Revelation of John 21

Mǒkhû̌sa kû̌ hǎkhû̌sa

1Htodě he kè̌shǐ mǒkhû̌sa kû̌ hǎkhû̌sa. Dě mǒkhû̌li̤ kû̌ hǎkhû̌li̤ hǒtôbě hǎmǎkè bò pě. Htodě shidû̌shite̤we̤ numî̌ a ô̌pe tô̤̌. ^a 2He kè̌shǐ wî̤̌plò̌shǐ amè̤̌kû̌ Yarǔshôle wî̤̌sa tôwî̤̌, ^b dě a ô̌ dǒ mǒkhû̌ dǒ Cǒmara a ô̌ dě a hèlò̤. ^c Kòyò tîwî̌tòwò kûsô̌ nǎ bǎ lû̌û pô̤̌ khômò̤̌ phû̌mǒ̤ tôpwa̤ dǒ a ô̌pǒ̤shěshǔ awṳ̂nu. ^d 3He ganǎ̤de lě̤pwe̤shû̌ tômṳ̂ dǒ khwǐ tòcòhta aô̌, dě a hî̌ kû̌, “Khònò̤̌ Běcǎ Cǒmara hèô̌ kû̌ kòyòhǎkhû̌phû̌ hǒ. A gǔ ô̌plǒ kû̌ asî dě asî gǔ htûhtò̌ Cǒmara a kòyò pě. Běcǎ Cǒmara anǎ̤běcǎ gǔ ô̌plǒ kû̌ asî dě a gǔ htû bǎ asî Běcǎ pě. ^e 4Cǒmara gǔ htǔsûkèbò asî amǐ̤sǎshi pě. Ta̤si ô̌ pe tô̤̌. Ta̤sǎplǎ̤ bǎbǎ, ta̤hǎta̤wô bǎbǎ, ta̤shayî̌bò̌plě bǎbǎ a ô̌ pe tô̤̌. ^f Ta̤ dǒ a htûhtò̌bǎ dǒ hǎkhû̌ ali̤ hǒtôbǎ tokhlǒnu, a ô̌ pe tô̤̌.” ^g

5Htodě pwa̤ hǎnòò̌ dǒ khwǐcôphǎ tòcòhta nutôpwa̤ hî̌ kû̌, “Khònò̤̌ he ma̤sa bò ta̤pṳ̂̌tocǒ.” Dě a hî̌ he kû̌, “Wě̤mǎnǎ ta̤ hǒtokhlǒnu, ma̤titèhî̌dě lě̤yô̤̌ tokhlǒ numî̌ alǎ̤yṳ̌ǎ dě atě̤amè̤̌.”

6Dě a hî̌ kû̌, “A htohǒ, he mî̌ awǐlǒ kû̌ ajǒkò hǒ. He mî̌ akòshî̌ kû̌ agutṳ̌ hǒ. Shipǒ̤hǎhtò̌ dǒ a ǐ ta̤htûpwa̤shi tûjû̌pwa̤nu a ô̌ tôkû. Kòyò dǒ a sǎô tôpwa̤pwa̤nu, he dǐô̌kwe a pě. ^h 7Kòyò tôpwa̤pwa̤ dǒ a ma̤pè̤̌ta̤nu, a gǔ nǐ̤bǎ bò̌꤮ bò ta̤nu tokhlǒ dǒ heô̌ pě. He gǔ htû asî Běcǎ Cǒmara dě asî gǔ htû hephû̌ tokhlǒ pě. ⁱ 8Bǎbǎkǎlè kòyò dǒ a ǐsha sî, acǒ kû̌ a ta̤yṳ̌ta̤nǎ̤ tô̤̌ sî, asǎphlǒ phû̌mò̤̌ sî, a ma̤si kòyò sî, a cû̌sǔnṳ̌plěnṳ̌ pwa̤mǒ̤pwa̤khû sî, pwa̤běkhû̌ ta̤ma̤ sî, a caba ta̤yô̤ta̤gî̌ sî, dě a lòhô kòyò sî tokhlǒnu agûlǎ̤gûbò̌ mî̌ mî̌phǎ dǒ amè̤̌ ta̤si ginǐ̤plǎtôplǎ dǒ kòyò shû̌gè̌ a kû̌ kabò tôphǎnu hǒ.”

