Psalms 94

Cǒmara tûjû̌pwa̤ mî̌ pwa̤cèrò ta̤ lǒ̤꤮ bò

1Ǒ꤮ Cǒmara tûjû̌pwa̤, na mî̌ Cǒmara dǒ ama̤lǐ̤ge tîkhîshǔ kòyò, ǒ Cǒmaradû̌ dǒ a ma̤ge shěshǔ ta̤.

Dǐ lṳ̌htò̌mò̌ na ta̤sîrîdû̌sîrîhtû.

2Ǒ pwa̤ dǒ acî̌htò̌ hǎkhû̌, ma̤mò̌.

Ma̤lǐ̤ geshî̌shǔ mò̌ kòyò dǒ a bè̌dû̌bè̌pwǎ̤ anǎ̤ nutokhlǒ pô̤̌ asî tô khòbǎnu.

3Ǒ Cǒmara tûjû̌pwa̤, kòyòphû̌mò̤̌ nutokhlǒ glè̌ sǎlě̤sǎlò̤ yî̤ pe pwǐtè?

Ǒ Cǒmara, a yî̤ pe pwǐtè?

4Asî glè̌ bè̌dû̌bè̌pwǎ̤ anǎ̤ yî̤ pe pwǐtèpě?

Lǒ̤bò kòyòkhu phû̌mò̤̌ tokhlǒ hî̌bǎ htò̌mǒhtò̌yô̤̌ yî̤ pe pwǐtè?

5Ǒ Cǒmara tûjû̌pwa̤, asî ma̤jî̌ma̤jû̌, ma̤numa̤cî̌ jî̌jû̌ na kòyò.

6Asî ma̤sima̤hǎmǎ pwa̤mǒ̤khwè̌, phû̌ dǒ shôdôpha, shilǎ̤gǎkhlophû̌ nutokhlǒ.

7Asî hî̌ kû̌, “Cǒmara tûjû̌pwa̤ kè̌shǐ bǎ tô̤̌.

“Phayakû a Cǒmara sî̌ganǎ̤ bǎ tô̤̌tô̤̌.” ^a

8Ǒ kòyòô̌lǒô̌khlo sî, bèyòjò mò̌ lô̌khô ta̤nu.

Kòyò ǒò̌phuhtò sî, sî glè̌ bèyòjò gû̌ kò htû̌꤮ bǎkhòtè pě?

9Cǒmara mî̌ a bô̌lò̤ nò̌ku, a ganǎ̤dejò tô̤̌ sî shò̌tò̤̌ ya?

A mî̌ pwa̤bô̌lò̤ mǐ̤sǎphlǒ, a kè̌shǐjò tô̤̌ sî shò̌tò̤̌ ya?

10A mî̌ pwa̤sû̌ǐwô̌ge khlilèphû̌ tokhlǒ, sî shò̌tò̤̌ kû̌ a plèjò kòyò tô̤̌ya?

A mî̌ pwa̤ dǒ a sû̌ǐ bǎ kòyò ta̤sî̌ta̤jò̌, sî shò̌tò̤̌ kû̌ ata̤sî̌khû̌sî̌ya ô̌ tô̤̌ya?

11Cǒmara tûjû̌pwa̤ sî̌ganǎ̤ kòyò hǎkhû̌phû̌ ata̤gènè̤ tokhlǒ.

A sî̌ganǎ̤ kû̌ asî ta̤gènè̤ tokhlǒnu atṳ̌dè pwǎ. ^b

12Ǒ꤮ Cǒmara tûjû̌pwa̤, kòyò dǒ na sû̌ǐwô̌ge lû̌û dě na sû̌ǐ bǎ asî kû̌ na ta̤sû̌ǐ nutokhlǒ mî̌ a nǐ̤bǎ ta̤ǐshôwî̤.

13Na takabǐnṳ̌ asî dǒ ata̤pò̤̌ta̤sha akû tǒ̤dǒ kòyò pho hǎkûyô̤̌ dǒ kòyòphû̌mò̤̌ lǎ̤lò̤tě̤si ayanupě.

14Cǒmara tûjû̌pwa̤ wîkè a kòyò tokhlǒ tô̤̌.

A bè̌kè nô̌ kòyò dǒ a rû̌htò̌ǐ nutokhlǒ tîkî̌ tô̤̌.

15Ta̤cî̌htò̌nu atôabǎ gesô̌ pě.

Lǒ̤bò kòyòcǒkòyòtè̤ tokhlǒ jûlě̤phhǐ bò pě.

16Mò̌pè tôpwa̤ ihtǒ takatě̤tṳshǔ bǎ he kû̌ kòyòphû̌mò̤̌ nutokhlǒ pě ya?

Mò̌pè tôpwa̤ ihtǒ shěshǔ bǎ he kû̌ kòyò ma̤ ta̤phû̌mò̤̌shǐhtô nutokhlǒ pě ya?

17Cǒmara tûjû̌pwa̤ kè̌ ma̤jè̌ he tô̤̌ mî̌, he sikè htohǒ.

18Ǒ Cǒmara tûjû̌pwa̤, bǎ he hî̌ kû̌, “He glè̌ si hǒ” akhanu, na ta̤mô̤ dǒ ahǎbòjò tô̤̌nu a ma̤jè̌ he hǒ.

19Bǎ he bǎgû̌bǎgè̌ jî̌jû̌ akhanu, na ma̤mô̤ hesǎphlǒ, na ma̤sǎlě̤sǎlò̤ he.

20Pwa̤ pǒ ta̤ dǒ aphû̌mò̤̌ tokhlǒnu, a htûjò na sû̌khô tô̤̌.

Asî htû̌tèplè̌ noǎtô noǎbǎ gû̌ kòyò ta̤sû̌ta̤tòwò tô̤̌.

21Asî glè̌ ma̤si kòyòcǒkòyòtè̤ tokhlǒ.

Asî cî̌htò̌si kòyò dǒ ata̤sǔ ô̌tô̤̌ nutokhlǒ.

22Bǎbǎkǎlè Cǒmara tûjû̌pwa̤ mî̌ he wî̤̌we̤dû̌ dǒ atònò.

He Cǒmara mî̌ a htû lǒ̤dû̌ dǒ he lǎ̤ô̌tûdû.

23Cǒmara ma̤ geshî̌shu kòyòphû̌mò̤̌ nutokhlǒ pô̤̌ asî ta̤sǔ ô̌nu pě.

Dǒ asî ta̤sǔ akhû̌akhî Cǒmara gǔ ma̤si kèbò asî pě.

Cǒmara tûjû̌pwa̤, pa Cǒmara ma̤hǎmǎ kèbò asî pě.