Rev 19 | KxfSCKXF | STEP | Ta̤htûhtò̌ hto pô̤̌nudě he ganǎ̤de alě̤pwe̤htò̌ yî̤̌kǒyî̤̌sa dǒ mǒkhû̌ dě a sô̌sô̌ kû̌ kòyò saprṳ̂dû̌ tôprṳ̂ hî̌bǎnu, dě a hî̌ lô̌khô kû̌, “Htû̌sò̌htò̌ lô̌khô Cǒmara! ta̤phǔgekhò̌ge, ta̤bwǐdû̌sîrîhtû kû̌ ta̤pô̤ta̤phǎ sîtokhlǒ mî̌ pa Cǒmara ata lǒ̤bò pwǎ.

Revelation of John 19

1 Ta̤htûhtò̌ hto pô̤̌nudě he ganǎ̤de alě̤pwe̤htò̌ yî̤̌kǒyî̤̌sa dǒ mǒkhû̌ dě a sô̌sô̌ kû̌ kòyò saprṳ̂dû̌ tôprṳ̂ hî̌bǎnu, dě a hî̌ lô̌khô kû̌,

“Htû̌sò̌htò̌ lô̌khô Cǒmara! ta̤phǔgekhò̌ge, ta̤bwǐdû̌sîrîhtû kû̌ ta̤pô̤ta̤phǎ sîtokhlǒ mî̌ pa Cǒmara ata lǒ̤bò pwǎ. 2 Ma̤titèhî̌dě a ta̤cî̌htò̌ sî tokhlǒnumî̌ atôtô kû̌ acǒcǒ. A cî̌htò̌ hto pwa̤mǒ̤tili̤ mi̤lṳ̌hǔsǎ dǒ a ma̤pî̌ma̤lṳ̂̌ hǎkhû̌ tokhlǒ kû̌ asǐashi a ta̤sǎyṳsǎbǎ phû̌mò̤̌ tokhlǒ nutôpwa̤ hǒ. A ma̤si Cǒmara a jû̌ tokhlǒ akhû̌akhî, Běcǎ Cǒmara ma̤ getîkhî shǔsô̌ a hǒ.” ^a

3 Asî yî̤̌kǒhtò̌ sô̌ kû̌,

“Htû̌sò̌htò̌ lô̌khô Cǒmara! mî̌ dǒ a ukè wî̤̌dû̌ tôwî̤̌nu a khǔhtò̌ gutṳ̌jòpe tôkhò̌꤮ tô̤̌, a gǔ khǔhtò̌ ajû̌jû̌ apwa̤pwa̤ pě.” ^b

4 Mǒ̤khumǒ̤pwǎ̤ ginǐ̤shi kû̌ sò̌lǐ̤ kû̌ ta̤htûpwa̤nu lǐ̤do nî̌, a dǒgînîlò̤ cubucabǎhtò̌ Běcǎ Cǒmara dǒ a hǎnòò̌ bǎ khwǐ tòcòhta nutôpwa̤ dě asî hî̌ lô̌khô kû̌,

“Ame̤! htû̌sò̌htò̌ Cǒmara!”

Sû̌phû̌ khômò̤̌ pwè

5 Htodě alě̤pwe̤htò̌ dǒ khwǐ tòcòhta nudě a hî̌ kû̌,

“Cǒmara jû̌ lǒ̤bò tokhlǒ kû̌ a kòyò lǒ̤bò dǒ a ô̌ kû̌ a ta̤siwi̤sòwò̤ tokhlǒ bǎbǎ, aô̌tô̤̌ tokhlǒ bǎbǎ, dǒ a ǐsha bè̌dubè̌nǎ̤ lû̌û tokhlǒnu, htû̌sò̌htò̌ lô̌khô pa Cǒmara.” ^c

6 Bǎnuakha he ganǎ̤de alě̤pwe̤ dǒ a sô̌sô̌ kû̌ kòyò hî̌bǎ tôprṳ̂tôphǎnu. ^d Htodě asô̌sô̌kû̌ shipě̤lò̤tě̤plò̤ tuguteshe, dě apwe̤ shû̌ asô̌sô̌kû̌ shî̌lî̌bǒ mǒgǒlayî̤̌ tokhlǒnu. He ganǎ̤de asî hî̌ kû̌,

