Rev 11 | KxfSCKXF | STEP | Bǎnuakha kòyò ǐ he gôpô̤̌mṳ̌ dǒ asô̌sô̌kû̌ lǎ̤tèbǎ nò̌plè tôbô dě kòyò hî̌ he kû̌, “Cû̌tèkè̌bǎ Cǒmara ta̤lṳhtò̌hô kû̌ ta̤lṳhtò̌awǎ̤nu, htodě dô̌bǎ padô̌ kòyò dǒ a cubucabahtò̌ bǎ ta̤lṳhtò̌hô akûnu tokhlǒ.

Revelation of John 11

Pwa̤tǎ̤jo sò̌ginǐ̤

1 Bǎnuakha kòyò ǐ he gôpô̤̌mṳ̌ dǒ asô̌sô̌kû̌ lǎ̤tèbǎ nò̌plè tôbô dě kòyò hî̌ he kû̌, “Cû̌tèkè̌bǎ Cǒmara ta̤lṳhtò̌hô kû̌ ta̤lṳhtò̌awǎ̤nu, htodě dô̌bǎ padô̌ kòyò dǒ a cubucabahtò̌ bǎ ta̤lṳhtò̌hô akûnu tokhlǒ. ^a 2 Bǎbǎkǎlè dǒ ta̤lṳhtò̌hô we̤kû akhlonu tèbǎ tǎ̤ a tǎ̤mǎ̤ nî̌, ma̤titèhî̌dě kòyò ǐlò̤ hto a dǒ Yǔdaphû̌ mè̤̌tô̤̌ tokhlǒ a cǔdekû hǒ. Asî gǔ htò̌kha yî̤̌lò̤bò wî̤̌plò̌shǐ tôwî̤̌nu lǐ̤shi kû̌ ginǐ̤la akû pě. ^b 3 He pwa̤tǎ̤jo sò̌ginǐ̤nu, he gǔ ǐ asî ta̤pô̤ta̤pwǎ̤ pě. Asî gǔ sô̌htò̌ jehǐyò̤̌bô̌ tûphrû tôpṳ̌ pě. Asî gǔ hî̌pô̤nǎ bǎ kòyò kû̌ Cǒmara ta̤we̤ta̤kè pě dě a gǔ ô̌yî̤ alṳmṳ̌ni̤ tôrǐ kû̌ ginǐ̤ya̤ kû̌ shǔshi pě.” 4 Pwa̤tǎ̤jo sò̌gini̤ numî̌ a sô̌sô̌ kû̌ òlǐbamṳ̌ ginǐ̤mṳ̌ kû̌ mî̌tè̌ko ginǐ̤mè dǒ a ihtǒô̌ dǒ Cǒmara dǒ a pǒ hǎkhû̌ nutôpwa̤ alô̤mô̤̌ nuhǒ. ^c 5 Kòyò tôpwa̤pwa̤ kè̌ ma̤pò̤̌ma̤sha asî hî̌dě mî̌ hǎhtò̌ dǒ asî gô̌kû, dě a ukè bò kòyò dǒ a sǎkhě lû̌û tokhlǒ. Dě kòyò tôpwa̤pwa̤ dǒ a glè̌ ma̤pò̤̌ma̤sha asî hî̌dě a ma̤sikè asî pô̤̌nu pě. 6 Bǎ asî hî̌pô̤nǎ bǎ kòyò kû̌ Cǒmara alě̤ayô̤̌ akhanu, pô̤̌khô gǎ glè̌ ju tǎ̤ tîkî̌꤮ mǎ̤ nudě, asî ô̌ kû̌ a ta̤pô̤ta̤pwǎ̤ dǒ a ma̤bǐjòkè mǒkhû̌ atakha pě. ^d Htokhôtô̤̌ a ta̤pô̤ta̤pwǎ̤ ô̌pe kû̌ a gǔ ma̤htûhtò̌ shinu kû̌ sǐ numî̌ a ma̤ jòjò. ^e Htokhôtô̤̌ a ta̤pô̤ta̤pwǎ̤ ô̌pe kû̌ a kè̌ sǎyu nohtûhtò̌ sǎla̤la̤ ta̤shasiwě̤ sîtokhlǒ hî̌nu, a po̤lò̤ hǎkhû̌ dě a ma̤htûhtò̌ numî̌, a ma̤ jòjò pwǎ. ^f

