Rev 13 | KxfSCKXF | STEP | Bǎnuakha, he kè̌shǐ ta̤ěta̤jô̌ tôdo ô̌ dǒ shidû̌shite̤we̤ akû dě a hǎhtò̌. Ano̤ ô̌ aphòshǐ, a ikǒô̌ susô̌tômè, ano̤ pṳ̂̌ tôbônu, a khû̌glû̌hta ô̌bò, htodě dǒ a ikǒ pṳ̂̌tèmè alô̤nu kòyò wě̤ bò lû̌mi̤ kû̌ “Ta̤pîjî̌pèshè̌ Cǒmara” pô̤̌nu.

Revelation of John 13

Ta̤ěta̤jô̌ ginǐ̤do

1 Bǎnuakha, he kè̌shǐ ta̤ěta̤jô̌ tôdo ô̌ dǒ shidû̌shite̤we̤ akû dě a hǎhtò̌. ^a Ano̤ ô̌ aphòshǐ, a ikǒô̌ susô̌tômè, ano̤ pṳ̂̌ tôbônu, a khû̌glû̌hta ô̌bò, htodě dǒ a ikǒ pṳ̂̌tèmè alô̤nu kòyò wě̤ bò lû̌mi̤ kû̌ “Ta̤pîjî̌pèshè̌ Cǒmara” pô̤̌nu. ^b 2 Ta̤ěta̤jô̌ hǒtôdo nî̌, asô̌sô̌kû̌ khîmî̌phû̌, akhò̌lôpô̤̌nu asô̌sô̌kû̌ hta khò̌lôpô̤̌ dě agô̌kûnu asô̌sô̌kû̌ khîdû̌ gô̌kû. Wṳ̂̌dû̌ nutôbô ǐ ta̤ěta̤jô̌ nutôdo kû̌ a ta̤pô̤ta̤phǎ kû̌ a lǎ̤hǎnòò̌ mè̤̌kû̌ khwǐ tòcòhtanu kû̌ ta̤siwi̤sòwò̤ dǒ a gǔ pǒta̤ aya tokhlǒnu. ^c 3 Ta̤ěta̤jô̌ a ikǒ susô̌tômè akla tômènu, a sô̌sô̌kû̌ a bǎ kamǎ dě a glè̌si tè̤tè̤̌ kèhǒ, bǎbǎkǎlè a ta̤htòta̤sha tokhlǒnu, awô̌ getîkhî lǒ̤bò hǒ. Dě hǎkhû̌tôběbò ǒò̌ kiti̤kaa dě a gû̌kû̌ ta̤ěta̤jô̌ nutôdo akò. 4 Wṳ̂̌dû̌ nutôbô ǐ hto a ta̤siwi̤sòwò̤ kû̌ ta̤ěta̤jô̌ nutôdo akhû̌akhî, kòyò pṳ̂̌tôpwa̤ cubucabahtò̌ bò yǎ. Asî cubucabahtò̌ ta̤ěta̤jô̌ dě a hî̌ lô̌khô kû̌, “Kòyò dǒ asô̌sô̌kû̌ ta̤ěta̤jô̌ numî̌ a ô̌ ya? Mò̌pè tôpwa̤ shěpě̤ shěshu bǔ a ya?” 5 Ta̤ěta̤jô̌ nutôdo nî̌, a nǐ̤bǎ ashěakhǎ wô̌ dǒ a gǔ bè̌dû̌ htò̌htû anǎ̤ dě a gǔ pîjî̌ǐsho Cǒmara. Htokhôtô̤̌ kòyò ǐ yǎ dǒ a gǔ noǎ a ta̤siwi̤sòwò̤ lǐ̤shi kû̌ ginǐ̤la pě. ^d 6 A sahtò̌ ǐshoǐbě Cǒmara kû̌ Cǒmara ami̤. Htokhôtô̤̌ a ǐshoǐbě tǒ̤ Cǒmara lǎ̤ô̌gûlǎ̤ kû̌ lǒ̤꤮ bò kòyò dǒ a ô̌ dǒ mǒkhû̌ tokhlǒ. 7 A nǐ̤bǎ ashěakhǎ wô̌ dǒ a gǔ shěpě̤ Cǒmara a kòyò saprṳ̂ dě a gǔ ma̤pè̤̌kè asî pě, dě kòyò gǔ ǐ a ta̤siwi̤sòwò̤ dǒ a gǔ pǒǐbò khlilè pṳ̂̌tômṳ̌, kòyò pṳ̂̌tôcǒ, kû̌ lǒ̤bò kòyò dǒ a hî̌bǎ ayô̤̌ titètè̌ bǎbǎ kû̌ khlilèphû̌ titètè̌ bǎbǎ nutokhlǒ pě. ^e 8 Kòyò lǒ̤bò dǒ a ô̌ dǒ hǎkhû̌ pṳ̂̌tôpwa̤nu, a gǔ cubucabahtò̌ bò lû̌pě. Sahtò̌ dǒ kòyò bô̌lò̤ hǎkhû̌ akhape, kòyò dǒ a ô̌htûpwa̤ dǒ hǎkhû̌ nutokhlǒ dě kòyò wě̤padô̌ asîmi̤ dǒ sû̌phû̌ nutôdo a lî̤htûpwa̤ akû khôtô̤̌ tokhlǒnu, a gǔ cubucabahtò̌ bò lô̌khô ta̤mi̤ta̤mò̤̌ nutôdo pě. Sû̌phû̌ nutôdo mî̌ kòyò ma̤si yǎnu tôpwa̤ hǒ. ^f

