Rev 12 | KxfSCKXF | STEP | Htodě ta̤ma̤tô̤klî̌ya adû̌ayô̤̌ tôcǒ ô̌lṳ̌htò̌ dǒ mǒlǎ̤. Dě pwa̤mǒ̤ tôpwa̤ kûsô̌htò̌ lṳmṳ̌ dě a yî̤̌lò̤ la dǒ a khǎlǎlǎ̤ htodě a glû̌htò̌ shǎ shǐginǐ̤mè.

Revelation of John 12

Pwa̤mǒ̤ kû̌ wṳ̂̌dû̌ tôbô

1 Htodě ta̤ma̤tô̤klî̌ya adû̌ayô̤̌ tôcǒ ô̌lṳ̌htò̌ dǒ mǒlǎ̤. Dě pwa̤mǒ̤ tôpwa̤ kûsô̌htò̌ lṳmṳ̌ dě a yî̤̌lò̤ la dǒ a khǎlǎlǎ̤ htodě a glû̌htò̌ shǎ shǐginǐ̤mè. 2 Pwa̤mǒ̤ hǒtôpwa̤nu a mǒ̤dodû̌ dě a glè̌ phû̌ô̌ akhû̌akhî, ahǐphu shashû̌ dě a yî̤̌kǒyî̤̌sa. 3 Dě ta̤ma̤mǎnǎ khô̌ dǒ ashǔshawa̤ tôcǒ ô̌lṳ̌htò̌ pô̤̌ dǒ mǒlǎ̤. Dě wṳ̂̌lî̤dû̌ dǒ a ikǒô̌ susô̌tômè, ano̤ ô̌ aphòshǐ dě a glû̌ bò khû̌glû̌hta dǒ a ikǒ pṳ̂̌tèmè alô̤. ^a 4 A cî̌ lò̤tě̤ shǎ sucôtôcô dǒ mǒlǎ̤ kû̌ agòmě̤ dě a wîlò̤ bò shǎ nutokhlǒ dǒ hǎkhû̌. Wṳ̂̌dû̌ nutôbô nî̌, a ihtǒô̌ bǎ pwa̤mǒ̤ dǒ a glè̌ phû̌ô̌ tè̤tè̤̌ nutôpwa̤ alô̤mô̤̌ dě a kè̌ phû̌ô̌ pědě kû̌ a glè̌ pṳ̂̌ǎkè aphû̌. ^b 5 Htodě pwa̤mǒ̤ nutôpwa̤ phû̌ô̌ a phû̌pwa̤khû tôpwa̤ dǒ a gǔ pǒ shigǎ pṳ̂̌tôbǎ kû̌ khǐpo̤ tě̤htò̌ nutômè pě. ^c Dě phijǎphû̌ nutôpwa̤ nî̌ kòyò phǐcû̌ tephekè lû̌û dě kòyò johtò̌kè yǎ dǒ Cǒmara a ô̌ dě a phǐhtò̌kè lû̌û dǒ Cǒmara a tòcòhta lǎ̤ô̌ agûlǎ̤nu. ^d 6 Pwa̤mǒ̤ nî̌ a khlè̌cû̌ dǒ Cǒmara tîwî̌tòwò nǎ bǎ yǎ lǒ̤mî̌shô̌kla agûlǎ̤ tôkû. Dě kòyò gǔ kè̌pǒ̤ǐyǎ alṳmṳ̌ni̤ tôrǐ kû̌ ginǐ̤ya̤ kû̌ shǐsusô̌ pě.

7 Bǎnuakha ta̤shěta̤pě̤ ô̌htò̌ dǒ mǒkhû̌. Dě Mǐkela kû̌ a mǒkhû̌ tanaphû̌ tokhlǒ shěpě̤ kû̌ wṳ̂̌dû̌ nutôbô. Dě wṳ̂̌dû̌ nutôbô kû̌ a tanaphû̌ tokhlǒ shěpě̤ shěshǔ asî. ^e 8 Hǒtôplǎdě wṳ̂̌dû̌ nutôbô lò̤jû̌kè dě a kû̌ a tanaphû̌ tokhlǒ nî̌, kòyò dǐ ô̌pe asî bǎ mǒkhû̌ nutô̤̌. 9 Wṳ̂̌dû̌ dǒ něhǎlau tôbô dǒ kòyò kaǎ lû̌mi̤ kû̌ hǎkhû̌tana tô̤̌mî̌ Setò̤ dǒ a cû̌ tili̤tôlô̌ bò kòyò hǎkhû̌běkhû̌ nutôbô, ^f kòyò wîtě̤kè bò a kû̌ a tanaphû̌ tokhlǒ dǒ hǎkhû̌. ^g

