌htò̌ kû̌ ta̤cǒta̤tè̤, ta̤tôta̤bǎ.

Napǒnasûǐ kû̌ ta̤mô̤ dǒ ahǎbòjò tô̤̌ kû̌ ta̤cǒkû̌yô̤̌.

15Ǒ꤮ Cǒmara tûjû̌pwa̤, kòyò dǒ a sǎwǐhtû̌sò̌ cubucaba htò̌ na, kòyò ô̌htûpwa̤ dǒ na lô̤mô̤̌ ata̤lîkû tokhlǒnu, a nǐ̤bǎ ta̤ǐshôwî̤.

16Dǒ nakhû̌nakhîdě asî sǎlě̤sǎlò̤ǐ tônǐ̤mṳ̌hǎ.

Dǒ na ta̤cǒta̤tè̤ akhû̌akhî, asî htû̌sò̌htò̌ na.

17Na mî̌ pwa̤ dǒ a ǐ pa ta̤sîrîdû̌sîrîhtû kû̌ ta̤khû̌ta̤ǎ.

Dǒ na sǎphlǒô̌ pa akhû̌akhî, pa nǐ̤bǎ ta̤ma̤pè̤̌.

18Pwa̤takabǐ pa mî̌ Cǒmara tûjû̌pwa̤.

Pa khwǐcôphǎ mî̌ Îsôrěla a Cǒmara dǒ aplò̌ashî̌ nutôpwa̤.

19Dǒ awǐkha, na bè̌lṳ̌htò̌ǐ nanǎ̤, na hî̌bǎlò̤ na kòyò dǒ a cǒ kû̌ yô̤̌.

Na hî̌ kû̌, “He ǐ shû̌htò̌shò̌htò̌ pwa̤htò̌shě ta̤shěta̤pě̤ nutôpwa̤ hǒ.

“He rû̌htò̌, bè̌htò̌yô̤̌ pwa̤nějǎphû̌ tôpwa̤ dǒ kòyò nutokhlǒ akla.

20“He kè̌shǐ he pwa̤ma̤ta̤phû̌ Khûdawi̤. ^f

“He plṳ̌ a kû̌ he htǒshi aplò̌shǐ, he rû̌htò̌ a kû̌ khwǐ tôpwa̤. ^g

21“He cǔde glè̌ ma̤jè̌ mî̌ca yǎ pě.

“He cǔde bè̌shû̌, he cǔgô̌ bè̌sho mè̤̌caca yǎ.

22“Pwa̤sǎkhě lû̌û tokhlǒ ma̤pè̤̌ jò lû̌û tô̤̌.

“Kòyòphû̌mò̤̌ pè̤̌ǎpè̤̌ô jò lû̌û tô̤̌tô̤̌.

23“He glè̌ ma̤pî̌ma̤lṳ̂̌phlǔkè bò pwa̤sǎkhě a tokhlǒ dǒ alô̤mô̤̌.

“He gǔ ma̤sikèbò kòyò dǒ a sǎkhě lû̌û nutokhlǒ.

24“He glè̌ kû̌ he yô̤̌, he glè̌ mô̤nṳ̌ yǎ kû̌ ta̤mô̤ dǒ ahǎbòjò tô̤̌.

“He no ma̤pè̤̌ lû̌û pṳ̂̌꤮ tôplǎ pě.

25“He gǔ no pǒ tǒ̤ yǎ dǒ shidû̌shite̤we̤kû.

“A glè̌ pǒ tǒ̤dǒ shilô̤̌mǒ̤dû̌ tokhlǒ a ô̌.

26“A glè̌ hî̌ he kû̌, ‘na mî̌ hepha, he Cǒmaradû̌, lǒ̤dû̌ dǒ a ma̤hǎplǎge he.’

27“He no htûhtò̌ a kû̌ he phû̌wè̤̌pwǎ̤, khwǐ dǒ asîrîdû̌sîrîhtûlǒ bǎ hǎkhû̌nu ^h.

28“He ta̤mô̤ dǒ ahǎbòjò tô̤̌nu a ô̌cu kû̌ lû̌û tûjû̌pwa̤ pě.

“He ta̤olò̤ glè̌ ô̌měô̌gle dǒ aya pě.

29“Akhlialè tokhlǒ htûhtò̌ khwǐ dǒ agûlǎ̤ tûjû̌pwa̤.

“Mǒkhû̌ kè̌ ô̌ gudǔdǔ mî̌, ashiagǎ ô̌měô̌gle gudǔdǔ pě.

30“Akhlialè kè̌ wîkè he ta̤sû̌ta̤tòwò, a kè̌ ganǎ̤de ô̌htûpwa̤ he ta̤mǎlò̤ tô̤̌, 31a kè̌ cû̌tûlû̌ khatili̤kè he ta̤sû̌ta̤tòwò, a kè̌ jûlě̤phǐ he ta̤mǎlò̤ tokhlǒ tô̤̌ mî̌, 32Dǒ a cû̌tûlû̌khatili̤, ma̤ta̤sǔta̤plě akhû̌akhî, he glè̌ po̤ asî kû̌ nò̌po̤, he glè̌ plè asî kû̌ wě̤. ⁱ

33“Bǎbǎkǎlè he mô̤ gudǔdǔ yǎ.

