Revelation of John 2

Sûcû̌ ta̤we̤ta̤kè dǒ Ěphěshu ta̤dòkû a ô̌

1“Wě̤cû̌ lî̤nu dǒ Ěphěsu ta̤dòkû a tanaphû̌ a ô̌nu,” A hî̌ he pô̤̌nu. Dě a hî̌ kû̌, “Ta̤we̤ta̤kè numî̌ a hè dǒ pwa̤ dǒ a pṳ̂̌měǐ shǎ susô̌tômè dǒ a cǔtômû akû dě a cû̌ dǒ mî̌tè̌kohta susô̌tômè aklanu tôpwa̤ a ô̌ dě a wě̤cû̌bǎ asî pô̤̌o, 2Na ma̤ ta̤ nî̌ na ma̤ lò̤dô̌lò̤de nanǎ̤ numî̌ he sî̌yaya, htodě na sǎphlǒhtûbò̌ ta̤jî̌ta̤jû̌ tokhlǒ numî̌ he sî̌yaya. Na ô̌jò kû̌ kòyò ma̤ ta̤phû̌mò̤̌shǐhtô tokhlǒ tô̤̌ numî̌ he sî̌yaya. Htodě kòyò dǒ a hî̌ lò̤ ǐtûû̌ anǎ̤ kû̌ pwa̤nophû̌ dě na ma̤kè̌kè̌ asî dě na kè̌shǐ kû̌ asî mî̌ pwa̤nophû̌ mè̤̌tô̤̌, amè̤̌pwǎ pwa̤hî̌bǎ lòhǎlòhô tokhlǒ pwǎ. 3Dǒ hemi̤ akhû̌akhîdě, na ma̤khòma̤bò̌ dě na khòbǎ ta̤jî̌ta̤jû̌ dě na sǎphlǒ pî̌tô̤̌ numî̌ he sî̌yaya.

4“Bǎbǎkǎlè he bè̌ ta̤sǔ dǒ nalô̤nu alǎ̤hî̌ ô̌ tôcǒ, a ô̌ pô̤̌hî̌tèhî̌dě na mô̤nṳ̌ he khònò̤̌nu a sô̌sô̌ pe kû̌ na mô̤nṳ̌ he dǒ asakhû̌lû̌kha nutô̤̌. 5Na cû̌ tûdûkè kû̌ na ta̤mô̤ǐ dǒ asǎkhû̌lû̌kha pwǐtènu gènè̤ kè̌mò̌. Yò̤lǎ̤plǎdî̌ nanǎ̤ dě ma̤tîkhî sô̌ pô̤̌khô na mô̤ǐ dǒ asǎkhû̌lû̌khanu. Na kè̌ yò̤lǎ̤plǎdî̌ getîkhî nanǎ̤ tô̤̌ numî̌ he gǔ hè dǒ naô̌ dě he gǔ hèphǐ tephekè na mî̌tè̌konu dǒ agûlǎ̤nu pě. 6Bǎbǎkǎlè na ta̤wô̌ ô̌pe tocǒ. A ô̌ pe mǐtitèhî̌dě na sǎkhě Nǐkòlǎphû̌ a ma̤ ta̤phû̌mò̤̌ tokhlǒnu a sô̌sô̌kû̌ he sǎkhě asî ta̤ma̤nu hǒ.

7“Na nò̌ku kè̌ ô̌ dě ganǎ̤de ta̤ dǒ Yôla Plò̌shǐ Běcǎ shôbǐǐ ta̤dòkû tokhlǒnu. ^a Kòyò dǒ a ma̤pè̤̌ta̤ tôpwa̤nu, he gǔ ǐ yǎ ta̤siwi̤sòwò̤ dǒ a gǔ nṳ̌ǎ sǒhtûpwa̤ asǎ dǒ a ǐ kòyò ta̤htûpwa̤nu tôsǒ pě. Sǒ hǒo tôsǒnu a dô̌ dǒ Cǒmara a we̤kû dǒ kòyò kaǎ kû̌ Paradǐsǔ akûnu pě.” ^b