“Htû̌sò̌htò̌ Cǒmara, ma̤titèhî̌dě pa Běcǎ Cǒmara dǒ a sî̌ta̤pṳ̂̌mi̤ jò̌ta̤pṳ̂̌cǒ tôpwa̤nu, a pǒǐ ta̤ hǒ. ^e 7 Pa sǎlě̤sǎlò̤ bè̌dû̌bè̌htû wô̤̌wô̤̌ lû̌û pa Cǒmara tǎ. Ma̤titèhî̌dě sû̌phû̌ nutôdo gǔ tôbǎ ge khômò̤̌ shěkhǎ tǒ̤hǒ. A khômò̤̌phû̌mǒ̤ ô̌ tîwî̌tòwò bǎ a hǒ. 8 Khômò̤̌phû̌mǒ̤nu kòyò dǐkûdǐsô̌ lû̌û kû̌ jejû plî plò̌kishǐ wô̌ tôpṳ hǒ.”

Jejû plî plò̌kishǐ wô̌ mî̌ Cǒmara a kòyò tokhlǒ a ta̤phǐta̤ma̤ dǒ acǒatè̤ tokhlǒnu hǒ.

9 Htodě tanaphû̌ hî̌ he kû̌, “Wě̤mǎnǎ mò̌yǎ. Kòyò dǒ ta̤ mǎhè dǒ sû̌phû̌ nutôdo apwè tokhlǒnu, a nǐ̤bǎ ta̤ǐshowî̤.” htodě mǒkhû̌ tanaphû̌ hî̌ pô̤̌ kû̌, “Alě̤ nutokhlǒ mî̌ Cǒmara alě̤ayô̤̌ mè̤̌mî̌ca.” ^f

10 He dô̌gînî̤lò̤ dǒ alô̤mô̤̌ dě he glè̌ cabahtò̌ lû̌û bǎbǎkǎlè a hî̌ he kû̌, “Caba tǎ̤ he tǎ̤mǎ̤, he kû̌ na kû̌ na pṳ̌wè̤̌ Khrǐphû̌ sî tokhlǒ numî̌ jû̌ sô̌sô̌ lû̌ pwǎ. Pa mî̌ kòyò tokhlǒ dǒ a khòlṳ̌ bǎ kòyò kû̌ Yeshǔ awe̤akè tokhlǒ dě pṳ̂̌měnǐ̤ ta̤tě̤ta̤mè̤̌ dǒ Yeshǔ Khrǐ dǔlè̌lṳ̌kè bǎ panu. Pô̤̌nudě, caba tǎ̤ kòyò tôpwǎ̤ tǎ̤mǎ̤, caba pwǎ Cǒmaranu. Ma̤titèhî̌dě ta̤tě̤ta̤mè̤̌ dǒ Yeshǔ Khrǐ dǔlè̌lṳ̌ bǎ numî̌ a sô̌sô̌ kû̌ Cǒmara nohî̌bǎ piwi̤pèshè tokhlǒnu hǒ.”

Kòyò dò̌ tîsî̌bû tôpwa̤

11 Bǎnuakha he kè̌shǐ mǒkhû̌ lûmô hto dě tîsî̌phabû ihtǒô̌ bǎnu tôdo. ^g Kòyò dò̌ tîsî̌ hǒtôpwa̤nu kòyò kaǎ ami̤ kû̌, “Cǒ kû̌ alě̤yô̤̌” kû̌ “Ma̤ta̤ tô.” Kòyò hǒtôpwa̤ nî̌ bǎ a cî̌htò̌ kòyò akhanu, a cî̌htò̌ tô pwǎ dě a shěpě̤ shěshǔ kû̌ pwa̤dǔdǎ tokhlǒ. ^h 12 A mǐ̤sǎphlǒ dě asô̌sô̌kû̌ mî̌ gè̌htò̌nu, htodě a glû̌htò̌ dû̌wî̤ khû̌glû̌hta, dě kòyò wě̤nǎ ami̤ tôphlǒ dǒ anǎ̤lô̤nu bǎbǎkǎlè kòyò sî̌ganǎ̤ tôpwǎ̤꤮ tô̤̌, sî̌ganǎ̤ pwǎ tǒ̤ anǎ̤ Běcǎ tôpwa̤ nô̤̌ pwǎ. ⁱ 13 Jejûhtû dǒ a sô̌ ǐ tôpṳ nî̌ a wǐ bò kû̌ sǐ. Dě “Cǒmara alě̤ayô̤̌,” kòyò kaǎ lû̌mi̤ pô̤̌nu. 14 Mǒkhû̌ akliphû̌ tokhlǒ kûsô̌ htòbò jejû plî, jebû, jejû mṳ̂̌plî tokhlǒ htodě dò̌ htò̌ǐ lô̌khô tîsî̌bû dě gû̌ kû̌ akò. 15 Nò̌she a htò̌wô̌ dǒ a gǔ ma̤pè̤̌kèbò shigǎ tokhlǒ tôbǎnu a ô̌ dǒ lû̌û gô̌kû hǎhtò̌. Dě a gǔ pǒ asî kû̌ khî̌po̤ tě̤htò̌ pě. ^j Dě Cǒmara dǒ a sî̌ta̤pṳ̂̌mi̤ jò̌ta̤pṳ̂̌cǒ tôpwa̤ gǔ dǔlè̌lṳ̌ a ta̤sǎphlǒdû̌ dě a cî̌htò̌ asî sô̌sô̌kû̌ kòyò wî̤̌hǎhtò̌ sîpî̌shi ^{▼▼kòyò wî̤hǎhtò̌ sîpî̌shi numî̌ asô̌sô̌kû̌ kòyò wî̤̌hǎhtò̌ htǒshinu.} nu pě. ^l 16 Dǒ a jejûhtû alô̤ kû̌ akhò̌kǐlô̤nu, kòyò wě̤ ami̤ tôphlǒ kû̌,

