Rev 17 | KxfSCKXF | STEP | Hǒtôplǎdě mǒkhû̌ tanaphû̌ susô̌tôpwa̤ dǒ a pṳ̂̌mě ǐ balějôwô̤ susô̌tômè akla tôpwa̤nu, a hè dǒ he ô̌ dě a hî̌ he kû̌, “Hèmò̌ dě he gǔ dǔlè̌lṳ̌ na kû̌ Cǒmara gǔ cî̌htò̌ pwa̤mǒ̤tili̤ mi̤lṳ̌hǔsǎ nutôpwa̤ hî̌tè pě yanu. Pwa̤mǒ̤tili̤ nutôpwa̤ mî̌ wî̤̌dû̌wî̤̌htû dǒ a ô̌ dǒ shilô̤̌mǒ̤dû̌ pṳ̂̌mǒ̤mǒ̤ akòshî̌ nutôwî̤̌.

Revelation of John 17

Pwa̤mǒ̤tili̤ dǒ mi̤lṳ̌hǔsǎ tôpwa̤

1 Hǒtôplǎdě mǒkhû̌ tanaphû̌ susô̌tôpwa̤ dǒ a pṳ̂̌mě ǐ balějôwô̤ susô̌tômè akla tôpwa̤nu, a hè dǒ he ô̌ dě a hî̌ he kû̌, “Hèmò̌ dě he gǔ dǔlè̌lṳ̌ na kû̌ Cǒmara gǔ cî̌htò̌ pwa̤mǒ̤tili̤ mi̤lṳ̌hǔsǎ nutôpwa̤ hî̌tè pě yanu. Pwa̤mǒ̤tili̤ nutôpwa̤ mî̌ wî̤̌dû̌wî̤̌htû dǒ a ô̌ dǒ shilô̤̌mǒ̤dû̌ pṳ̂̌mǒ̤mǒ̤ akòshî̌ nutôwî̤̌. ^a 2 Hǎkhû̌ khwǐcôphǎ tokhlǒ cû̌sǔnṳ̌plěnṳ̌ lô̌khô kû̌ pwa̤mǒ̤ nutôpwa̤. Htodě kòyò hǎkhû̌phû̌ tokhlǒ ǎmuômu bò anǎ̤ kû̌ shisî̌yô̤̌ amè̤̌ pwa̤mǒ̤ nutôpwa̤ a ta̤tili̤tôlô̌ tokhlǒnu hǒ.” ^b

3 Dǒ Yôla Plò̌shǐ Běcǎ a ta̤ma̤jè̌ akhû̌akhî, mǒkhû̌ tanaphû̌ kaǎcû̌ he dǒ lǒ̤mî̌shô̌kla tôkû. He cû̌ bǎnu tôkû dě he cû̌kè̌shǐ pwa̤mǒ̤ tôpwa̤ hǎnòò̌ dǒ ta̤ěta̤jô̌ li̤pîsǐ nutôdo akhû̌. Ta̤ěta̤jô̌ hǒtôdo anǎ̤lô̤ tôdobònu, kòyò wě̤ bò ami̤ kû̌ “A pîjî̌ǐsho Cǒmara” pô̤̌nu. Ta̤ěta̤jô̌ hǒtôdonu, a ikǒ ô̌ susô̌tômè dě ano̤ ô̌ phòshǐ. ^c 4 Pwa̤mǒ̤ hǒtôpwa̤nu a kûsô̌htò̌ jejû alî̤wô̤ kû̌ alî̤pi̤sǐ dě a tîwî̌htò̌ anǎ̤ kû̌ hta, lǒ̤ lě̤dû̌pwî̤htû kû̌ pwe̤sa tokhlǒ. Dǒ a cǔdekûnu, a pṳ̂̌mě ǐ balěhta tôbǎ dě a betipǐ kû̌ ta̤ma̤yǒ̤sǐpi̤wô̤̌ tokhlǒ kû̌ a ta̤tili̤tôlô̌ phû̌mò̤̌ tokhlǒ. ^d 5 Dǒ a mě̤htò̌lô̤nu, kòyò wě̤ ami̤ kû̌ yô̤̌mûyô̤̌sǎ ta̤sûû̌hǔ tôphlǒ dě a hî̌ kû̌,

“Wî̤̌dû̌ Babǔlû

Amè̤̌kû̌ lǒ̤bò pwa̤mǒ̤tili̤ tokhlǒ

Kû̌ hǎkhû̌ a ta̤phû̌mò̤̌shǐhtô tokhlǒ amǒ̤,”

kò wě̤nǎ pô̤̌nu.