Sûcû̌ ta̤we̤ta̤kè dǒ Sômǔranǎ ta̤dòkû a ô̌

8“Wě̤cû̌ lî̤nu dǒ Sômǔranǎ ta̤dòkû a tanaphû̌ aô̌nu,” a hî̌ he pô̤̌o. Dě a hî̌ kû̌, “Ta̤we̤ta̤kè nî̌, a hè dǒ pwa̤ dǒ a si htohǒ dě a htûpwa̤ getîkhî sô̌ nutôpwa̤ a ô̌. A mî̌ ta̤kòshî̌ kû̌ ta̤gutṳ̌ tôpwa̤hǒ. ^c 9Napò̤̌nasha, na hǎwǐ̤shèwè̤ numî̌ he sî̌ganǎ̤. Bǎbǎkǎlè dǒsû̌dǒsò̌ tôkhônu, na dû̌yò̤̌htò̌sa. Kòyò dǒ a hî̌lò̤ tû̌ anǎ̤ kû̌ pa mî̌ Yǔdaphû̌ tokhlǒ mè̤̌mî̌ca bǎbǎkǎlè a mè̤̌mî̌ca bǎtô̤̌ tokhlǒ dô̌ sîyô̤ numî̌ he sî̌ganǎ̤. Asî nutokhlǒ mî̌ hǎkhû̌tana a ta̤cabahǐ saprṳ̂phû̌ tokhlǒ pwǎ. 10Ta̤dǒ na glè̌ khòbǎ khònò̤̌nu, ǐsha tǎ̤ alǎ̤ tîkî̌꤮ tǎ̤mǎ̤ nî̌. Hǎkhû̌tana tîwî̌tòwò kòyò dǒ kòyò gǔ ma̤kè̌kè̌ sî akhû̌akhî, a gǔ dǒnṳ̌ sî dǒ apô̤kû tokhlǒkhlǒ pě. Kòyò gǔ ma̤jî̌ma̤jû̌ sî ani̤shǐshè̌ pě. Tǒ̤dǒ na kè̌shǐbǎ kû̌ ta̤si bǎbǎ, tûlû̌ cǒ kû̌ he dě he gǔ ǐ na ta̤htûpwa̤ a khû̌glû̌hta pě.

11“Na nò̌ku kè̌ ô̌ dě ganǎ̤de ta̤ dǒ Yôla Plò̌shǐ Běcǎ shôbǐǐ ta̤dòkû tokhlǒnu. Kòyò dǒ a ma̤pè̤̌ta̤ tokhlǒnu a khòbǎ pe dǒsû̌dǒsò̌ tôkhô ata̤si tûjû̌pwa̤nu tô̤̌.” ^d

Sûcû̌ ta̤we̤ta̤kè dǒ Pekamǔ ta̤dòkû

12“Wě̤cû̌ lî̤nu dǒ Pekamǔ ta̤dòkû a tanaphû̌ a ô̌nu,” a hî̌ he pô̤̌o. Dě a hî̌ kû̌, “Ta̤we̤ta̤kè numî̌ a hè bǎ pwa̤ dǒ a ô̌ kû̌ adòdǔ dǒ a htòbò ginǐ̤khôginǐ̤gî̌ tôbǎ tôpwa̤ a ô̌. 13Na ô̌tô kû̌ hǎkhû̌tana lǎ̤tòcò numî̌ he sî̌ganǎ̤. Bǎ kòyò ma̤si Khûatǐpa amè̤̌kû̌ pwa̤khòlṳ̌ dǒ acǒ kû̌ he nutôpwa̤ bǎ na wî̤̌kû dǒ hǎkhû̌tana lǎ̤ô̌ agûlǎ̤nu bǎbǎ na cǒ kû̌ he, na wîkè na ta̤yṳ̌ta̤nǎ̤ tô̤̌.

