Psa 97 | KxfSCKXF | STEP | Cǒmara tûjû̌pwa̤ pǒǐ ta̤, no sǎlě̤sǎlò̤ mò̌ hǎkhû̌phû̌. No mô̤sû̌mô̤sò̌ mò̌ kòyò ô̌ dǒ shidû̌te̤we̤kû klǔphû̌ nutokhlǒ.

Psalms 97

1 Cǒmara tûjû̌pwa̤ pǒǐ ta̤, no sǎlě̤sǎlò̤ mò̌ hǎkhû̌phû̌.

No mô̤sû̌mô̤sò̌ mò̌ kòyò ô̌ dǒ shidû̌te̤we̤kû klǔphû̌ nutokhlǒ.

2 Poǒlṳ̌ kû̌ ta̤khǐsiwi̤ ô̌tewe̤bǐbò lû̌û.

A pǒcǒpǒtè̤ a pǒtôpǒbǎ a kòyò.

3 Cǒmara plûcû̌ wǐ mî̌gè̌shû̌ dǒ alô̤mô̤̌.

A gè̌kèbò pwa̤sǎkhě lû̌û dǒ a ô̌te̤we̤ kû̌ lû̌û nutokhlǒ.

4 Cǒmara ashî̌lî̌bǒ lîlò̤ dǒ hǎkhû̌.

Hǎkhû̌ kè̌shǐ dě a ǐsha gònò̤̌gòglè.

5 Dǒ Cǒmara tûjû̌pwa̤ alô̤mô̤̌ kû̌ dǒ hǎkhû̌ tôběbò běcǎ alô̤mô̤̌nu, khôlô tokhlǒ jûlò̤ kèbò sô̌sô̌kû̌ tarabô jûlò̤.

6 Mǒkhû̌ tokhlǒ shôbǐǐlṳ̌ ta̤cǒta̤tè̤.

Khlilèphû̌ lǒ̤bò tokhlǒ kè̌shǐ bò ta̤lîta̤kakha.

7 Kòyò lǒ̤bò dǒ a cabahtò̌, bè̌dû̌bè̌htò̌yô̤̌ ta̤yǎ̤yô̤yǎ̤gî̌ dǒ a tṳ̌dè tokhlǒ glè̌ shòwò̤̌ kèbò pě.

Lǒ̤bò Cǒmara dǒ a mè̤̌tô̤̌ tokhlǒnu a glè̌ cabahtò̌bò Cǒmara tûjû̌pwa̤.

8 Ǒ Cǒmara tûjû̌pwa̤, Wî̤̌yarǔshôlephû̌ ganǎ̤de na ta̤cî̌htò̌ dě a sǎlě̤.

Lǒ̤bò Yǔda dophû̌shô̌phû̌ tokhlǒ ganǎ̤de na ta̤cî̌htò̌ dě a sǎlò̤.

9 Ǒ Cǒmara tûjû̌pwa̤, hǎkhû̌ tôběbò mî̌ nadû̌nahtû gutṳ̌.

Kòyò bè̌dû̌ khlo na kû̌ lǒ̤bò Cǒmara dǒ ashǔshawa̤.

10 Ǒ kòyò dǒ a mô̤nṳ̌ Cǒmara tûjû̌pwa̤ sî, sǎkhě lô̌khô ta̤phû̌mò̤̌shǐhtô.

Cǒmara tûjû̌pwa̤ kè̌pǒ̤ kòyò dǒ acǒ kû̌ ayô̤̌ tokhlǒ ata̤htûpwa̤.

A ma̤hǎplǎge asî dǒ kòyòkhu phû̌mò̤̌ acǔdekû.

11 Cǒmara ata̤mô̤ta̤bǎ lîkakhalò̤ sô̌sô̌kû̌ lṳmṳ̌ dǒ kòyòcǒkòyòtè̤ alô̤.

A phǐhè ta̤sǎlě̤sǎlò̤ dǒ kòyò sǎphlǒwô̌ aya.

12 Ǒ kòyòcǒkòyòtè̤ sî, dǒ Cǒmara tûjû̌pwa̤ ma̤ bǎ sî akhû̌akhî, sǎlě̤sǎlò̤ lô̌khô.

Hî̌bwǐhî̌sîrîhtò̌mò̌ ami̤ plò̌shǐ.