7 Bǎ asî khòlṳ̌hto anǎ̤ akhanu, ta̤mi̤ta̤mò̤̌ tôdo ô̌ dǒ khokûdû̌yô̤̌ dě a hǎhtò̌ pě. A gǔ hǎhtò̌ shěpě̤ asî nusò̌ginǐ̤ pě. ^g A ma̤pè̤̌ asî nusò̌ginǐ̤ dě ma̤sikè asî pě. ^h 8 A ma̤si hto asî dě kòyò bè̌lò̤ asî nǎ̤glǒ bǎ wî̤̌dû̌ nutôwî̤̌ a klè̌dakû nupě. Wî̤̌nu tôwî̤̌ mî̌ wî̤̌ dǒ kòyò lǎ̤ma̤si a Běcǎ dǒ nò̌dò̌htǔlô̤ nutôkû. Wî̤̌nu tôwî̤̌ mî̌ kòyò kaǎ lû̌kû̌ ta̤ dǒ kòyò lǎ̤kè̌lû̌mò̌mṳ kû̌ Wî̤̌sadû mè̤̌tô̤̌mî̌ Ijî̌gǎ nupwǎ. ⁱ 9 Dě kòyò pṳ̂̌tagǎ, pṳ̂̌tôkhli, pṳ̂̌tocǒ, yô̤̌ pṳ̂̌toyô̤̌, kû̌ pṳ̂̌tômṳ̌ gǔ kè̌bò asî nǎ̤glǒ nupě dě kòyò lǔǐ asî tô̤̌. Kòyò nobè̌ asî pô̤̌nu suni̤ kû̌ tûkû̌ pě. 10 Dǒ asî nusò̌ginǐ̤ si akhû̌akhî, kòyò ô̌ dǒ hǎkhû̌nu pṳ̂̌tôpwa̤ gǔ sǎlě̤sǎlò̤ bò pě. Asî gǔ ma̤pwèma̤lû dě a gǔ sûcû̌ bǎ lû̌û sû tôpwa̤ kû̌ tôpwa̤ pě, ma̤titèhî̌dě piwi̤pèshè sò̌ginǐ̤nu a ma̤ô̌htûhtò̌ dû̌wî̤ bǎ asî ta̤jî̌ta̤jû̌ dě kòyò hǎkhû̌phû̌ tokhlǒ khòbǎbò akhû̌akhî, a si bǎ asî dě a sǎlě̤sǎlò̤ lǒ̤bò.

11 Bǎbǎkǎlè bǎ suni̤ kû̌ tôkû̌ behtò̌nu, yôla htûpwa̤ ô̌ dǒ Cǒmara a ô̌nu, a hèlò̤ nṳ̌ dǒ asîkû dě asî ihtǒhtûpwa̤ sô̌. Dě kòyò pṳ̂̌ pwa̤ dǒ a kè̌shǐ asî aihtǒtîkhî tokhlǒnu, a tirǐsò̌ ǐshabò. ^j 12 Pô̤̌nuhtodě pwa̤tǎ̤jo nusò̌ginǐ̤ ganǎ̤de alě̤pwe̤htò̌ dǒ mǒkhû̌ dě a hî̌ asî kû̌, “Hèhtò̌ lô̌khô bǒo” a hî̌ lû̌û pô̤̌nu. Dě bǎ dǔdǎ tokhlǒ ô̌pô̤̌kè̌ asî akhanu, asî gehtò̌nṳ̌ dǒ poǒlṳ̌ tôbǎ akla dě a htò̌ dǒ mǒkhû̌. ^k

13 Bǎ asî gehtò̌ hto akhanu kû̌ tanahtû̌de shû̌jî̌jî̌. Wî̤̌ lò̤tě̤pro̤kè a côshǐnutôcô dě kòyòsikè pwa̤susô̌tôrǐ. Kòyò dǒ a ô̌kè tokhlǒnu, a ǐsha gònò̤̌gòglè lô̌khô dě ahtû̌sò̌htò̌ mǒkhû̌ a Cǒmaradû̌ a ta̤pô̤ta̤phǎ. ^l

