Psalms 90

Lî̤htû̌sû̌htò̌ lî̤̌bǎ tôbǎ

(Htû̌sò̌htò̌ 90-106)

Cǒmara dǒ ahtûpwa̤ tûjû̌pwa̤ kû̌ kòyò hǎkhû̌phû̌ dǒ ahtûpwa̤ tashò̌phû̌nô̤̌ awe̤akè

Cǒmaradû̌ akòyò Phamṳ̂shě ata̤kwicaba

1Ǒ Běcǎdû̌, na htû pa lǎ̤ô̌tûdû gûlǎ̤ pṳ̂̌꤮ tôhtu hǒ.

2Dǒ khôlô sîtokhlǒ ô̌htûhtò̌ khôtô̤̌, na bô̌lò̤ hǎkhû̌ khôtô̤̌ akhanu,

Na mî̌ Cǒmaradû̌ dǒ a ô̌ hto tûjû̌pwa̤hǒ, a ô̌ pô̤̌ tûjû̌pwa̤ pě.

3Na no htûhtò̌ getîkhî sô̌ kòyò hǎkhû̌phû̌ kû̌ hǎkumṳ̌.

Na hî̌ kû̌, “Kòyò sijò sî, ge tîkhîsô̌ dǒ hǎkumṳ̌nu.”

4Dǒ nayanu, aně tôrǐ mî̌ asô̌sô̌pwǎ kû̌ pyǎnô̤̌ dǒ a cû̌ tûlû̌phwèkènu hǒ.

Asô̌sô̌pwǎ kû̌ tôkû̌na̤ tashò̌phû̌nô̤̌ pwǎ. ^a

5Na no si sumṳ̌ kòyò hǎkhû̌phû̌ sô̌sô̌kû̌ hǎmimò̤̌nu.

Asî sô̌sô̌pwǎkû̌ ta̤phô dǒ aphôhtò̌ lṳmṳ̌wô̤, anôkè lṳmṳ̌htǔ.

6Lṳmṳwô̤ dě phôhtò̌wî̤wô̌, lṳmṳ̌hǎ dě anôkhwesi.

7Dǒ na ta̤sǎphlǒdû̌ akhû̌akhî, pa tǒ̤bòkè dǒ ta̤pî̌ta̤lṳ̂̌.

Dǒ na sǎphlǒdû̌ akhû̌akhî, pa gònò̤̌gòglè ǐsha lǒ̤bò.

8Na kè̌shǐ tǒ̤ ta̤sǔta̤plě dǒ pa cû̌ma̤sǔma̤plě numî̌ mè̤̌tô̤̌.

Na kè̌shǐ tû̌ ta̤sǔta̤plě dǒ pa ma̤hǔma̤sè̌ ǐtû̌nu.

9Na sǎphlǒdû̌ pa akhû̌akhî, lǒ̤bò paněpala tokhlǒ aphǔtǔkè.

Paněpala tokhlǒnu, a hǎbòphwè asô̌sô̌kû̌ sǎbò̌htò̌ tôhu.

10Paněpala mî̌ ahtû gutṳ̌pwǎ susô̌ tôshi.

Pa kè̌ shû̌shokhò̌sho mî̌ paněpala mǒ̤ni̤ htûtǒ̤ ashilǐ̤shi.

Bǎbǎkǎlè alǒbe còcè̌ pwǎ kû̌ ta̤bǎgû̌bǎgè̌, ta̤jî̌ta̤jû̌.

Yî̤khôtô̤̌ paněpala mǒ̤ni̤ phǔkè dě pasipahǎmǎ̤ kèbò.

11Mò̌pè tôpwa̤ sî̌ganǎ̤ lǒbebò̌ nata̤sǎphlǒdû̌ asîrîshû̌sho nuya?

Na sǎphlǒdû̌ mî̌canu a htûhtò̌bò kòyò lǎ̤ǐsha bè̌dubè̌nǎ̤ na.

12Pô̤̌khô pa gǔ sî̌ganǎ̤ ǐtû̌ paněpala phǔtǔlò̤ pwǐ tè ayanu, sû̌ǐtòwòǐ pa. Tǒ̤꤮ dě pa nǐ̤bǎ ta̤sî̌ta̤jò̌ dǒ pasǎphlǒkû. ^b

13Ǒ Cǒmara tûjû̌pwa̤, htû̌ti̤wǐ̤ gtô sô̌ mò̌ pa.

Pa bǎ khòjî̌khòjû̌ yî̤ pô̤̌ pe pwǐ tè?

Sǎyṳ gwèbǎǐ tû̌ napwa̤ma̤ta̤phû̌nu tokhlǒ tô̤̌ya.

14Pô̤̌khô pa gǔ Sǎwǐhtò̌ kû̌ ta̤sǎlě̤sǎlò̤ ta̤mô̤sû̌mô̤sò̌ pṳ̂̌ tôni̤ ayanu, lṳmṳ̌lîlî꤮ ma̤mô̤ pasǎphlǒ kû̌ nata̤mô̤ dǒ ahǎbòjò tô̤̌nu.

15Ma̤ sǎlě̤sǎlò̤ lṳmṳ̌ni̤ lṳmṳ̌sa yî̤ bǎgesô̌ pa pô̤̌꤮ na no khòbǎ pa ta̤jî̌ta̤jû̌, ta̤pò̤̌ta̤sha aněala yî̤nu.

16Dǔlṳ̌ bǎ napwa̤ma̤ta̤phû̌ tokhlǒ kû̌ nata̤ma̤ cô̌klǐcô̌sè.

Dǔlṳ̌ bǎ nasîrîdû̌sîrîhtû kû̌ asîphû̌asîli̤.

17Pa gǔ nǐ̤bǎtû̌ Běcǎdû̌, pa Cǒmara ata̤ma̤mô̤ma̤wô̌ pa.

Pa ma̤ titètè̌ bǎbǎ, no htûhtò̌dû̌htò̌ bǎtû̌ pa.

Pa ma̤ titètè̌ bǎbǎ, no htûhtò̌dû̌htò̌ mè̤̌caca bǎtû̌ pa nî̌.