Rev 14 | KxfSCKXF | STEP | Bǎnukha, he kè̌shǐ sû̌phû̌ nutôdo ihtǒô̌ dǒ Sǐû khôlôkhû̌. Dě kòyò ihtǒ ô̌plǒ kû̌ a pwa̤ tôsě kû̌ lǐ̤shò̌ kû̌ lǐ̤rǐ. Dǒ kòyò nutokhlǒ a mě̤htò̌lô̤nu, ta̤ wě̤mǎnǎ sû̌phû̌ ami̤ kû̌ apha ami̤.

Revelation of John 14

Sû̌phû̌ kû̌ a kòyò saprṳ̂

1 Bǎnukha, he kè̌shǐ sû̌phû̌ nutôdo ihtǒô̌ dǒ Sǐû khôlôkhû̌. Dě kòyò ihtǒ ô̌plǒ kû̌ a pwa̤ tôsě kû̌ lǐ̤shò̌ kû̌ lǐ̤rǐ. Dǒ kòyò nutokhlǒ a mě̤htò̌lô̤nu, ta̤ wě̤mǎnǎ sû̌phû̌ ami̤ kû̌ apha ami̤. ^a 2 Dě he ganǎ̤de dǒ mǒkhû̌nu ta̤pwe̤htò̌ tôcǒ dě a apwe̤ tôgutôshî sô̌sô̌kû̌ shěpě̤lò̤tě̤plò̤ htodě shî̌lî̌lò̤nu. Htokhôtô̤̌ apwe̤ sô̌sô̌kû̌ kòyò dǒ pwe̤rupwe̤tè̌ tǐtu tegwe tokhlǒnu. 3 Ta̤ dǒ kòyò rû̌htò̌ge asî pwa̤ tôsě kû̌ lǐ̤shò̌ kû̌ lǐ̤rǐ tokhlǒnu, a ihtǒô̌ lô̌khô dǒ khwǐ côphǎ tòcòhta kû̌ ta̤htûpwa̤nu lǐ̤do kû̌ mǒ̤khumǒ̤pwǎ̤ nutokhlǒ alô̤mô̤̌. Asî lî̤sǎwǐ asa tôtô̤̌ nî̌ kòyò sû̌ǐjò pwǎtǒ̤ asî nô̤̌nu tôtô̤̌pwǎ. 4 Asî tokhlǒ numî̌ pwa̤khû dǒ asǎphlǒ mṳ̂̌plî dě a hǎmôô̌ bǎ kû̌ pwa̤mǒ̤ tô̤̌ tokhlǒ. Asî mî̌ pwa̤khûphû̌sǎ dǒ a cǒtè̤ tokhlǒ. Sû̌phû̌ nutôdo cû̌bǎtètè̌ bǎbǎ, asî gû̌ cû̌kû̌ lû̌ûkò. Asî mî̌ kòyò rû̌htò̌ge hto a dǒ hǎkhû̌phû̌ tokhlǒ akla dě asî mî̌ kòyò tokhlǒ dǒ kòyò lṳhtò̌ wǐ lû̌û dǒ Cǒmara kû̌ sû̌phû̌ nutôdo a ô̌ hǒ. 5 Asî hî̌bǎ lòhô gû̌ kòyò tô̤̌. Asî ta̤sǔta̤plě ô̌kû̌ kòyò tô̤̌ numî̌ kòyò sî̌ganǎ̤ pwǎ. ^b

Tanaphû̌ sò̌su

6 Htodě he kè̌shǐ mǒkhû̌ tanaphû̌ ashǔshawa̤ dě a wi̤htò̌ dǒ mǒlǎ̤ dě a phǐhènǐ̤ ta̤sǎlě̤we̤kè tûjû̌pwa̤ awe̤akè. Dě a gǔ shôbǐǐ sî̌yabǎ kòyò hǎkhû̌phû̌ tokhlǒ kû̌ kòyò khlilèphû̌ pṳ̂̌tôcǒ, kû̌ kòyòplô̤̌ pṳ̂̌tôplô̤̌, kû̌ kòyò dǒ a hî̌bǎ ayô̤̌ acǒcǒ bǎbǎ kû̌ kòyò pṳ̂̌tôcǒ kû̌ ta̤sǎlě̤we̤kè nupě. 7 A kaǎgǔhtò̌ dě a hî̌ kû̌, “Ǐsha bè̌dubè̌nǎ̤ Cǒmara dě htû̌sò̌htò̌ abwǐsîrîdû̌sîrîhtû, ma̤titèhî̌dě shěkhǎ hètǒ̤ dǒ a cî̌htò̌ kòyò hǎkhû̌phû̌ hǒ. Cabahtò̌ mò̌ Cǒmara dǒ a bô̌lò̤ mǒkhû̌ kû̌ hǎkhû̌ shidû̌shite̤we̤ kû̌ shipǒ̤hǎhtò̌ nutokhlǒ tôpwa̤nu.”