14 Ta̤jî̌ta̤jû̌ ginǐ̤plǎtôplǎ ma̤anǎ̤ htohǒ bǎbǎkǎlè yî̤khôtô̤̌nu ta̤jî̌ta̤jû̌ sucǒtôcǒ gǔ phǔhtò̌ hǒ.

Kǐlû amè susô̌tômè nutômè

15 Htodě bǎ tanaphû̌ pwa̤ susô̌tôpwa̤ nutôpwa̤ ǔhtò̌ kǐlû akhanu, yô̤̌tokhlǒ lě̤pwe̤htò̌ shû̌shû̌ mî̌ca dǒ mǒkhû̌ dě a hî̌ kû̌,

“Khònò̤̌ ta̤pô̤ta̤pwǎ̤ dǒ a gǔ pǒ hǎkhû̌ numî̌ a htûhto pa Běcǎ kû̌ a Me̤shǐya ata hǒ dě a gǔ pǒta̤ tûjû̌pwa̤ talakhǎ hǒ.” ^m

16 Htodě mǒ̤khumǒ̤pwǎ̤ ginǐ̤shi kû̌ sò̌lǐ̤ dǒ a hǎnòò̌ô̌ dǒ khwǐ tòcòhta dǒ Běcǎ Cǒmara alô̤mô̤̌ tokhlǒnu, a dô̌gînî̤lò̤ cabahtò̌ Cǒmara dě a hî̌ lô̌khô kû̌,

17 “Jòta̤pṳ̂̌mi sî̌ta̤pṳ̂̌cǒ a Běcǎ Cǒmara dǒ a ô̌htûpwa̤ dǒ něhǎlau, a ô̌htûpwa̤ tǒ̤lò̤ khònò̤̌ tôpwa̤, pa hî̌bwǐhî̌sîrî na dǒ na noǎ na ta̤pô̤ta̤phǎ dǒ adû̌ dě na sahtò̌ pǒhtota̤ akhû̌akhî hǒ. 18 Kòyòkhlilèphû̌ ashǔshawa̤ tokhlǒnu, a sǎphlǒdû̌ lô̌khô na hǒ. ⁿ Bǎbǎkǎlè, pô̤̌hî̌tètè̌ bǎbǎ, na ta̤sǎphlǒdû̌ ashěkhǎ hètǒ̤hǒ. Shěkhǎ hètǒ̤ dǒ na bǎ cî̌htò̌ kòyòsi tokhlǒ hǒ. Shěkhǎ hètǒ̤ dǒ na bǎ ǐ na piwi̤pèshè dǒ a ma̤ na ta̤ma̤ tokhlǒ bǎbǎ, na kòyò saprṳ̂sǎphǎ nutokhlǒ bǎbǎ, kòyò pṳ̂̌tôpwa̤ dǒ a bè̌dubè̌nǎ̤ na nutokhlǒ bǎbǎ, kòyò mi̤lṳ̌hǔsǎ tokhlǒ bǎbǎ, kòyò dǒ kòyò gènè̤ pî̌tî̌ lû̌û tokhlǒ bǎbǎ shěkhǎ hètǒ̤ dǒ Cǒmara gǔ bǎǐ asî akhû̌akǎ nuhǒ. Shěkhǎ hètǒ̤ dǒ na gǔ ma̤pî̌kè kòyò dǒ a ma̤pî̌kè hǎkhû̌ nutokhlǒ hǒ.” ^o

19 Bǎnukha kòyò bǔmôhtò̌ Cǒmara a ta̤lṳhtò̌hô dǒ mǒkhû̌ nutômè. ^p Dě kòyò kè̌shǐ ta̤olò̤wǎ̤lò̤ a tǒplò̌shǐ ô̌ dǒ ta̤lṳhtò̌hôkûnu. Htodě shî̌lî̌bǒ, ta̤pwe̤rupwe̤tè̌, mǒgǒ shî̌lî̌lò̤, tanahtû̌dema̤, siwǐ̤jî̌ phlǒdû̌ tokhlǒ julò̤ sô̌sô̌pô̤̌ gǎjunu. ^q