9 Pô̤̌nudě sînò̌kulǎ kè̌ô̌ dě ganǎ̤de lô̌khô pû nî̌꤮.

10 Kòyò tôpwa̤pwa̤ dǒ kòyò ta̤yè̤lò̤nǎ hto lû̌û dǒ kòyò gǔ pṳ̂̌ dǒlò̤tě̤ a dǒ apô̤kû hî̌nu, kòyò bǎ pṳ̂̌ dǒlò̤tě̤nò a pě. Kòyò tôpwa̤pwa̤ dǒ kòyò ta̤yè̤lò̤nǎ hto lû̌û dǒ kòyò bǎma̤si a kû̌ nò̌she pě dě, kòyò bǎ ma̤sinò a kû̌ nò̌she pě pwǎ.

Cǒmara kaǎ a kòyò dǒ a gǔ bǎsǎphlǒhtû ta̤jî̌ta̤jû̌ dě bǎ jûǎyṳ̌ǎ ta̤ ayapwǎ. ^g

Ta̤mi̤ta̤mò̤̌ ô̌ dǒ hǎlǎ̤ hǎhtò̌

11 Pô̤̌nuhtodě he kè̌shǐ ta̤mi̤ta̤mò̤̌ dǒ ashǔshawa̤ tôdo ô̌ dǒ hǎlǎ̤ hǎhtò̌. Dě ano̤ ô̌ ginǐ̤phò dě asô̌sô̌kû̌ sû̌phû̌ ano̤nu, htodě a hî̌bǎ sô̌sô̌kû̌ wṳ̂̌dû̌ nutôbô. 12 Ta̤ěta̤jô̌ dǒ a ô̌ dǒ hǎlǎ̤ hǎhtò̌ nutôdo nî̌, a noǎbò ta̤ěta̤jô̌ dǒ awǐ nutôdo a ta̤siwi̤sòwò̤ nutokhlǒ dǒ alô̤mô̤̌ pô̤̌khô kòyò gǔ cabahtò̌ ta̤ěta̤jô̌ dǒ a bǎ kamǎ nudě awô̌ getîkhînu tôdo, dě a noshû̌ hǎkhû̌nu kû̌ lǒ̤bò kòyò ô̌ dǒ hǎkhû̌ nutokhlǒ gǔ cabahtò̌ yǎnu. 13 Ta̤ěta̤jô̌ ginǐ̤do nutôdonu, a ma̤lṳ̌ bǎ kòyò ta̤ ma̤tô̤klî̌ya tokhlǒ. A no mî̌ ô̌ dǒ mǒkhû̌ hèlò̤ dǒ hǎkhû̌ bǎ kòyò pṳ̂̌tôpwa̤ a lô̤mô̤̌. 