Rev 1 | KxfSCKXF | STEP | Lî̤ hǒtôbǎ mî̌ lî̤ dǒ a wě̤nǎ ta̤ma̤htûhtò̌ anǎ̤ dǒ Yeshǔ Khrǐ dǔlè̌lṳ̌htò̌ tokhlǒ awe̤akè. Pô̤̌khô Yeshǔ Khrǐ gǔ nè̌lṳ̌ bǎ jû̌ tokhlǒ kû̌ ta̤ glè̌ htûhtò̌ phǔ pě nutokhlǒ ayanu, Běcǎ Cǒmara dǔlè̌lṳ̌ bǎ ta̤dǔlè̌lṳ̌htò̌nu kû̌ Khûyṳ̂ha dǒ a htû Yeshǔ Khrǐ jû̌ nutôpwa̤ hǒ. A sûlò̤ a mǒkhû̌ tanaphû̌ dǒ heô̌ dě a dǐsî̌ganǎ̤ bǎ he kû̌ ta̤we̤ta̤kè nutokhlǒ.

Revelation of John 1

1 Lî̤ hǒtôbǎ mî̌ lî̤ dǒ a wě̤nǎ ta̤ma̤htûhtò̌ anǎ̤ dǒ Yeshǔ Khrǐ dǔlè̌lṳ̌htò̌ tokhlǒ awe̤akè. Pô̤̌khô Yeshǔ Khrǐ gǔ nè̌lṳ̌ bǎ jû̌ tokhlǒ kû̌ ta̤ glè̌ htûhtò̌ phǔ pě nutokhlǒ ayanu, Běcǎ Cǒmara dǔlè̌lṳ̌ bǎ ta̤dǔlè̌lṳ̌htò̌nu kû̌ Khûyṳ̂ha dǒ a htû Yeshǔ Khrǐ jû̌ nutôpwa̤ hǒ. A sûlò̤ a mǒkhû̌ tanaphû̌ dǒ heô̌ dě a dǐsî̌ganǎ̤ bǎ he kû̌ ta̤we̤ta̤kè nutokhlǒ. 2 Dě he shôbǐǐlṳ̌ bǎ kòyò lǒ̤bò dǒ he kè̌shǐ hto tokhlǒnu, hǒnumî̌ he wě̤lṳ̌ bǎ kòyò kû̌ ta̤we̤ta̤kè ô̌ dǒ Cǒmara ô̌ ahè tokhlǒ kû̌ ta̤dǒ Yeshǔ Khrǐ dǔlè̌lṳ̌ bǎ he tokhlǒ. 3 Kòyò dǒ a dô̌ lî̤ hǒtôbǎ tôpwa̤pwa̤nu, a nǐ̤bǎ ta̤ǐshowî̤ kǎtô̤̌ kòyò dǒ a ganǎ̤de piwi̤pèshè tokhlǒ a ta̤hî̌bǎ dǒ a gǔ htûhtò̌ khònò̤̌ tokhlǒnu bǎbǎ, a gǔ htûhtò̌ htû̌ nô̌kòpě tokhlǒnu bǎbǎ, asî gǔ jûǎ ta̤dǒ kòyò wě̤nṳ̌ a dǒ lî̤ hǒtôbǎ akû tokhlǒnu, a gǔ nǐ̤bǎ lô̌khô ta̤ǐshowî̤ pě, ma̤titèhî̌dě ta̤nutokhlǒ glè̌ htûhtò̌nu, ashěakhǎ phǔhtò̌ hǒ.

Hî̌mô̤hî̌wô̌ cû̌nṳ̌bǎ ta̤dòkû susô̌tômṳ̌

4 He mî̌ Khûyṳ̂ha. He wě̤cû̌ bǎ lî̤nu dǒ ta̤dòkû susô̌tômṳ̌ dǒ a ô̌ bǎ Ashǎgǎkû nutokhlǒ a ô̌. ^a Cǒmara dǒ a htûpwa̤ dǒ něhǎlau, kǎtô̤̌ khònò̤̌kha mî̌ a htûpwa̤pwa̤, nô̌kòpě mî̌ a htûpwa̤pwa̤ tôpwa̤ kû̌ yôla htûpwa̤ susô̌tôpwa̤ dǒ a ô̌ dǒ tòcòhta alô̤mô̤̌ nutokhlǒ abwǐsîrî kû̌ a ta̤gûjû̌cabǎ nî̌, sî nǐ̤bǎ pû nî̌꤮. ^b 5 Sî nǐ̤bǎ pô̤̌ pû Yeshǔ Khrǐ dǒ a khòlṳ̌ cǒcǒtè̤tè̤ nutôpwa̤ abwǐsîrî kû̌ a ta̤gûjû̌kabǎ nî̌꤮. ^c Kòyòsi dě a htûpwa̤ getîkhî aklanu, a mî̌ pwa̤ dǒ a htûpwa̤ wǐlǒ tôpwa̤ hǒ. ^d