“He cǒkudǔdǔ kû̌ heyô̤̌.

34“He ma̤pî̌kè nô̌ he ta̤olò̤ tô̤̌.

“He hî̌tèplè̌ nô̌ he yô̤̌ tô̤̌tô̤̌.

35“He wṳ̂̌dòlò̤ heyô̤̌ kû̌ hemi̤ aplò̌shǐ tôplǎ dě ahtokè hǒ.

“He lòhô nô̌ Khûdawi̤ tô̤̌.

36“Akhlialè glè̌ htû khwǐ tûjû̌pwa̤.

“He no ô̌měô̌gle kudǔdǔ ashiagǎ sô̌sô̌kû̌ lṳmṳ̌.

37“Ashiagǎ ô̌měô̌gle tûjû̌pwa̤ sô̌sô̌kû̌ la.

“La numî̌ amè̤̌kû̌ ta̤khòlṳ̌ acǒatè̤ dǒ mǒlǎ̤,” Cǒmara hî̌ pô̤̌o.

38Ǒ Cǒmaradû̌, khònò̤̌ na sǎphlǒdû̌ khwǐ dǒ na rû̌htò̌ lû̌û nutôpwa̤.

Na wîkè a dě khôkǔkè yǎ hǒ.

39Na ma̤hǎpò̌kè na ta̤olò̤ kû̌ na pwa̤ma̤ta̤phû̌.

Na wîtě̤kè akhû̌glǒhta amè̤̌kû̌ atasîrîshû̌shonu dǒ hǎkumṳ̌kla.

40Na delò̤tě̤pro̤kèbò awî̤̌we̤dû.

Na detě̤pro̤kèbò awî̤̌we̤dû̌ dǒ atònò nuhǒ.

41Lǒ̤bò kòyò dǒ a cû̌ dǒ akòshǐ tokhlǒnu, a pṳ̂̌sigwǐyǒsaphǎbò lû̌û.

Khlilèphû̌ ô̌ dǒ akòshî̌ tokhlǒ mî̌ a pî̤jî̌ǐsho bò lû̌û. ^j

42Na no shû̌htò̌shò̌htò̌ pwa̤sǎkhě a tokhlǒ akhûaǎ.

Na ma̤mô̤sû̌mô̤sò̌bò pwa̤sǎkhě a tokhlǒ.

43Na nodu kèbò anò̌shî dǒ a noǎ kû̌ ta̤shěta̤pě̤.

Na shějè̌ pe ata̤shěta̤pě̤ tô̤̌.

44Na phǐge ata̤htûkhwǐ asîrîshû̌sho.

Na wîtě̤kè agògǒhtahtò̌yô̤̌ dǒ hǎkhû̌.

45Na no mǒ̤pwǎ̤yû lû̌û.

Na ma̤ sòwò̤̌sikè lû̌û.

46Ǒ Cǒmara tûjû̌pwa̤, na ta̤bè̌sûû̌ nanǎ̤ tǒ̤꤮ bǎkhòtè pě? Tûjû̌pwa̤ pě ya?

Na sǎphlǒdû̌ li̤pi̤sǐ sô̌sô̌kû̌ mî̌klû̌nu pe pwǐ꤮ tè? ^k

47Gènè̤bǎ pû he, he ta̤ô̌htûpwa̤nu aphǔ mî̌ca.

Kòyò lǒ̤bò dǒ na bô̌lò̤ a nutokhlǒ asiahǎmǎjò lǒ̤bò.

48Kòyò dǒ a ô̌htûpwa̤ sělě dě asijò tô̤̌nu a ô̌ tôpwa̤꤮ tô̤̌.

Pwa̤ dǒ a ma̤hǎplǎ jò anǎ̤ dǒ lṳ̌gǎnǎdo asîrîshû̌shonu a ô̌ tôpwa̤꤮ tô̤̌tô̤̌.

49Ǒ Běcǎ tûjû̌pwa̤, na ta̤mô̤ dǒ ahǎbòjò tô̤̌ dǒ na dǔlè̌lṳ̌ dǒ awǐkhanu, a ô̌ bǎtè?

Na ta̤mô̤ dǒ na wṳ̂̌dò nayô̤̌ kû̌ Khûdawi̤ dǒ acǒnu a ô̌ bǎtè?

50Ǒ Běcǎdû̌, gènè̤bǎ pû najû̌ khòbǎ ta̤pi̤jî̌ǐshonu.

Lǒ̤bò kòyò dǒ a cubucabahtò̌ na tô̤̌ tokhlǒ hî̌takhû̌takǎ ma̤shabò he sǎphlǒ hǒ.

51Ǒ Cǒmara tûjû̌pwa̤, pwa̤sǎkhě na tokhlǒ pî̤jî̌ǐsho bò he hǒ.

Khwǐ dǒ na rû̌htò̌ nutôpwa̤ a cû̌ bǎtètè̌ bǎbǎ, asî pî̤jî̌ǐsho bò lû̌û hǒ.

52Cǒmara tûjû̌pwa̤nu, kòyò gǔ htû̌sò̌htò̌ pû a tûjû̌pwa̤ talakhǎ nî̌. Ame̤, Ame̤.