6 Dě he kè̌shǐ pwa̤mǒ̤ nutôpwa̤ ômṳ anǎ̤ kû̌ Cǒmara a kòyò dǒ acǒ kû̌ Yeshǔ dě ta̤ ma̤si yǎ nutokhlǒ asǐ.

Bǎ he kè̌shǐ akhanu, he ǒò̌ kiti̤ kaa jòjî̌ tô̤̌. 7 Mǒkhû̌ tanaphû̌ gwè̌ he kû̌, “Na ǒò̌ kiti̤ kaa ma̤titè?” He gǔ shôbǐǐ bǎ na ta̤ dǒ yô̤̌mûyô̤̌sǎ ta̤sûû̌ pwa̤mǒ̤ nutôpwa̤ awe̤akè, htodě amè̤̌kû̌ ta̤ěta̤jô̌ dǒ a ikǒ ô̌ susô̌tômènu tôdo kû̌ ano ô̌ phòshǐ dǒ a dò̌ lû̌û nutôdo awe̤akè. 8 Ta̤ěta̤jô̌ dǒ na kè̌shǐ yǎ nî̌ taplǎkhanu a ô̌ htohǒ bǎbǎkǎlè khònò̤̌ a ô̌ pe tô̤̌ nutôdo gǔ ô̌lṳ̌htò̌ sô̌ pě. ^e A ô̌ dǒ khokûdû̌yô̤̌ nutôkû dě a gǔ hǎhtò̌ pě. Dě Běcǎ kaǎcû̌ lû̌û dǒ ta̤cî̌htò̌ agûlǎ̤ dě a gǔ ma̤pî̌kè lû̌û tûjû̌pwa̤ pě. Sahtò̌ dǒ kòyò bô̌lò̤ hǎkhû̌ akhape, kòyò dǒ a ô̌htûpwa̤ dǒ hǎkhû̌ tokhlǒ dě kòyò wě̤nṳ̌ asîmi̤ dǒ lî̤htûpwa̤ akû khôtô̤̌ tokhlǒnu, a gǔ ǒò̌ kiti̤ kaa bò lô̌khô bǎ asî kè̌ ta̤ěta̤jô̌ nutôdo akhanu pě, ma̤titèhî̌dě, tôplǎkhanu ta̤ěta̤jô̌ hǒtôdo ô̌htûpwa̤ dě khònò̤̌ dě a ô̌ pe tô̤̌, bǎbǎkǎlè a gǔ ô̌lṳ̌ sô̌ pě akhû̌akhî, asî ǒò̌ kiti̤ kaa bò lô̌khô pwǎ. ^f

9 Pô̤̌khô na gǔ sî̌ganǎ̤nu, na tôbǎ lîmòsî̌jò̌. Ikǒdû̌ susô̌tômè mî̌ a sǎyṳ hî̌ kû̌ khôlô susô̌tômè dǒ pwa̤mǒ̤ nutôpwa̤ hǎnòò̌ô̌ ǐ nutokhlǒ hǒ. 10 Khwǐcôphǎ susô̌tôpwa̤ mî̌ amè̤̌mè̤̌. Dǒ asî aklanu a lò̤tě̤kè sò̌yè̤̌ hǒ. Tôpwa̤nu a pǒpe ta̤, a ô̌kèpe tôpwa̤, bǎbǎkǎlè a hè khôtô̤̌, htû̌꤮ a hè pěnu a gǔ pǒǐpwǎ tashò̌phû̌nô̤̌ pě. 11 Ta̤ěta̤jô̌ dǒ a ô̌htûpwa̤ hto tôplǎ dě khònò̤̌ a ô̌ pe tô̤̌ nutôdo mî̌ amè̤̌kû̌ khwǐ apwa̤lǐ̤sô̌ nutôpwa̤ hǒ. A mî̌ a ô̌pa kû̌ dǒ khwǐ susô̌tôpwa̤ nutokhlǒ akla. Běcǎ kaǎcû̌ lû̌û dǒ a gǔ cû̌ cî̌htò̌ ma̤pî̌kè asî.