14 Htodě a dǔlè̌lṳ̌ a ta̤ma̤tô̤klî̌ya dǒ ta̤ěta̤jô̌ dǒ awǐnu tôdo noma̤ lû̌û dǒ alô̤mô̤̌ nutokhlǒ akhû̌akhî, a lô̌ǐplò̤ǐ nṳ̌bò kòyò ô̌htûpwa̤ dǒ hǎkhû̌nu tokhlǒ. Ta̤ěta̤jô̌ ginǐ̤do nutôdonu, a nobô̌htò̌ asî ta̤yô̤ta̤gî̌ tôdo pô̤̌khô a gǔ bè̌dû̌bè̌htû getîkhî ta̤ěta̤jô̌ dǒ a bǎ kamǎ kû̌ nò̌she dě a ô̌htûpwa̤ pě nutôdo. 15 Pô̤̌khô ta̤yô̤nu gǔ hî̌bǎjò dě a gǔ ma̤sibò kòyò dǒ a cabahtò̌ lû̌û tô̤̌ nutokhlǒ ayanu, kòyò ǐ ta̤ěta̤jô̌ ginǐ̤do nutôdo ta̤pô̤ta̤phǎ dǒ a gǔ ǔnṳ̌ htûpwa̤jò ta̤ěta̤jô̌ dǒ awǐnu tôdo ata̤yô̤nu akû. 16 Kòyò dǒ ami̤lṳ̌hǔsǎ tokhlǒ bǎbǎ, kòyò dǒ kòyò gènè̤ pî̌tî̌ lû̌û tokhlǒnu bǎbǎ, kòyò dû̌yò̤̌ bǎbǎ, kòyò shèwè̤ bǎbǎ, jû̌ tokhlǒ bǎbǎ, kòyò nǐ̤bǎ ta̤pi̤li̤ tokhlǒ bǎbǎ, pô̤̌khô asî gǔ nǐ̤bǎ ta̤ma̤mǎnǎ tôcǒ dǒ acǔde cǔtômû alô̤, mè̤̌tô̤̌dě dǒ a mě̤htò̌lô̤ ayanu ta̤ěta̤jô̌ ginǐ̤do nutôdo nojî̌nojû̌bò kòyò pṳ̂̌tôpwa̤. 17 Kòyò dǒ ta̤ma̤mǎnǎ ô̌ kû̌ kòyò tô̤̌ tokhlǒnu, a pwî̤ǎ shaǎ anǐ̤ kû̌ kòyò tô̤̌. Ta̤ma̤mǎnǎ numî̌ ta̤mi̤ta̤mò̤̌ ami̤, mè̤̌tô̤̌mî̌ ta̤dô̌mǎnǎ tôcǒ dǒ a ǐ lṳ̌htò̌ lû̌mi̤.

18 Pô̤̌khô sî gǔ sî̌yaphlô ayanu, sî bǎ lîmò sî̌jò̌. Kòyò tôpwa̤pwa̤ dǒ a ô̌ kû̌ ta̤sî̌ta̤jò̌ dǒ a dô̌jò ta̤mi̤ta̤mò̤̌ a ta̤dô̌mǎnǎ tôcǒnu, no dô̌bǎ tûû̌ yǎ, ma̤titèhî̌dě ta̤dô̌mǎnǎ numî̌ kòyòhǎkhû̌phû̌ alî̤phlǒ ta̤dô̌bǎ. Alî̤phlǒ ta̤dô̌bǎ numî̌ yasusô̌ kû̌ shisusô̌ kû̌ susô̌.