A mî̌ pwa̤ dǒ a pǒ hǎkhû̌ akhwǐ tokhlǒ nutôpwa̤. A mî̌ a mô̤ǐ pa kǎtô̤̌ dǒ a si akhû̌akhî a ma̤hǎplǎge pa dǒ ta̤sǔta̤plě akû hǒ. 6 Htodě pô̤̌khô pa gǔ ma̤ apha Cǒmara a ta̤phǐta̤ma̤ ayanu, Yeshǔ Khrǐ dǐhtûhtò̌ pa kû̌ pwa̤shû̌gǎ tokhlǒ dǒ ashiagǎkû. Ta̤bwǐdû̌sîrîhtû kû̌ ta̤pô̤ta̤phǎ ô̌ pû kû̌ Yeshǔ Khrǐ tûjû̌pwa̤ nî̌꤮. Ame̤ ^e.

7 Kè̌ lô̌khô mò̌, a glè̌ hè kû̌ poǒlṳ̌ pě. ^f Kòyò pṳ̂̌tôpwa̤ gǔ kè̌shǐ bò yǎ pě. Kòyò dǒ a shusi lû̌û nutokhlǒ bǎbǎ, a gǔ kè̌shǐ lû̌û pěpě. ^g Kòyò khlilèphû̌ pṳ̂̌꤮ tôcǒ dǒ hǎkhû̌nu gǔhǎgǔwô bò kû̌ akhû̌akhî pě. Ta̤ htûhtò̌ mè̤̌mî̌ca pô̤̌onu pě, Ame̤. ^h

8 Běcǎ Cǒmara hî̌ kû̌, “He mî̌ akòshî̌ kû̌ agutṳ̌ hǒ” dě a hî̌ kû̌, “He mî̌ Cǒmara dǒ a htûpwa̤ dǒ něhǎlau tôpwa̤, khònò̤̌kha mî̌ he htûpwa̤pwa̤, nô̌kòpěmî̌ he htûpwa̤pwa̤. ⁱ He mî̌ Cǒmara dǒ a jò̌ ta̤lǒ̤꤮ bò tôpwa̤hǒ.” ^j

Ta̤kè̌shǐlṳ̌ tobo Khrǐ

9 He mî̌ sî pṳ̌wè̤̌ Khûyṳ̂ha dǒ a yṳ̌ǎ Khrǐ sô̌sô̌kû̌ kû̌ sînu tôpwa̤. He mî̌ sî khô dǒ a khòjî̌khòjû̌ plǒta̤ kû̌ sînu tôpwa̤. He mî̌ Cǒmara a shiphû̌gǎphû̌ sô̌sô̌kû̌ kû̌ sîsî, dě he sǎphlǒhtû plǒta̤ kû̌ sînu tôpwa̤ pwǎ. Dǒ he shôbǐǐlṳ̌ bǎ kòyò kû̌ Běcǎ Cǒmara awe̤akè kû̌ ta̤dǒ Yeshǔ Khrǐ tṳ̌sikhòsi bǎ he tokhlǒ akhû̌akhî, kòyò cû̌ dǐô̌kè he dǒ Pamǔ klǔkhû̌ hǒ. 10 Bǎ Běcǎ alṳmṳ̌ni̤ tôni̤nu, Yôla Plò̌shǐ Běcǎ ô̌pǒ̤ he dě he ganǎ̤de alě̤pwe̤htò̌shû̌ pwe̤htò̌sho dǒ he nô̌kò dě a asô̌sô̌kû̌ kǐlû pwe̤htò̌nu. 11 Alě̤pwe̤htò̌ dě a hî̌ kû̌, “Wě̤mǎnǎ ta̤dǒ na kè̌shǐ nutokhlǒ. Htodě sûcû̌bǎ lî̤nu dǒ ta̤dòkû susô̌tômṳ̌ dǒ a mî̌ Ěphěsu, Sômǔranǎ, Pekamǔ, Shatǐra, Shadǐ, Philadǐlaphǐ, Lò̤dǐkǐ dǒ a ô̌ lô̌khô bǎ wî̤̌ susô̌tôwî̤̌ tokhlǒ akûnu.”