8 Tanaphû̌ sò̌ginǐ̤ nutôpwa̤ gû̌hî̌ lû̌kò kû̌, “A lò̤tě̤pro̤kè hǒ, wî̤̌dû̌ Babǔlû lò̤tě̤pro̤kè hǒ, a no ô bò kòyò kû̌ shisî̌yô̤̌ dǒ amè̤̌kû̌ sǐshiphěyî̌ a ta̤sǎyṳsǎbǎ phû̌mò̤̌ nutokhlǒ hǒ.” ^c

9 Dě tanaphû̌ supwa̤ nutôpwa̤ gû̌hî̌ htò̌shû̌ kû̌ tanaphû̌ awǐ nusò̌ginǐ̤ akò kû̌, “Kòyò dǒ a cubucabahtò̌ ta̤mi̤ta̤mò̤̌nu kû̌ ata̤yô̤ tôpwa̤nu dě a phî̌shěshu ta̤ma̤dòǐ dǒ kòyò ma̤dòǐ bǎ asî dǒ a mě̤htò̌lô̤ nutokhlǒ bǎbǎ, kè̌mè̤̌tô̤̌dě kòyò ma̤dòǐ bǎ asî dǒ a cǔdelô̤ nutokhlǒ bǎbǎ, 10 Asî anǎ̤běcǎ tûû̌ a gǔ ô kû̌ lô̌khô Cǒmara a ta̤sǎphlǒdû̌ ashisî̌yô̤̌ pě. A ta̤sǎphlǒdû̌ shibè tôbènu, kòyò tènṳ̌be kû̌ shisî̌yô̤̌. ^d Lǒ̤bò kòyò dǒ a ma̤ta̤ pô̤̌o tokhlǒnu a bǎ khòbǎ ta̤jî̌ta̤jû̌ kû̌ mî̌ dǒ kòyò shû̌u kû̌ kabò akûnu pě. A gǔ khòjî̌khòjû̌ dǒ tanaphû̌ aplò̌shǐ tokhlǒ kû̌ sû̌phû̌ nutôdo a lô̤mô̤̌ pě. ^e 11 Ta̤jî̌ta̤jû̌ mî̌khǔhtò̌ asînu, a khǔhtò̌ dǒ hǎkhû̌ tûjû̌pwa̤ talakhǎ pě. Kòyò dǒ a cabahtò̌ ta̤ěta̤jô̌nu, kû̌ ata̤yô̤ nutokhlǒ, kòyò dǒ a phî̌shǐshu ta̤ěta̤jô̌ a ta̤ma̤dòǐ kû̌ ami̤ tokhlǒnu, lṳmṳ̌shî̌ bǎbǎ, lṳmṳ̌hǎ bǎbǎ, ta̤jî̌ta̤jû̌ yǎkhè̌hèbǎ pe asîya tôkhò̌ tô̤̌.” ^f 12 Pô̤̌nudě Cǒmara a kòyò plò̌shǐ dǒ a ganǎ̤de dě a ô̌htûpwa̤ pô̤̌ Cǒmara a ta̤mǎlò̤ tokhlǒ dě acǒ kû̌ Yeshǔ tokhlǒnu, tôbǎ khòsǎdôbò̌ta̤ nutokhlǒ.

