Rev 20 | KxfSCKXF | STEP | Hǒtôplǎdě he kè̌shǐ tanaphû̌ tôpwa̤ ô̌ dǒ mǒkhû̌ hèlò̤ dě a pṳ̂̌mě ǐ khokûdû̌yô̤̌ nutôkû asò̌shî̌ kû̌ sǒpli̤tě̤htò̌dû̌ tôbô dǒ a cǔdekû.

Revelation of John 20

Aně tôrǐ

1 Hǒtôplǎdě he kè̌shǐ tanaphû̌ tôpwa̤ ô̌ dǒ mǒkhû̌ hèlò̤ dě a pṳ̂̌mě ǐ khokûdû̌yô̤̌ nutôkû asò̌shî̌ kû̌ sǒpli̤tě̤htò̌dû̌ tôbô dǒ a cǔdekû. 2 A hè pṳ̂̌měkè wṳ̂̌dû̌ amè̤̌kû̌ hǎkhû̌tana dǒ něhǎlau nutôbô. A mî̌ kòyò kaǎ lû̌û kû̌ Sehtô. Dě a coměyî̤ lû̌û anětôrǐ. ^a 3 Tanaphû̌ nutôpwa̤ wîtě̤kè lû̌û dǒ hǎkûyô̤̌ nutôkû akû dě a khǎměbǐkè lû̌û dě a ma̤nǎma̤dò lû̌û. Pô̤̌khô a gǔ cû̌ lô̌ǐplò̤ǐ pe kòyò khlilèphû̌ tokhlǒ tô̤̌nu, a dǒ ô̌kè lû̌û aně tôrǐ. Dě anětôrǐ behtò̌ pěnu, kòyò gǔ plûhǎhtò̌ a tashò̌phû̌nô̤̌ pě.

4 Htodě he kè̌shǐ khwǐ tòcòhta tokhlǒ. Kòyò hǎnòò̌ô̌ dǒ tòcòhta alô̤ tokhlǒnu, kòyò ǐ asî ta̤siwi̤sòwò̤ dǒ a gǔ cî̌htò̌ kòyò pě. He kè̌shǐ pô̤̌ kòyò dǒ a khòlṳ̌ kû̌ Yeshǔ awe̤akè dě a shôbǐǐlṳ̌ bǎ kòyò Cǒmara alě̤ayô̤̌ tokhlǒ akhû̌akhî, kòyò pè̤̌tṳ̌kè asî gô̌bô tokhlǒ a yôla htûpwa̤ hǒ. Ta̤ěta̤jô̌ bǎbǎ, ta̤ěta̤jô̌ ata̤yô̤nu bǎbǎ, asî cabahtò̌bǎ gû̌ kòyò tô̤̌. Htokhôtô̤̌ ta̤ěta̤jô̌ nutôdo a ta̤ma̤nǎma̤dòǐ dǒ kòyò bǎ ma̤mǎ dǒ mě̤htò̌lô̤ nubǎbǎ, tô̤̌mî̌ dǒ cǔdelô̤ nobǎbǎ, a phî̌shǔbǎ kòyò ta̤ma̤nǎma̤dòǐ tôcǒ tô̤̌. Asî htûpwa̤ getîkhî dě a pǒ ta̤ kû̌ Khrǐ aně tôrǐ pě. ^b 5 Hǒomî̌ ta̤htûpwa̤ ihtǒ getîkhî awǐlǒ tôplǎ hǒ. Aně tôrǐ be khôtô̤̌nu, kòyò dǒ a si hto dě a ô̌ pe dǒ hǎlǎ̤ tokhlǒnu, a ihtǒge khôtô̤̌. 6 Kòyò ô̌tǒ̤ dǒ ta̤si ihtǒhtûpwa̤sô̌ wǐlǒnu tôplǎ akû tokhlǒ numî̌ a nǐ̤bǎ ta̤ǐshowî̤ dě asî mî̌ kòyò plò̌shǐphû̌ tokhlǒ. A hǎplǎkè kû̌ ta̤si ginǐ̤plǎtôplǎ hǒ. Asî gǔ htû Cǒmara kû̌ Khrǐ a pwa̤shû̌gǎ tokhlǒ pě. Asî gǔ pǒ ta̤ kû̌ Khrǐ aně tôrǐ pě.

