Psa 95 | KxfSCKXF | STEP | Hèmò̌, sǎlě̤sǎlò̤ sǎwǐhtò̌ Cǒmara tûjû̌pwa̤ tǎ. Pa kaǎgǔ htû̌sò̌htò̌ wô̤̌wô̤̌ lû̌ lǒ̤dû̌ dǒ asô̌sô̌kû̌ pwa̤takabǐ pa hǒtôpwa̤ tǎ.

Psalms 95

lî̤sǎwǐ htû̌sò̌htò̌

1 Hèmò̌, sǎlě̤sǎlò̤ sǎwǐhtò̌ Cǒmara tûjû̌pwa̤ tǎ.

Pa kaǎgǔ htû̌sò̌htò̌ wô̤̌wô̤̌ lû̌ lǒ̤dû̌ dǒ asô̌sô̌kû̌ pwa̤takabǐ pa hǒtôpwa̤ tǎ. ^a

2 Hènṳ̌ wô̤̌wô̤̌ lû̌ dǒ alô̤mô̤̌ dě pa hî̌bwǐhî̌sîrîhtò̌ lû̌ tǎ.

Pa sǎlě̤sǎlò̤ sǎwǐ htû̌sò̌htò̌ lû̌ tǎ.

3 Cǒmara tûjû̌pwa̤ mî̌ Cǒmara dǒ asîrîshû̌sho kòyò.

Khwǐdû̌ dǒ asîrîshû̌sho lǒ kû̌ Cǒmara dǒ ashǐshawa̤ tokhlǒ lǒ̤bò.

4 Hǎkhû̌ gûlǎ̤ dǒ a yô̤̌lǒ tokhlǒ bǎbǎ, khôlôdû̌khôlôhtûlǒ tokhlǒ bǎbǎ, a ô̌ lǒ̤bò dǒ lû̌cǔdekû.

5 A bô̌lò̤nṳ̌bǎ shidû̌te̤we̤ akhû̌akhî, shidû̌te̤we̤ mî̌ ata̤.

Khôlôplǔ tokhlǒ mî̌ a bô̌lò̤ kû̌ anǎ̤nǎ̤.

6 Hèmò̌, hèdô̌gînî̤ û̌lò̤mò̤̌, cabahtò̌mò̌ a.

Pa dô̌gînî̤lò̤ dǒ Cǒmara tûjû̌pwa̤, dǒ a bô̌lò̤ pa hǒtôpwa̤ alô̤mô̤̌ tǎ.

7 A mî̌ pa Cǒmaradû̌.

Pa mî̌ kòyò dǒ a kè̌khwè̌ ǐtû̌.

Pa mî̌ sû̌phû̌sî dǒ a akè̌ǐ.

Khò̌tini̤ a hî̌ mî̌titè nuna tô ganǎ̤de tǒ̤ pwǎ lû̌yô̤̌. ^b

8 Cǒmara tûjû̌pwa̤ hî̌ kû̌, “Ikǒpwǐ̤ sô̌sô̌gû̌ lô̌khô tǎ̤ kû̌ sîphisîphu ikǒpwǐ̤ dǒ Merǐbǎ shipǒ̤hǎhtò̌ gûlǎ̤ kû̌ dǒ gǎshashigǎkhû̌ masa gûlǎ̤ nutǎ̤mǎ̤. ^c

9 “Gûlǎ̤ bǎnumî̌ sîphisîphu tokhlǒ kè̌shǐnô̌ htobò he ma̤ bǎ ta̤ dǒ asîya tokhlǒ bǎbǎkǎlè asî kè̌lǎ ma̤kè̌kè̌ pe hehe. ^d

10 “Pô̤̌nudě hema̤yǒ̤ asî aně lǐ̤shi.

“He hî̌ kû̌, ‘asî mî̌ kòyò dǒ acǒ kû̌ he tô̤̌.

“‘Kòyò dǒ a ganǎ̤de heta̤mǎlò̤ tô̤̌nu,’ he hî̌nǎ pô̤̌nu.

11 “Ma̤pô̤̌nudě he sǎphlǒdû̌ asî dě he hî̌lò̤ asî ayô̤̌ tômû kû̌, ‘shigǎ dǒ he olò̤ kû̌ he gǔ ǐ kû̌ asî lǎ̤ô̌kǔ tashò̌phû̌ nutôkû nu, asî nṳ̌nǒ petô̤̌ hǒ.’” ^e