13 Htodě he ganǎ̤de ta̤lě̤pwe̤htò̌ dǒ mǒkhû̌ dě a hî̌ kû̌, “Wě̤mǎnǎyǎ, sahtò̌ khònò̤̌ hènènu, kòyò dǒ a si dǒ Cǒmara a ta̤phǐta̤ma̤ akû tokhlǒnu, a gǔ nǐ̤bǎ ta̤ǐshowî̤.” Yôla Plò̌shǐ Běcǎ hî̌ kû̌, “A mè̤̌mî̌ca ma̤titèhî̌dě asî gǔ ô̌kǔbǎ lô̌khô dǒ a ta̤phǐta̤ma̤ tokhlǒ akû kû̌ a ta̤jî̌ta̤jû̌ tokhlǒ akû hǒ. Htokhôtô̤̌ asî ata̤phǐta̤ma̤ dǒ abwǐsîrî ô̌ tokhlǒnu, a gǔ gû̌kû̌ asîkò pě.”

Hǎkhû̌ a ta̤kǎbǔ ashěakhǎ

14 Pô̤̌nuhtodě dǒnô̌kònu he kè̌shǐ poǒlṳ̌bû tôbě, dě dǒ poǒlṳ̌ nutôbě alô̤nu, asô̌sô̌kû̌ kòyò hǎnòò̌ô̌ tôpwa̤ dě a glû̌ khû̌glû̌hta tômè dě a pṳ̂̌měǐ gaja htòwô̌ tôbǎ dǒ a cǔdekû. ^g 15 Htodě tanaphû̌ dǒ ashǔshawa̤ tôpwa̤ ô̌dǒ ta̤lṳhtò̌hô akû dě a hǎhtò̌. Dě a yî̤̌kǒhtò̌ kòyò hǎnòò̌ô̌ dǒ poǒlṳ̌lô̤ nutôpwa̤ kû̌, “No na gajanu dě kǎmò̌ bǔnu, ma̤titèhî̌dě tô kǎ bǔshò̌ shěkhǎ tǒ̤hǒ. Dǒ hǎkhû̌nu, bǔmi bòkèhǒ.” ^h 16 Hǒtôplǎdě kòyò hǎnòò̌ô̌ dǒ poǒlṳ̌lô̤ nutôpwa̤ wô̤̌lò̤ agaja dǒ hǎkhû̌ dě a kǎkè bǔshò̌ dǒ hǎkhû̌nu tokhlǒ.

17 Pô̤̌nuhtodě he kè̌shǐ mǒkhû̌tanaphû̌ ashǔshawa̤ ô̌ dǒ mǒkhû̌ ta̤lṳhtò̌hô akû dě a hǎhtò̌ dě a pṳ̂̌měǐ gaja htòwô̌ tôbǎbǎ. 18 Htodě mǒkhû̌tanaphû̌ ashǔshawa̤ tôpwa̤ dǒ kòyò ǐ lò̤ yǎ ta̤ma̤ dǒ a bǎ pǒǐ mî̌ tôpwa̤nu, a ô̌ dǒ ta̤lṳhtò̌awǎ̤ gûlǎ̤nu dě a hǎhtò̌. Dě a yî̤̌kǒhtò̌ tanaphû̌ dǒ agaja htòwô̌ ô̌ nutôpwa̤ dě a hî̌ lû̌û kû̌, “Wô̤̌lò̤ na gaja htòwô̌nu, dě kǎplǒbò kèmò̌ hǎkhû̌ sîpî̌sǎ dǒ asǎ bǎnu tokhlǒ, ami bòhǒ.” 19 Pô̤̌nu akhû̌akhî tanaphû̌ nutôpwa̤ wô̤̌lò̤ agaja dǒ hǎkhû̌ dě a kǎkè a sîpî̌sǎnu htodě a wînṳ̌kè dǒ kòyò shǔtò̤̌lè htǒshi adû̌ dǒ asô̌sô̌kû̌ Cǒmara a ta̤sǎphlǒdû̌nu akû. 20 Sîpî̌sǎ hǒtokhlǒnu, kòyò wǐ̤ asî dǒ shǔtò̤̌lè sîpî̌shi agûlǎ̤ dǒ a ô̌ dǒ wî̤̌khlonu. Shǔtò̤̌lè sîpî̌shi agûlǎ̤nu, sǐtokhlǒ shǐhtò̌ ayî̤ tôya̤ kû̌ shilǐ̤sô̌ kû̌ lǐ̤mila, dě ayô̤̌lò̤nu a ô̌ yè̤̌tu. ⁱ