Ta̤ma̤pè̤̌ hǎkhû̌tana

7 Aně tôrǐ behtò̌ hto pěnu, kòyò gǔ plûhǎhtò̌ hǎkhû̌tana dǒ apô̤kû pě. 8 Dě a gǔ hǎhtò̌cû̌ bò hǎkhû̌ lǐ̤khôlǐ̤gî̌ dě a gǔ lô̌ǐplò̤ǐbò kòyò khlilèphû̌ tokhlǒ pě. Kòyò kaǎ asî kû̌ Gò̌phû̌ kû̌ Magò̌phû̌. ^c Asî bǎ htò̌shěta̤ akhû̌akhî, hǎkhû̌tana gǔ kaǎ plǒbò asî pě. Asî ô̌dû̌wî̤ asô̌sô̌kû̌ lǒ̤sîmî̌ dǒ shidû̌shite̤we̤htu tokhlǒ nupě. ^d 9 Asî hǎhtò̌cû̌ dǒ hǎkhû̌běkhû̌ dě cû̌bô̌ te̤we̤bǐbò Cǒmara a kòyò tokhlǒ kû̌ wî̤̌ dǒ Cǒmara mô̤ ǐ yǎ nutôwî̤̌. Bǎbǎkǎlè mî̌ ô̌ dǒ mǒkhû̌ hèlò̤ ukèbò asî. 10 Hǎkhû̌tana dǒ a lô̌ǐplò̤ǐ asî tôdonu, kòyò wîtě̤kè lû̌û dǒ mî̌kû dǒ kòyò shû̌gè̌ kû̌ kabò tôkû akû. Mî̌nu tôkû numî̌ kòyò lǎ̤wîtě̤ ta̤ěta̤jô̌ nutôdo kû̌ piwi̤pèshè lòhô nutokhlǒ agûlǎ̤ hǒ. Dě asî gǔ khòbǎ ta̤jî̌ta̤jû̌ lṳ̌mṳ̌khǐkhǐ lṳ̌mṳ̌shasha tûjû̌pwa̤ talakhǎ pě.

Ta̤cî̌htò̌ dǒ nǒkò gutṳ̌

11 Htodě he kè̌shǐ khwǐ côphǎ tòcòhta abûpǎdû̌ tôkhû̌ kû̌ pwa̤ hǎnòò̌ dǒ akhû̌ nutôpwa̤. Dě mǒkhû̌ kû̌ hǎkhû̌ lûcû̌kè dǒ a lô̤mô̤̌ dě kòyò kè̌shǐnô̌ petô̤̌. ^e 12 Dě he kè̌shǐ kòyò dǒ ami̤ lṳ̌shilṳ̌gǎ kû̌ kòyò dǒ kòyò gènè̤ pî̌tî̌ lû̌û dě a sihtohǒ tokhlǒ ihtǒô̌ dǒ khwǐ tòcòhta abûpǎdû̌ alô̤mô̤̌nu. Kòyò bǔmôhtò̌ lî̤tokhlǒ htodě kòyò bǔmôhtò̌ lî̤ ashǔshawa̤ tôbǎ dǒ kòyò kaǎ kû̌ lî̤htûpwa̤nu. Kòyòsi tokhlǒnu, kòyò cî̌htò̌ asî pô̤̌ a ma̤bǎhtonu kû̌ pô̤̌ kòyò wě̤mǎnǎ bǎ lî̤nu akûnu tokhlǒ. 13 Htodě shidû̌shite̤we̤nu a ǐhtò̌kû̌ a kòyò si dǒ a ô̌ bǎ akûnu tokhlǒ. Ta̤si kû̌ lṳ̌gǎ tokhlǒnu, a ǐhtò̌ lô̌khô kòyòsi ô̌ dǒ asîkû nutokhlǒ. Dě kòyò cî̌htò̌ bò kòyò pṳ̂̌tôpwa̤ pô̤̌ asî ma̤hto ta̤nu. 14 Htodě dǒnô̌kònu, ta̤si kû̌ lṳ̌gǎ tokhlǒnu, kòyò wîtě̤kè asî dǒ mî̌phǎ akû. Mî̌ nutôphǎmî̌ amè̤̌kû̌ ta̤si ginǐ̤plǎtôplǎ hǒ. 15 Kòyò tôpwa̤pwa̤ ami̤ kè̌ ô̌ dǒ lî̤htûpwa̤ nutôbǎ akû tô̤̌ hî̌nu, kòyò bǎ wîtě̤kè a dǒ mî̌phǎ nutôphǎ akû pě.