Wî̤̌yarǔshôle asa

9Tanaphû̌ susô̌tôpwa̤ dǒ a pṳ̂̌mě ǐ balějôwô̤ susô̌tômè dǒ a be kû̌ ta̤jî̌ta̤jû̌ dǒ jǒkòlǒ susô̌tôcǒnu akla tôpwa̤nu, a hè dǒ he ô̌ dě a hî̌ he kû̌, “Hèmò̌ dě he gǔ nè̌lṳ̌ na kû̌ sû̌phû̌ ama khômò̤̌phû̌mǒ̤ nutôpwa̤.” 10Cǒmara a yôla htûpwa̤ ô̌cu kû̌ he dě tanaphû̌ tôpwa̤ jocû̌ he dǒ khôlôdû̌htû tômè akhi. Dě a nè̌lṳ̌ he kû̌ Wî̤̌yarǔshôle aplò̌shǐ nutôwî̤̌. Wî̤̌nu a ô̌ dǒ mǒkhû̌ bǎ Běcǎ Cǒmara a ô̌ dě a hèlò̤. ^j 11Dě wî̤̌ nî̌, a lǒbe kû̌ Cǒmara ata̤bwǐdû̌sîrîhtû. Wî̤̌ nî̌, a kakha sô̌sô̌kû̌ lǒ̤ sulè̌sulaplò̌ dǒ alě̤dû̌pwî̤htû tômènu htokhôtô̤̌ asô̌sô̌kû̌ lǒ̤bû plò̌kishǐ tômè. 12Wî̤̌nu kòyò ma̤ htò̌yô̤̌ te̤we̤ bǎ lû̌û kû̌ we̤dû̌we̤htû htò̌yô̤̌. Htodě takhadû̌ ô̌ shǐginǐ̤bǎ dě mǒkhû̌ tanaphû̌ ô̌pǒ̤ ǐ a shǐsò̌ginǐ̤. Dǒ takhadû̌ alô̤nu kòyò wě̤nǎ Isôrělaphû̌ shǐginǐ̤mṳ̌ ami̤. ^k 13Dǒ wî̤̌kû tôkhô kû̌ tôkhôsu takhadû̌ ô̌ subǎ. Dǒ gǎcôcî̌ subǎ, lṳmṳ̌htò̌ subǎ, lṳmṳ̌nu subǎ, gǎcômû dě subǎ. 14Wî̤̌kû akòshî̌nu kòyò bô̌htò̌ kû̌ lǒ̤dû̌ shǐginǐ̤mè. Dě dǒ lǒ̤ hǒtokhlǒ alô̤nu kòyò wě̤ nǎ kû̌ sû̌phû̌ a pwa̤nophû̌ shǐsò̌ginǐ̤ tokhlǒ ami̤.

15Tanaphû̌ dǒ a hî̌bǎ kû̌ he tôpwa̤nu, a pṳ̂̌mě ǐ alǎ̤tè sǒpli̤hta tôbô dě a gǔ tèkè̌ wî̤̌ kû̌ wî̤̌takhadû̌ tokhlǒ kû̌ wî̤̌we̤ tokhlǒ. ^l 16Wî̤̌ nî̌ aně̤ ô̌ lǐ̤khô dě ahtû kû̌ alè̤̌nu a gònò̤ lû̌û pwǎ. Tanaphû̌ tèkè̌ wî̤̌nu kû̌ alǎ̤tè sǒpli̤hta nutôbô dě ahtûnu a ô̌ mi̤la tôrǐ yè̤̌ya̤, dě alè̤̌nu, a gònò̤ sô̌sô̌kû̌ ahtû nupwǎ. 17Tanaphû̌ tèkè̌ pô̤̌ wî̤̌kûnu kû̌ lǎ̤tè sǒpli̤hta nutôbô pô̤̌ kòyòhǎkhû̌phû̌ lǎ̤klô tènu. A tè hto dě adu nî̌ a ô̌ tôya̤ kû̌ lǐ̤shi kû̌ lǐ̤plǎ̤. 18Wî̤̌we̤nu kòyò bô̌ a kû̌ lǒ̤sulè̌sula tokhlǒ htodě wî̤̌nu kòyò bô̌ a kû̌ htacè̌ mè̤̌mî̌ca dě a plò̌kîtrî̌ kè̌shǐ lṳ̌phlônṳ̌ pô̤̌ lǒ̤bûcè̌nu. ^m 19Wî̤̌we̤ akòshî̌nu kòyò tîwî̌ a kû̌ lǒ̤po̤lòsè̌ acǒcǒ. Lǒ̤ dǒ kòyò bô̌ lû̌û dǒ wî̤̌we̤ akòshî̌ awǐlǒ tômè numî̌ lǒ̤sula dǒ kòyò kaǎ kû̌ Jěshôphô, ginǐ̤mètômè mî̌ lǒ̤lî̤wǒ̤ dǒ kòyò kaǎ kû̌ Saphǐra, sumètômè mî̌ lǒ̤lǒsu dǒ kòyò kaǎ kû̌ Akata, lǐ̤mètômè mî̌ lǒ̤sula dǒ kòyò kaǎ kû̌ È̌marô. 20Yè̤̌mètômè mî̌ lǒ̤kǐlò dǒ kòyò kaǎ kû̌ ò̌nǐshǎ, amè susô̌ tômè mî̌ lǒ̤lî̤ dǒ kòyò kaǎ kû̌ Khǎnila, susô̌tômè mî̌ lǒ̤bò dǒ kòyò kaǎ lû̌û kû̌ Khrǐsôtûlitû, amè lǐ̤sô̌ tômènu dě lǒ̤sula dǒ kòyò kaǎ kû̌ Bèrila, lǐ̤sô̌tômè nutômè dě lǒ̤bò dǒ kòyò kaǎ kû̌ Htû̌pasha, amè shǐ nutômè mî̌ lǒ̤sula dǒ kòyò kaǎ kû̌ khrǐsôphrasô, shǐtômè nutômè mî̌ lǒ̤lî̤bû dǒ kòyò kaǎ kû̌ Hǎsheta, shǐginǐ̤mè nutômè mî̌ a lǒ̤lî̤lǒso dǒ kòyò kaǎ kû̌ Amahtǐshata. 21Takhadû̌ shǐginǐ̤bǎnu, tôbǎ mî̌ pwe̤sa lě̤dû̌pwî̤htû tôphlǒ, tôbǎ kû̌ tôbǎ nî̌ kò ma̤yǎ kû̌ pwe̤sa lě̤dû̌pwî̤htû tôphlǒ pô̤̌nu. Kòyò ma̤ a pô̤̌nu akhû̌akhî hǎlǒ̤ pwe̤sa lě̤dû̌pwî̤htû shǐginǐ̤phlǒ. Wî̤̌ aklè̌nu hta mè̤̌mî̌ca dě a ô̌lṳ̌ shělîkitrǐ kè̌shǐ lṳ̌phlô pô̤̌ lǒ̤subûnu.