14“Bǎbǎkǎlè ta̤we̤ta̤kè dǒ he lǎ̤dò̌ta̤sǔ dǒ nalô̤ numî̌ a ô̌ tîkî̌, mî̌titè numî̌, kòyò ô̌ dǒ sîkla tokhlǒkhlǒ nî̌, a gû̌ma̤ kû̌ Khûbelǎ a ta̤sû̌ǐtòwòǐ. ^e Khûbelǎ sû̌ǐtòwòǐ Khwǐbala kû̌ a gǔ lô̌ǐplò̤ǐ Isôrělaphû̌ sîtokhlǒ kû̌ asî gǔ ǎ shǎǎshǎô dǒ kòyò lṳhtò̌ kû̌ ta̤yô̤ta̤gî̌ nutokhlǒ, htodě a gǔ cû̌sǔnṳ̌plěnṳ̌ lô̌khô pwa̤mǒ̤pwa̤khû pô̤̌nu. ^f 15Pô̤̌nudě, dǒ sîklanu kòyò dǒ a gû̌ma̤kû̌ Nǐkòlǎphû̌ a ta̤sû̌ǐtòwòǐnu a ô̌ tokhlǒkhlǒ. 16Khònò̤̌dě wîkèmò̌ na ta̤sǔta̤plěnu. Na kè̌ wîkè tô̤̌ mî̌ he gǔ hèô̌lè phwè dǒ na ô̌ pě dě he gǔ hèshě kòyò nutokhlǒ kû̌ nò̌she dǒ a hǎhtò̌ bǎ he gô̌kûnu tôbǎ pě.

17“Na nò̌ku kè̌ ô̌ dě ganǎ̤de ta̤ dǒ Yôla Plò̌shǐ Běcǎ shôbǐǐ ta̤dòkû tokhlǒnu. ^g A hî̌ pô̤̌hî̌tèhî̌dě, lǒ̤bò kòyò dǒ a ma̤pè̤̌ta̤ tokhlǒnu he gǔ ǐ a ma̤nǎmû̌ dǒ kòyò bè̌hǔ a nutôglǒ pě. Htodě he gǔ ǐ asî lǒ̤bû tôpwa̤ tômè pě, dě kòyò wě̤ mi̤sa dǒ alô̤nu pě. Mi̤sa nî̌ kòyò sî̌ganǎ̤ a tôpwa̤ tô̤̌, sî̌ganǎ̤ pwǎtǒ̤ kòyò dǒ a nǐ̤bǎ lǒ̤nu tôpwa̤ nô̤̌ pwǎ.” ^h

Sûcû̌ ta̤we̤ta̤kè dǒ Shatǐra ta̤dòkû a ô̌

18“Wě̤cû̌ lî̤nu dǒ Shatǐra ta̤dòkû a tanaphû̌ aô̌nu,” a hî̌ he pô̤̌odě a hî̌ kû̌, “Ta̤we̤ta̤kè numî̌ a hè dǒ Cǒmara aphû̌khû a ô̌. A mǐ̤sǎphlǒ nî̌ a gè̌plô̤̌htò̌ sô̌sô̌kû̌ mî̌nu, akhò̌lôpô̤̌ nî̌ a shěkakha sô̌sô̌kû̌ tilibò dǒ kòyò htǔplîsîlî̌ anu. 19Na ma̤kwè̌ titènu he sî̌ganǎ̤. Na ta̤mô̤ta̤kla, na ta̤yṳ̌ta̤nǎ̤, na ta̤phǐta̤ma̤, na ma̤khòma̤bò̌ ta̤ sî tokhlǒnu he sî̌ganǎ̤. Ta̤dǒ na ma̤ khònò̤̌ tokhlǒnu, a ô̌ dû̌wî̤khlo pe kû̌ ta̤dǒ na ma̤hto nutokhlǒ mî̌ he sî̌yaya.