10 Htodě he ganǎ̤de lě̤pwe̤htò̌shû̌ dǒ mǒkhû̌ dě a hî̌ kû̌,

“Khònò̤̌ Cǒmara a ta̤ma̤hǎplǎge hètǒ̤hǒ. Khònò̤̌ Cǒmara dǔlè̌lṳ̌ hto a ta̤pô̤ta̤phǎ hǒ. Khònò̤̌ Cǒmara pǒǐ hǎkhû̌ pô̤̌ khwǐ tôpwa̤ hǒ. Khònò̤̌ aphû̌khû Yeshǔ Khrǐ sahtò̌ pǒǐ ta̤hǒ. Ma̤titèhî̌dě kòyò dǒ a ihtǒ ô̌ bǎ pa Cǒmara alô̤mô̤̌ dě a bè̌ kòyò dǒ a yṳ̌nǐ̤nǎ̤nǐ̤ta̤ tokhlǒ a ta̤sǔ lṳ̌mṳ̌khǐkhǐ, lṳmṳ̌shasha tôpwa̤nu, khònò̤̌dě kòyò wîtě̤kè yǎ hǒ. ^h 11 Pa pṳ̌wè̤̌ tokhlǒnu, dǒ sû̌phû̌ asǐ akhû̌akhî, kû̌ asî shôbǐǐlṳ̌ bǎ kòyò Cǒmara alě̤ayô̤̌ akhû̌akhîdě, asî ma̤pè̤̌kè hǎkhû̌tana hǒ. Asî kè̌shǐbǎ kû̌ ta̤si bǎbǎ, a sǎleǐtû̌ a ta̤htûpwa̤ tô̤̌. 12 Ma̤pô̤̌nudě mǒkhû̌ kû̌ lǒ̤꤮ bò kòyò ô̌ dǒ mǒkhû̌ nutokhlǒ lǒ̤꤮ bò sî, sǎlě̤sǎlò̤ lô̌khô nî̌꤮, bǎbǎkǎlè dǒ hǎkhû̌ kû̌ shidû̌shite̤we̤ ayanu ajî̌ajû̌jî̌ mî̌ca. Ma̤titèhî̌dě hǎkhû̌tana hèlò̤hto dǒ sîô̌ dě a sǎphlǒdû̌ mî̌ca hǒ. Ma̤titèhî̌dě a sî̌ganǎ̤ kû̌ ashěakhǎ ô̌kè pepwǎ tashò̌phû̌nô̤̌ pwǎ.”

13 Bǎ wṳ̂̌dû̌ nutôbô sî̌yahto kû̌ kòyò wîtě̤kè a dǒ hǎkhû̌ akhanu, a sahtò̌ lṳ̂pṳ̂̌ pwa̤mǒ̤ dǒ aphû̌ô̌ǐ a phû̌pwa̤khû nutôpwa̤. 14 Bǎbǎkǎlè pô̤̌khô pwa̤mǒ̤ nutôpwa̤ gǔ wi̤gebò̌ dǒ agûlǎ̤ dǒ alǎ̤ô̌ bǎ mi̤kla aya pěnu, kòyò ǐ yǎ kû̌ lě̤pǎdû̌ adî̌ge ginǐ̤khô. Dě kòyò gǔ cû̌kè̌pǒ̤ǐ tepheyî̤ khô̌kè lû̌û kû̌ wṳ̂̌dû̌ nutôbô suně kû̌ tôkû̌ pě. ⁱ 15 Htodě pô̤̌khô wṳ̂̌dû̌ gǔ plûlò̤ cǔkè pwa̤mǒ̤nu tôpwa̤ ayanu, a plûlò̤ shi dǒ agô̌kû asô̌sô̌kû̌ shilô̤̌mǒ̤lò̤nu. 16 Bǎbǎkǎlè hǎkhû̌ ma̤jè̌ bǎ pwa̤mǒ̤ nutôpwa̤. Bǎ shiô̌ dǒ wṳ̂̌dû̌ gô̌kû hǎhtò̌ dě a lò̤ akhanu, hǎkhû̌ bǔmô agô̌kû dě a cî̌sǔ nṳ̌kèbò shinu tokhlǒ pwǎ. 17 Wṳ̂̌dû̌ nutôbô sǎphlǒdû̌ pwa̤mǒ̤ nutôpwa̤ akhû̌akhî, a hǎhtò̌cû̌ tephekè dě a gǔ cû̌shě kû̌ pwa̤mǒ̤ aphû̌ali̤ dǒ a ô̌kè nutokhlǒ. A ô̌kè tokhlǒ numî̌ kòyò dǒ a ganǎ̤de Cǒmara ta̤mǎlò̤ nutokhlǒ kû̌ kòyò dǒ acǒ kû̌ a ta̤khòlṳ̌ dǒ Yeshǔ dǔlè̌lṳ̌kè lû̌û nutokhlǒ hǒ. 18 Dě wṳ̂̌dû̌ nutôbô cû̌ ihtǒô̌ bǎ shidû̌te̤we̤ ahtunu.