22Dǒ wî̤̌kûnu he kè̌shǐ ta̤lṳhtò̌hô ô̌ tômè tô̤̌, ma̤titèhî̌dě Běcǎ Cǒmara dǒ ajò̌ta̤ lǒ̤bò tôpwa̤ kû̌ sû̌phû̌ tôdo a ô̌ lô̌khô bǎnu dě kòyò cabahtò̌ asî akhû̌akhî, ta̤lṳhtò̌hô alǎ̤lṳ̂ petô̤̌. 23Cǒmara a ta̤lîkakha a lîlò̤ dǒ wî̤̌kû, dě sû̌phû̌ nutôdo lî bǎ asî sô̌sô̌kû̌ mî̌tè̌konu akhû̌akhî, dǒ wî̤̌kûnu lṳmṳ̌ ata̤lî bǎbǎ, la ata̤lî bǎbǎ a lǎ̤lṳ̂ pe tô̤̌. ⁿ 24Kòyò hǎkhû̌phû̌ tokhlǒnu, a gǔ cû̌ kû̌ Cǒmara kû̌ Yeshǔ ata̤lînu pě dě hǎkhû̌ khwǐ tokhlǒnu, a gǔ phî̌hènṳ̌ lô̌khô a ta̤dû̌yò̤̌htò̌sa dǒ wî̤̌kûnu pě. ^o 25Wî̤̌ takhadû̌ tokhlǒnu kòyò bǔmô pṳ̂̌ tôni̤ pě. Lṳmṳ̌khǐ ô̌ pe tô̤̌ akhû̌akhî, kòyò ma̤bǐ yǎ tôkhò̌ tô̤̌. ^p 26Shigǎ a ta̤wî̤ta̤wô̌ tokhlǒ kû̌ a ta̤dû̌yò̤̌htò̌sa tokhlǒnu, kòyò gǔ phǐhè a bǎnu pě. 27Bǎbǎkǎlè dǒ wî̤̌kûnu ta̤ dǒ aplò̌shǐ tô̤̌ nutokhlǒ nṳ̌jò tôcǒ tô̤̌. Kòyò dǒ a ma̤ ta̤phû̌mò̤̌shǐhtô bǎbǎ, a lòhǎlòhò tokhlǒ bǎbǎ, nṳ̌jò tôpwǎ̤ tô̤̌. Nṳ̌jò pwǎtǒ̤ kòyò dǒ ami̤ ô̌ dǒ sû̌phû̌ a lî̤htûpwa̤ nutôbǎ akû tokhlǒ nô̤̌ pwǎ. ^q