20“Bǎbǎkǎlè he lǎ̤dò̌ta̤sǔ dǒ nalô̤ numî̌ a ô̌ tôcǒ. Mî̌titè hî̌dě, na no sû̌ǐtòwòǐ pwa̤mǒ̤ Yeshabelǎ dǒ a hî̌lò̤ tûû̌ anǎ̤ kû̌ he mî̌ Cǒmara piwi̤pèshè tôpwa̤, nutôpwa̤. A sû̌ǐtòwòǐ kòyò akhû̌akhî, a sûcû̌sǔbò he jû̌ tokhlǒ dǒ a gǔ cû̌sǔnṳ̌plěnṳ̌ pwa̤mǒ̤pwa̤khû, htodě a gǔ ǎ shǎǎshǎô dǒ kòyò lṳhtò̌ hto kû̌ ta̤yô̤ta̤gî̌ nutokhlǒ. ⁱ 21He ô̌yṳ̂̌ a dǒ a gǔ yò̤lǎ̤plǎdî̌ sô̌ a ta̤cû̌sǔnṳ̌ pwa̤mǒ̤pwa̤khû nutokhlǒ bǎbǎkǎlè a sǎyṳ wîkè tô̤̌. 22Dǒ a ma̤pô̤̌nu akhû̌akhî he gǔ noshǐsha hǎmôô̌lò̤ a dǒ lǎ̤dakhû̌ pě. Kòyò dǒ a cû̌sǔnṳ̌plěnṳ̌ kû̌ pwa̤mǒ̤ nutôpwa̤ tokhlǒnu, he gǔ nokhòbǎjî̌ khòbǎjû̌ asî pě. Ta̤phû̌mò̤̌shǐhtô dǒ asî cû̌sǔnṳ̌plěnṳ̌ kû̌ pwa̤mǒ̤ nutôpwa̤ tokhlǒnu, asî kè̌ yò̤lǎ̤plǎdî̌ pe anǎ̤ tô̤̌ kè̌hî̌dě he gǔ nokhòbǎjî̌ khòbǎjû̌ asî pě. 23He gǔ ma̤sikè padô̌ akhôphijǎ tokhlǒ pěpě. Pô̤̌nudě ta̤dòkû pṳ̂̌tômṳ̌ gǔ sî̌ganǎ̤ kû̌ he mî̌ pwa̤ dǒ a sî̌ganǎ̤ kòyò pṳ̂̌꤮ tôpwa̤ a ta̤gènè̤ kû̌ a ta̤sǎyṳsǎbǎ tokhlǒ nupě. ^j Sî tôpwa̤ kû̌ tôpwa̤ ma̤hto bò hî̌tènu, he gǔ dǔlṳ̌ geshěshu sî pô̤̌ sî ma̤hto nutokhlǒ pě. ^k 24Bǎbǎkǎlè sî Shatǐra ta̤dòkû dǒ a ô̌kè tokhlǒnu, sî gû̌ma̤ kû̌ kòyò pwa̤mǒ̤ Yeshabelǎ a ta̤sû̌ǐtòwòǐ phû̌mò̤̌ dǒ kòyò kaǎ kû̌ hǎkhû̌tana ata̤ ta̤sûû̌ adû̌ayô̤̌ tokhlǒ nutô̤̌. He bè̌htò̌ ta̤wǐta̤yò̌ dǒ sîlô̤ tôcǒ tô̤̌. 25Bǎbǎkǎlè pṳ̂̌měǐ wô̌ lô̌khô ta̤ dǒ a ô̌ kû̌ sî nutokhlǒ tǒ̤dǒ he hèlò̤ sô̌ pě tôplǎ nunî̌꤮.

26– 27“Mòpèpè̌ bǎbǎ dǒ a ma̤pè̤̌ta̤ dě a kè̌ ma̤ sělě tǒ̤dǒ agutṳ̌ pô̤̌ he ta̤sǎyṳ ô̌numî̌, he gǔ ǐ yǎ ta̤siwi̤sòwò̤ dǒ asô̌sô̌kû̌ he nǐ̤bǎ dǒ hepha a ô̌ nutokhlǒ pě. ^l

‘He gǔ ǐ yǎ ta̤siwi̤sòwò̤ dǒ a gǔ pǒ shigǎ tokhlǒ kû̌ khî̌po̤ tě̤htò̌ pě, dě a gǔ demǔ bò asî pô̤̌ kòyò demǔ gopo̤hǎkhû̌ nupě.’ 28He gǔ ǐ dô̌ a shǎtǒ̤wô̤ pěpě. 29Na nò̌ku kè̌ô̌ hî̌dě ganǎ̤de ta̤ dǒ Yôla Plò̌shǐ Běcǎ shôbǐǐ ta̤dòkû tokhlǒnu.”