“Khwǐ tokhlǒ akhwǐ, Běcǎ tokhlǒ aběcǎ,”

kòyò wě̤ pô̤̌nu.

17 Pô̤̌nuhtodě he kè̌shǐ tanaphû̌ tôpwa̤ ihtǒô̌ dǒ lṳmṳ̌kû dě a jî̌pwǐ̤ yî̤̌kǒhtò̌ lǒ̤bò htû̌phû̌yṳ̌phû̌ dǒ mǒlǎ̤ nutokhlǒ dě a hî̌ kû̌, ^m 18 “Pô̤̌khô sî gǔ hèǎ lô̌khô khwǐ tokhlǒ ayî̌, kli ikǒdû̌ kû̌ kliphû̌ tokhlǒ ayî̌, tîsî̌ tokhlǒ kû̌ pwa̤dò̌ tokhlǒ ayî̌, jû̌ kû̌ kòyò dǒ a nǐ̤ ta̤pi̤li̤ tokhlǒ ayî̌, kòyò dǒ ami̤ lṳ̌shilṳ̌gǎ tokhlǒ kû̌ kòyò dǒ kòyò gènè̤ pî̌tî̌ tokhlǒ ayî̌nu, hè̌ô̌plǒ wô̤̌wô̤̌bòmò̌ lû̌û dǒ Cǒmara apwèdû̌ akûnu.”

19 Bǎnuakha he kè̌shǐ ta̤ěta̤jô̌ nutôdo, hǎkhû̌ khwǐ tokhlǒ kû̌ asî kliphû̌ tokhlǒ ô̌plǒbò lû̌û dǒ a gǔ shěpě̤ kòyò dǒ a dò̌ tîsî̌ nutôpwa̤ kû̌ akliphû̌ nutokhlǒ. 20 Kòyò pṳ̂̌nṳ̌kè ta̤mi̤ta̤mò̤̌ nutôdo dě kòyò pṳ̂̌nǐ̤ wô̤̌wô̤̌ pô̤̌ kû̌ piwi̤pèshè lòhô dǒ a ma̤lṳ̌ bǎ kòyò ta̤cô̌klǐcô̌sè dǒ ta̤mi̤ta̤mò̤̌ nutôdo alô̤mô̤̌ nutôpwa̤. Dǒ a ma̤tô̤klî̌ya bǎ kòyò akhû̌akhî, a lô̌ǐplò̤ǐ lǒ̤bò kòyò dǒ a nǐ̤bǎ ta̤ěta̤jô̌ nutôdo a ta̤ma̤nǎma̤dòǐ dě a caba lû̌û nutokhlǒ. Ta̤ěta̤jô̌ nutôdo kû̌ piwi̤pèshè dǒ a lô̌ǐplò̤ǐ kòyò nutôpwa̤ sò̌ginǐ̤bò kòyò tě̤lò̤tě̤ htûpwa̤ asî dǒ mî̌ dǒ kòyò shû̌u kû̌ kabò nutokoǒ akû. ⁿ 21 A kliphû̌ lǒ̤bò dǒ a ô̌kè tokhlǒnu, kòyò ma̤sikè asî kû̌ nò̌she dǒ a hǎhtò̌ dǒ kòyò dò̌ tîsî̌ nutôpwa̤ agô̌kû nutôbǎ, dě lǒ̤bò htû̌ nutokhlǒ hè cô̌ǎ pè̌ǎ kǒphube bò asî yî̌.