Psalms 96
Cǒmara mî̌ khwǐ dǒ asîrîdû̌sîrîhtû
1Sǎwǐhtò̌ Cǒmara tûjû̌pwa̤ kû̌ ta̤sǎwǐ dǒ asa. Ǒ hǎkhû̌phû̌ lǒ̤bò sî, sǎwǐhtò̌ bòmò̌ Cǒmara tûjû̌pwa̤. 2Sǎwǐhtò̌ Cǒmara tûjû̌pwa̤, htû̌sò̌htò̌mò̌ ami̤. Pṳ̂̌ni̤ni̤ shôbǐǐlṳ̌mò̌ ata̤ma̤hǎplǎge. 3Shôbǐǐlṳ̌ bòmò̌ ata̤sîdû̌sîrîhtû kû̌ khlilèphû̌ tokhlǒ. Shôbǐǐlṳ̌ bòmò̌ ata̤ma̤ cô̌klǐcô̌sè nutokhlǒ kû̌ kòyò lò̤̌bò. 4Cǒmara tûjû̌pwa̤ mî̌ adû̌ahtû, agwǎ htû̌sò̌htò̌. Kòyò tô ǐsha bè̌dubè̌nǎ̤ khlo lû̌û kû̌ Cǒmara dǒ ashǔshawa̤ lǒ̤bò. 5Kòyò khlilèphû̌ ashǔshawa̤ tokhlǒ a Cǒmara mî̌ pwa̤yô̤pwa̤gî̌ lǒ̤bò pwǎ. Cǒmara tûjû̌pwa̤ dě a bô̌lò̤ mǒkhû̌. 6Ta̤lîta̤kakha kû̌ ta̤pô̤phǎ tokhlǒnu aô̌bò dǒ alô̤mô̤̌. Ta̤khû̌ta̤ǎ kû̌ ta̤sîrîdû̌sîrîhtû tokhlǒ ô̌bò dǒ ta̤lṳhtò̌ta̤hô aplò̌shǐ akû. 7Ǒ khlilèphû̌ ô̌ dǒ hǎkhû̌ nutokhlǒ lǒ̤bò sî, htû̌sò̌htò̌ lô̌khô Cǒmara tûjû̌pwa̤. Htû̌sò̌htò̌ lô̌khô Cǒmara tûjû̌pwa̤ ata̤sîdû̌sîrîhtû kû̌ ata̤pô̤pwǎ̤shû̌sho. a 8Htû̌sò̌htò̌mò̌ Cǒmara tûjû̌pwa̤ dǒ a ta̤siwi̤dû̌sòwò̤htû̌ nutôpwa̤ ami̤. Phihènṳ̌mò̌ ta̤lṳ̌tòhtò̌, hènṳ̌mò̌ dǒ ta̤lṳhtò̌htò̌hô we̤kû. 9Dô̌gînî̤ cabahtò̌mò̌ Cǒmara tûjû̌pwa̤ dǒ a ô̌ kû̌ ata̤plò̌ta̤shǐ dǒ lîkakhanu. Ǒ hǎkhû̌phû̌ lǒ̤bò sî, ǐsha gònò̤̌gòglè bò lô̌khô. 10Shôbǐǐlṳ̌mò̌ dǒ khlilèphû̌ tokhlǒ akla kû̌, “Cǒmara tûjû̌pwa̤ pǒ ta̤.” A bô̌lò̤ měglewô̌ hǎkhû̌ akhû̌akhî, a kuyṳ̌jò pe tô̤̌. A gǔ cî̌htò̌cǒ cî̌htò̌tè̤ kòyò lǒ̤bò bò. 11Ǒ mǒkhû̌ sǎlě̤sǎlò̤ mò̌, hǎkhû̌ mô̤sû̌mô̤sò̌ mò̌. No yî̤̌kǒ htû̌sò̌htò̌ bòmò̌ shidû̌te̤we̤ kû̌ lǒ̤bò ta̤phû̌ta̤wè̤ ô̌ bǎ shikû nutokhlǒ. 12No yî̤̌kǒ sǎlě̤sǎlò̤ bò mò̌ yadakhû̌ kû̌ lǒ̤bò ta̤ dǒ a ô̌ bǎ yadakhû̌ nutokhlǒ. No sǎlě̤sǎlò̤ sǎwǐhtò̌ bò mò̌ lǒ̤bò sǒmṳ̌wû̌bô ô̌ dǒ mi̤kla nutokhlǒ. 13Cǒmara tûjû̌pwa̤ hè akhû̌akhî, asî sǎwǐ htû̌sò̌htò̌ bò dǒ alô̤mô̤̌ pě. A glè̌ hècî̌htò̌tô cèròbǎ hǎkhû̌. A glè̌ hèlò̤ pǒ kòyò nutokhlǒ kû̌ ata̤cǒta̤tè̤ pě.
Copyright information for
KxfSCKXF