12 Mî̌mò̌pè hî̌bǎ he, he gènè̤ dě he htû̌tiwǐ kè̌tîkhî akhanu, he kè̌shǐ mî̌tè̌kohta susô̌tômè. 13 Dě dǒ mî̌tè̌kohta susô̌tômè aklǎmakûnu asô̌sô̌kû̌ kòyòphû̌khû ô̌ tôpwa̤. ^k Dě a sô̌ jejû ahtûlò̤tǒ̤ dǒ akhò̌lôpô̤̌ tôpṳ dě a she te̤we̤htò̌ htabě tôbǎ. ^l 14 Akhǔlṳ bû asô̌sô̌kû̌ sû̌phû̌shû̌nu, mè̤̌tô̤̌mî̌ a asô̌sô̌kû̌ shicòbûnu. A mǐ̤sǎphlǒ nî̌, asô̌sô̌kû̌ mî̌gè̌ plô̤̌htò̌nu. ^m 15 Akhò̌lôpô̤̌nu a kakha sô̌sô̌kû̌ tilibò dǒ kòyò lěhto lû̌û kû̌ mî̌nu. Alě̤ pwe̤shû̌ sô̌sô̌kû̌ shi pě̤lò̤tě̤plò̤nu. ⁿ 16 A cǔtômû tôkhô nî̌ a pṳ̂̌měǐ shǎ susô̌tômè. Htodě nò̌she dǒ a htò ginǐ̤khôginǐ̤gî̌ tôbǎ ô̌dǒ agô̌kû hǎhtò̌. A mǐ̤sǎ nî̌ a shěkîtrî̌ sô̌sô̌kû̌ lṳmṳ̌ shěkôshôlò̤ bǎ lṳmṳ̌htǔkhanu.

17 Bǎ he kè̌shǐ yǎ akhanu, he lò̤khǔpo̤ siyṳ̌ sô̌sô̌kû̌ kòyòsi tôpwa̤ dǒ a khò̌lôpô̤̌ kòshǐnu, htodě a bè̌htò̌ acǔde cǔtômû dǒ helô̤ dě a hî̌ kû̌, “Ǐsha tǎ̤mǎ̤, he mî̌ ta̤kòshî̌ kû̌ ta̤gutṳ̌ tôpwa̤hǒ. ^o 18 He mî̌ kòyò dǒ a htûpwa̤ tôpwa̤. He si htohǒ bǎbǎkǎlè khònò̤̌ he htûpwa̤ tûjû̌pwa̤ talakhǎ hǒ. He ô̌ kû̌ ta̤siwi̤sòwò̤ kû̌ ta̤pô̤ta̤phǎ dě he pǒbò ta̤si kû̌ lṳ̌gǎnǎdo tokhlǒ.

19 “Pô̤̌nudě ta̤dǒ na kè̌shǐ nutokhlǒ bǎbǎ, ta̤dǒ na kè̌shǐ a htûhtò̌ khònò̤̌ tokhlǒnu bǎbǎ, ta̤dǒ na kè̌shǐ a htûhtò̌ htû̌ nô̌kòpě tokhlǒnu bǎbǎ, wě̤mǎnǎ yǎ. 20 Shǎ susô̌tômè dǒ na kè̌shǐ dǒ he cǔtômû akûnu kû̌ mî̌tè̌kohta susô̌tômènu ayô̤̌mûyô̤̌sǎ adû̌ayô̤̌ nî̌ pô̤̌hî̌tèhî̌dě shǎ susô̌tômè yô̤̌mûyô̤̌sǎ numî̌ ta̤dòkû susô̌tômṳ̌ a tanaphû̌ tokhlǒ dě mî̌tè̌ko susô̌tômè yô̤̌mûyô̤̌sǎ mî̌ ta̤dòkû susô̌tômṳ̌ tokhlǒnu hǒ.”