Psalms 9

Hî̌bwǐhî̌sîrî htû̌sò̌htò̌ Cǒmaradû̌ ata̤ma̤tôma̤bǎ

Khwǐdawi̤ ata̤sǎwǐ htû̌sò̌htò̌. Ta̤sǎwǐ numî̌ pwa̤sǎwǐ ta̤ tokhlǒ aikǒlǒkò dǒ ta̤lṳhtò̌hôkû nutôpwa̤ aya. Ta̤sǎwǐpwe̤ numî̌ bǎ sǎpwe̤ sô̌kû̌ ta̤sǎwǐ dǒ ami̤ kû̌ hephû̌khû si nutôtô̤̌.

1Ǒ Cǒmara tûjû̌pwa̤, he htû̌sò̌htò̌ lǒ̤sû̌lǒ̤sò̌ na.

He gǔ shôbǐǐlṳ̌ bò kòyò kû̌ na ma̤ ta̤cô̌klǐcô̌sè.

2Dǒ nakhû̌nakhî dě, a sǎlě̤sǎlò̤, a ma̤ mô̤sû̌mô̤sò̌ he pě.

Ǒ Cǒmara dǒ adû̌ahtûlǒ, he sǎwǐhtûsò̌htò̌ nami̤ pě.

3Bǎ na dǔlṳ̌ nanǎ̤ kû̌ pwa̤sǎkhě he tokhlǒ akhanu, a lè getîkhî dě alò̤khǔpo̤si bò.

4Na kè̌kè̌mò̌ he dě na kè̌shǐ kû̌ hecǒhetè̤.

Na hǎnòò̌ô̌ dǒ na gògǒhtahtò̌yô̤̌ dě na cî̌htò̌cǒcî̌htò̌tè̤ ta̤.

5Na sǎhtǎdû̌da kòyò khlilèphû̌ tokhlǒ.

Na ma̤pî̌lṳ̂̌bò kòyòphû̌mò̤̌ tokhlǒ.

Na htǔpǐ̤bò asîmi̤ tûjû̌pwa̤ talakhǎ. ^a

6Pwa̤sǎkhě pa tokhlǒ apî̌alṳ̂̌ bòmǔte̤gle tôjû̌pwa̤ hǒ.

Na ma̤pò̌ma̤shî kèbò asî wî̤̌dû̌ tokhlǒ, dě kòyò gènè̤nṳ̌ sô̌ pe tôcǒ tô̤̌.

7Cǒmara tûjû̌pwa̤ pǒǐbò ta̤ tûjû̌pwa̤.

A ma̤htò̌ měgle hto agògǒhtahtò̌yô̤̌ dǒ alǎ̤cî̌htò̌tôbǎ aya hǒ.

8A cî̌htò̌cǒ cî̌htò̌tè̤ hǎkhû̌phû̌ pě.

A pǒǐ tôbǎ khlilèphû̌ tokhlǒ.

9Cǒmara tûjû̌pwa̤ mî̌ pwa̤ dǒ akhòbǎ ta̤ma̤jî̌ma̤jû̌ alǎ̤ô̌ tûdûbǐ.

Bǎ ta̤pò̤̌ta̤sha hèbǎ kòyò akhanu, a mî̌ lǎ̤ô̌û̌ dǒ aměglenu.

10Ǒ Cǒmara tûjû̌pwa̤, tôkhò̌ na wîkè kòyò dǒ a kè̌lǎ na nutokhlǒ tô̤̌.

Kòyò dǒ a sî̌ganǎ̤ nami̤ tokhlǒnu, a gǔ yṳ̌ǎ nǎla̤htò̌ǐ na pě.

11Sǎwǐ htû̌sò̌htò̌mò̌ Cǒmara tûjû̌pwa̤ hǎnòò̌ô̌ dǒ Sǐû khôlôkhû̌ dě a pǒ ta̤ nutôpwa̤.

A ma̤wô̌ ta̤ dǒ paya kwè̌ titènu shôbǐǐlṳ̌ bòmò̌ khlilèphû̌ nutokhlǒ.

12Cǒmara gènè̤htò̌bǎ kòyò dǒ kò pè̤̌ǎpè̤̌ô yǎnu.

A shôpe̤nǎbǎ asî ta̤kwisǎyṳhtò̌ nutokhlǒ tô̤̌.

A cî̌htò̌ kòyò dǒ a ma̤si asî nutokhlǒ. ^b

13Ǒ Cǒmara tûjû̌pwa̤, kè̌mò̌ pwa̤sǎkhě he tokhlǒ ma̤jî̌ma̤jû̌ kudǔdǔ he.

Gwèbǎǐ he, cǐhǎhtò̌ hǎplǎ he dǒ ta̤si atakhadû̌kûnu.

14Pô̤̌khô he gǔ kaǎgǔ sôbǐǐlṳ̌ bǎ bò he ta̤htû̌sò̌htò̌ nanu dǒ Wî̤̌ya̤rǔshalephû̌ nutokhlǒ alô̤mô̤̌ pě aya, htodě pô̤̌khô he gǔ sǎlě̤sǎlò̤ pû kû̌ na ta̤ma̤hǎplǎge pě ayanu, gwèbǎǐ he.

15Khlilèphû̌ tokhlǒ pho hǎkûyô̤̌ dě a lò̤tě̤nṳ̌ bò sô̌ tûû̌ kû̌ anǎ̤.

Asî cû̌khanṳ̌ bǎsô̌ tûû̌ ta̤dò dǒ a dò nǎ kòyò nutokhlǒ.

16Cǒmara tûjû̌pwa̤ dǔlṳ̌ anǎ̤ kû̌ a ma̤tôma̤bǎ ta̤. ^c

Kòyò sǎphlǒkěshô̌ cû̌khanṳ̌ bò sô̌ tûû̌ ta̤dò dǒ a glè̌bǎ cû̌dòhǔ kò nutokhlǒ.

17Kòyò sǎphlǒkěshô̌ kû̌ khlilèphû̌ dǒ ashôpe̤ Cǒmara tokhlǒ a gǔ cû̌tǒ̤ bò dǒ lṳ̌gǎnǎdo pě.

18Kòyò dǒ a shôdô pwa̤ma̤jè̌ tokhlǒnu Cǒmara shôpe̤nǎkè asî tôkhò̌ tô̤̌.

Pwa̤ dǒ kòyò pè̤̌ǎpè̤̌ô lû̌û tokhlǒ ata̤kè̌shuǐnu kòyò gǔ ma̤pî̌ma̤hǎmǎ̤ jò nô̌ tô̤̌. ^d

19Ǒ Cǒmara tûjû̌pwa̤, ma̤mò̌, plû htè̌shěshu tǎ̤ nanǎ̤ kû̌ kòyòhǎkhû̌phû̌ tǎ̤mǎ̤.

Kòyò gǔ cî̌htò̌ bò khlilèphû̌ dǒ nalô̤mô̤̌ pě nî̌.

20Ǒ Cǒmara tûjû̌pwa̤ ma̤ǐsha kèmò̌ asî.

No sî̌yakèmò̌ asî kû̌ asîmî̌ hǎkhû̌phû̌ dǒ a mè̤̌ tôcǒ tô̤̌, a sijò pwǎnu.