Revelation of John 15
Mǒkhû̌ tanaphû̌ susô̌tôpwa̤ kû̌ ta̤jî̌ susô̌tôcǒ
1Pô̤̌nuhtodě he kè̌shǐ ta̤ma̤tô̤klî̌ya dû̌ ashǔshawa̤ tôcǒ ô̌lṳ̌htò̌ dǒ mǒlǎ̤. He kè̌shǐ mǒkhû̌ tanaphû̌ susô̌tôpwa̤ dǒ a pṳ̂̌měǐ ta̤jî̌ta̤jû̌ susô̌tôcǒ. Hǒtokhlǒ mî̌ ta̤jî̌ta̤jû̌ dǒ jǒkò gutṳ̌ hǒ, ma̤titèhî̌dě, hǒtokhlǒ htûhtò̌ htopěnu, Cǒmara sǎphlǒdû̌ petô̤̌. 2He kè̌shǐ ta̤ dǒ asô̌sô̌kû̌ shidû̌shite̤we̤ dǒ ashěkôshôlò̤ kû̌ mî̌ ô̌ tôkoǒ. He kè̌shǐ pô̤̌ kòyò tokhlǒ dǒ a ma̤pè̤̌ ta̤ěta̤jô̌ nutôdo kû̌ ata̤yô̤, kû̌ alî̤phlǒ dô̌bǎ ayasusô̌ kû̌ shǔshi kû̌ susô̌ nutokhlǒ. Asî ihtǒô̌ dǒ shidû̌shite̤we̤ ashěkôshô ahtunu, dě a pṳ̂̌měǐ lô̌khô tǐtu tegwe dǒ Cǒmara ǐ asî nutokhlǒ. 3Dě asî sǎwǐ htò̌ lô̌khô Cǒmara jû̌ Khûmṳ̂shě a ta̤sǎwǐ kû̌ sû̌phû̌ a ta̤sǎwǐnu dě a hî̌ kû̌, “Jò̌ ta̤lǒ̤bò a Běcǎ Cǒmara na ta̤ma̤ tokhlǒnu adû̌ayô̤̌ dě a cô̌klǐcô̌sè gutṳ̌glǎ. Na mî̌ shiphû̌gǎphû̌ tokhlǒ akhwǐ, naklè̌naklò sî tokhlǒ numî̌ atôabǎ acǒatè̤ mè̤̌mî̌ca. a 4Ǒ Běcǎ, kòyò ǐsha na lǎ̤tô̤̌, na ta̤bwǐdû̌sîrîhtûnu kòyò olò̤ na tô̤̌nu a ô̌jò pe bǎ tôpwǎ̤꤮ tô̤̌. Cǒmara aplò̌shǐnu a ô̌ pwǎ tôpwa̤ nô̤̌ pwǎ. b Shiphû̌gǎphû̌ lǒ̤bò kè̌shǐ na ma̤ta̤tô ma̤ta̤cǒ akhû̌akhî, a hè cubucabahtò̌ bò na pě.” c 5Htodě he kè̌shǐ mǒkhû̌ a ta̤lṳhtò̌hô amè̤̌kû̌ ta̤olò̤ hǐphû̌ plò̌shǐ agûlǎ̤ nutôkû bǔmôhtò̌. d 6Dě tanaphû̌ susô̌tôpwa̤ dǒ a pṳ̂̌měǐ ta̤jî̌ta̤jû̌ susô̌tôcǒ hǒtokhlǒnu, a ô̌ dǒ ta̤lṳhtò̌hôkû dě a hǎhtò̌. Asî kûsô̌nṳ̌ jejû bò alîkîtrî̌ tokhlǒ dě a shenǐ̤ lô̌khô htabě pǎdû̌ dǒ a sôôlô̤ pṳ̂̌tôpwa̤. 7Bǎnuakha ta̤htûpwa̤ lǐ̤do akla tôdonu, a ǐ mǒkhû̌ tanaphû̌ susô̌tôpwa̤nu tokhlǒ kû̌ balějôwô̤hta susô̌tôbǎ dǒ a ô̌ be kû̌ Cǒmara dǒ a ô̌htûpwa̤ tûjû̌pwa̤ talakhǎ nutôpwa̤ a ta̤sǎphlǒdû̌. 8Mî̌ dǒ amè̤̌kû̌ Cǒmara a ta̤bwǐdû̌sîrîhtû kû̌ a ta̤pô̤ta̤pwǎ̤nu, akhǔ toǒhtò̌bò dǒ ta̤lṳhtò̌hô akû. Htodě ta̤jî̌ta̤jû̌ susô̌tôcǒ dǒ mǒkhû̌ tanaphû̌ susô̌tôpwa̤ phî̌hènṳ̌ nî̌ a kè̌ htokhôtô̤̌nu, kòyò nṳ̌jò dǒ ta̤lṳhtò̌hôkû tôpwǎ̤꤮ tô̤̌. e
Copyright information for
KxfSCKXF