12 Ano̤ ô̌ phòshǐ dǒ na kè̌shǐ hto anu mî̌ amè̤̌kû̌ khwǐ pwa̤shǐ dǒ a pǒ shigǎ khôtô̤̌ tokhlǒ bǎbǎkǎlè kòyò gǔ ǐ asî ta̤siwi̤sòwò̤ dǒ a gǔ pǒ yî̤ tôna̤ri pě. A gǔ pǒ ta̤ kû̌ ta̤ěta̤jô̌ pô̤̌ khwǐ tokhlǒnu pě. ^g 13 Lǒ̤꤮ bò khwǐ pwa̤shǐnu, a ô̌bò kû̌ a ta̤yè̤lò̤nǎ dǒ a sô̌sô̌ lû̌ tokhlǒ dě a gǔ ǐlò̤kè a ta̤pô̤ta̤phǎ kû̌ a ta̤siwi̤sòwò̤ dǒ ta̤ěta̤jô̌ nutôdo a cǔdekû pě. 14 Asî gǔ shěpě̤ sû̌phû̌ nutôdo pě, bǎbǎkǎlè sû̌phû̌ nutôdo gǔ shěpě̤pè̤̌kè asî pě, ma̤titèhî̌dě sû̌phû̌ numî̌ Běcǎ tokhlǒ a Běcǎ, khwǐ tokhlǒ akhwǐ, dě kòyò dǒ a ô̌plǒ kû̌ a nutokhlǒ mî̌ amè̤̌ kòyò dǒ Cǒmara kaǎ asî, htokhôtô̤̌ Cǒmara rû̌htò̌ nò asî, htodě asî mî̌ kòyò dǒ acǒ kû̌ ayô̤̌ tokhlǒ.

15 Dě tanaphû̌ shôbǐǐ he kû̌, “Shilô̤̌mǒ̤ ô̌jûgrû dǒ na kè̌shǐ pwa̤mǒ̤tili̤ hǎnòò̌ dǒ akhû̌nu tokhlǒ numî̌ amè̤̌ kòyò pṳ̂̌tôpwa̤, kòyò khlilèphû̌ pṳ̂̌tocǒ, kû̌ ayô̤̌ pṳ̂̌tôyô̤̌ dǒ hǎkhû̌ nuhǒ. 16 Ano̤ ô̌ aphòshǐ dǒ na kè̌shǐ htohǒnu kû̌ ta̤ěta̤jô̌ nutôdo gǔ sǎkhěkè pwa̤mǒ̤tili̤ nutôpwa̤ pě. Asî gǔ phî̌ bòkè a ta̤ ô̌ kû̌ lû̌û nutokhlǒ pě, dě a no ô̌koyokè lû̌û pě. Asî gǔ ǎkè ayî̌ pě, dě a gǔ shû̌ǔkè bò lû̌û kû̌ mî̌ pě. 17 Cǒmara shû̌nṳ̌ hto a ta̤yè̤lò̤nǎnu dǒ asî sǎphlǒkû kû̌ ma̤titèhî̌dě pô̤̌khô asî gǔ ma̤lǒbehtò̌ Cǒmara a ta̤yè̤lò̤nǎ ayanu, asî gǔ sǎphlǒô̌ ǐlò̤kè a ta̤siwi̤sòwò̤nu kû̌ ta̤ěta̤jô̌ dǒ a gǔ pǒ tǒ̤dǒ Cǒmara alě̤ayô̤̌ lǒhtò̌behtò̌ pěnu. 18 Pwa̤mǒ̤ dǒ na kè̌shǐ a tôpwa̤nu mî̌ amè̤̌pwǎ wî̤̌dû̌ nutôwî̤̌ dǒ a pǒ hǎkhû̌ akhwǐ tokhlǒ nupwǎ.”